63
Xoossa Pirda Gallas
1 Edoome biittan, Baasora katamaape
zo7o ma7o ma7idi yey haysi oonee?
Boncho ma7o ma7idi
ba wolqaa minotethan sinthe hordofey oonee?
“Xillo odeteynne
ashshiya wolqi de7ey tana”
yaagees Goday.
2 Woyne gum7iyason woyne yedhiya asa ma7oda
ne ma7oy ayis zo77idee?
3 “Taani woyne gum7iyason woyniya tarka yedhas;
kawotethatape issi asika taara baawa.
Taani enta ta hanquwan yedhas;
ta yiluwan enta dirxerethas.
Enta suuthay ta ma7uwa bolla dharcetin,
ta ma7o ubbay iitis.
4 Taani ta asaa woziya gallasaynne
enta morketa halo keyiya laythay gakis.
5 Taani be7as,
shin tana maaddiya issi asika demmabike;
maaddey dhayida gisho, taani malaaletas.
Hessa gisho, ta qesey taw atotethi ehis;
ta hanqoy tana maaddis.
6 Taani ta hanquwan kawotethata yedhas;
ta yiluwan enta dirxerethas;
enta suuthaa biittan gussas” yaagees Goday.
Woosanne Galata
7 Goday nuus oothida ooso ubbaa,
Goday ba maarotethaaninne ba qadhiyan
Isra7eele asaas oothida lo77o ooso ubbaanne
iya sunthay galatetana mela
bessida keehatetha ubbaa taani odana.
8 I, “Enti tuma ta asenne ta na7a gidiya gisho,
taw wordotokona” yaagis.
Hessa gisho, I enta ashsheysa gidis.
9 Enta waaye ubbaa I waayetis;
iya Sinthaa Kiitanchoy enta ashshis.
I enta ba siiquwaninne ba maarotan wozis;
kase aadhida wodeta ubban I enta tookis.
10 Shin enti makallidosona;
iya Geeshsha Ayyaana azzanthidosona.
Hessa gisho, I simmidi,
entaw morke gidis; enta olis.
11 Hessafe guye asay benibaanne
ba aylliya Muse wode oothidaba qopidi,
haysada yaagidosona:
“Ba wudiya henthanchotara issife
abba giddora kanthisida Xoossay awun de7ii?
He wode ba Geeshsha Ayyaana enta giddon,
wothida Xoossay ha77i awun de7ii?
12 Baw merinaa sunthu gidana mela
enta sinthan haatha shaakidi, ba boncho wolqaama qesey
Muses ushacha kushe gidana mela kiittidaysi awun de7ii?
13 Biitta bollara pari biyada enti dhubetonna
ciimmo haatha giddora pinthidaysi awun de7ii?”
yaagidosona. 14 Zangaara wodhiya meheda,
Godaa Ayyaanay entaw shempo immis.
Ne sunthay bonchetana mela
hessada oothada ne asaa kaalethadasa.
15 Abeeti Godaw, salora duge xeella;
neeni de7iya geeshshinne
boncho gidida araatape be7a.
Ne qinaateynne ne wolqay anee?
Ne maarotaynne ne qadhey nuupe haakis.
16 Abrahaamey nuna eronna ixikoka,
Yayqoobi nuna akeekona ixikoka,
abeeti Godaw, neeni nu aawa;
benipe doomidi, ne sunthay nuna wozeysa.
17 Abeeti Godaw, nuuni ne ogiyape
dhayanaadanne new yayyonnaada
nu wozanaa ayis muumisadii?
Godaw, ne aylleta gisho,
ne laata gidida kochata gisho,
nuuko simma.
18 Ne geeshsha asay
ne keetha guutha wodes laattidosona;
shin ha77i nu morketi iya yedhidosona.
19 Nuuni benipe nebaa;
shin enta neeni haarabaaka;
ne sunthanka enti xeegetibookona.