Ayseysata Maxaafa
Gaatha Qofa
Ayseysata maxaafay xaafetiday, Xoossay immana gidi caaqida biitta gelida Isra7eele asay Kanaane biittan waanidi de7idaako, Iyyasupe doomidi Sameela hayquwa gakanaw de7iya waanna waanna taariketa qoncisidi bessanaasa. Isra7eele asay Xoossay entaw immida biittan, Xoossara enti gelida caaquwa menthidi, eeqa goyinnon bantana tunisidi, ay mela iitida de7o de7idaako maxaafay loythidi bessees.
He wodey Isra7eele asa taariken higgey bayna wode. Ha taariketi “Ayseysata” geetetiya mino asati oothidaba bessoosona. Ha ayseysatape daro baggay ola kaalethiya asata. Entafe daro eretidaysati, Diboora (4:1—5:31); Gediyoona (6:1—6:35); Samsoona (13:1—16:31).
Ha maxaafape nuuni demmiya timirtey, Isra7eele asay Xoossa sinthan saro de7ey enti Xoossas ammanetidi de7ida wode xalaalana. Enti iyaw ammanetona ixiya wode ubban, enta bolla qohoynne dhayoy yees. Enti Xoossa bolla zoko zaarosona; Xoossay allaga kawotethatas enta aathidi immees; enti bantana ashshana mela Xoossako waassoosona; Xoossay enta gisho oletiyanne enta ashshiya ase denthees. Hessafe nuuni be7iyabay, asay Xoossas ammanetona ixida gaason enta bolla qohoynne dhayoy gakikoka, enti banta nagara paaxidi iyako simmida wode ubban, Xoossay enta ashshanaw giigidi uttis.
Maxaafa Ayfe Qofata
Isra7eele asay biittas bagga xalaala oyketha (1:1-36)
Xoossay ayseysata Isra7eele asaas dooruwa (2:1—3:6)
Gotoniyala, Naa7odanne Samgaara (3:7-31)
Diboora, Baaraqanne Yabina (4:1—5:30)
Gediyoona (5:31—8:35)
Abimeleke (9:1-57)
Tola, Ya7iranne Yoftaahe (10:1—12:7)
Ibxana, Eloona, Abdoona (12:8-15)
Samsoona (13:1—16:31)
Daane kochaanne enta goyinno bessa (17:1—18:31)
Biniyaame kocha bolla dendida ola (19:1—21:25)
1
Attida Biitta Olidi Oyketha
1 Iyyasuy hayqidaape guye Isra7eele asay, “Kanaane biitta olanaw nu kochatape koyrottidi keyanay oonee?” yaagidi Godaa oychidosona.
2 Goday, “Yihuda kochay koyrottidi keyo. Taani biitta iya kushen aathada immas” yaagis.
3 Yihuda asay banta ishata, Simoona kochata, “Nuuni Kanaaneta olana mela nuna gishon gakida biitta nuura yedhite. Nuka hintena gishon gakida biitta hintera baana” yaagis. Simoona kochay Yihuda kochaara issife olanaw bis. 4 Goday Kanaanetanne Parzeta enta kushen aathidi immin, Beezeqa kataman tammu mukulu asaa wodhidosona. 5 Beezeqa kataman kawa Adooni-Beezeqa demmidi, iyara oletidi Kanaanetanne Parzeta xoonidosona. 6 Adooni-Beezeqi baqatiya wode enti yedethi oykidi, iya kushiyanne iya tohuwa wogga biradheta qanxidosona.
7 Adooni-Beezeqi, “Kushenne toho wogga biradheta taani qanxida laapun tammu kawoti ta gaytape wodhida tiifiya maxidi moosona. Taani enta bolla oothidaysada Xoossay ta bolla oothis” yaagis. Iya Yerusalaame ehin yan hayqis.
8 Yihuda asay Yerusalaame oli oykidi asaa mashshan wodhidi, katamaa taman xuuggidosona. 9 Hessafe guye, Yihuda asay derey dariya biittan, Negeba mela biittaninne gadhan de7iya Kanaaneta olanaw bidosona. 10 Kase Qiriyaat-Arba geetetiya Kebroona kataman de7iya Kanaaneta olidi Sesaya, Akmaananne Talmaya geetetiya kochata xoonidosona.
11 Yaape dendidi Yihuda asay Debira kataman de7iya asaa olanaw bidosona. Debira katamay kase Qiriyat-Sefera geetetees. 12 Kaalebi, “Qiriyat-Sefera olidi oykiya uraas taani ta na7iw Akiso immana” yaagis. 13 Kaaleba kaalo isha Qanaza na7ay Gotoniyali he katamaa olidi oykin, Kaalebi ba na7iw Akiso iyaw immis.
14 Aksa Gotoniyala geliya wode, I aaway iw gade immanaada woossana mela Gotoniyali iyo zoris. Iya baqulo bollafe wodhishin Kaalebi ta naatte, “Ay koyay?” yaagidi oychis.
15 Iya, “Taw woyto imma. Neeni kase taw immida biittay qaa7e gidida gisho haatha pultota taw immarki” yaagasu. Kaalebi qommo pultuwanne garsa pultuwa iw immis.
16 Musey bolluwa Qenaati kochati Yihuda asaara Zamba Katama geetetiya Iyaarko katamaape dendidi Arada katamaape dugeha baggara, Negeban de7iya Yihuda mela biitta bidi yan de7iya asaa giddon uttidosona. 17 Yihuda asay Simoona asaara issife bidi, Xafaata kataman de7iya Kanaaneta xoonidi katamaa kumethi dhaysidi, he katamaa Horma*Horma: Ha sunthaa birshethay dhayso guussu. gidi sunthidosona. 18 Yihuda asay gujidi Gaaza, Asqaloona, Eqroonanne enta yuushuwan de7iya gutata oykidosona. 19 Goday Yihuda asaara de7iya gisho, derey dariya biitta laattidosona. Shin demba biittan de7iya asatas biratape oosetida ola para gaareti de7iya gisho, Yihuda asay enta gooddidi kessanaw danda7ibookona. 20 Musey kiittidaysada, Kebroona katamaa Kaalebas immin Kaalebi Anaaqe koche gidida heedzu kochata gooddidi kessis. 21 Shin Biniyaame kochati Yerusalaamen de7iya Yaabuseta gooddidi kessibookona. He wodepe doomin Yaabuseti Biniyaame kochatara issife Yerusalaamen de7idosona.
22 Qassi Yoosefa kochati Beetele katamaa olidosona; Xoossay entara de7ees. 23 Yoosefa kochati kase Looza geetetiya Beetele katamaa wochiya asata kiittidosona. 24 Enti katamaape keyiya issi addiya demmidi, “Katamaa giddo waanidi gelanaw danda7etiyako nuna bessa; nuuni new keehana” yaagidosona. 25 I enta bessin kataman de7iya asaa mashshan buthidosona; shin he addiyanne iya soo asa ubbaa ashshidosona. 26 Guype he addey Hiteta biitta bidi, yan katamaa keexidi Looza gidi sunthis. Hachi gakanaw he katamay he sunthan xeegetees.
27 Minaase kochati Beet-Saana, Tanaka, Doora, Yiblaama Magidonne enta yuushuwan de7iya gutatan de7iya asata gooddidi kessibookona. Yaatin, Kanaaneti yan duussu oykidosona. 28 Isra7eele asay minnida wode Kanaaneta bantaw wolqan oosisidosona; shin enta kumethi biittafe kessidi goodibookona. 29 Efreema kochatika Gezera kataman de7iya Kanaaneta gooddidi kessibookona; yaatin, Kanaaneti yan entara de7idosona. 30 Zabloona kochati Qitiroonaninne Nahilaalan de7iya asata gooddidi kessibookona; yaatin, Kanaaneti yan entara issife de7idosona. Shin Zabloona kochati enta bantaw wolqan oosisidasona. 31 Aseera kochati Akon, Sidoonan, Ahilaaban, Akziiban, Helban, Afeeqaninne Rehooban de7iya asata gooddi kessibookona. 32 Kanaaneti keyonna attida gisho Aseera kochati entara yan issife de7idosona. 33 Niftaaleme kochati Beet-Sameesaninne Beet-Anaatan de7iya asata gooddi kessibookona; shin Kanaanetara yan issife de7idosona. Beet-Sameesanne Beet-Anata asata bantaw wolqan oosisidosona. 34 Amooreti Daane kochata derey dariya biitta yedethidosona; enti demba biitta wodhonna mela teqidosona. 35 Amooreti Hereesa deriyan, Eloonaninne Sha7albiman duussu oykidosona; shin Yoosefa kochati minni minni bidi bantaw wolqan oosisidosona. 36 Amooreta biitta zaway Sela7a matan de7iya Akraabima pudetha keyees.