1 Iyyasuy Isra7eele asa ubbaa Seekeman xeegis. Cimata, halaqata, daynnatanne toora moconata xeegin, enti Xoossa sinthan shiiqidosona. 2 Iyyasuy asaako, “Goday Isra7eele Xoossay haysada yaagees; ‘Beni hinte aawati Efraxiisa shaafape hefinthan, hara xoossatas goyinnishe de7idosona. Entafe issoy Abrahaamenne Nakoora aawa Taara. 3 Shin hinte aawa Abrahaame, Efraxiisa shaafape hefinthan de7iya biittafe xeegada, Kanaane biittan kaalethas. Iya kochaa darsas; Yisaaqaka iyaw immas. 4 Yisaaqas Yayqoobanne Eesawe immas. Derey dariya Sayre biitta Eesawe laatisas, shin Yayqoobinne iya nayti Gibxe bidosona.

5 “ ‘Guyepe Musanne Aarona kiittada Gibxe biitta gadon shocas; wursethan hintena kessas. 6 Hinte aawata Gibxefe kessida wode Zo7o Abbaako bidosona. Gibxeti parataninne para gaaretan hinte aawata guye zaaranaw yedethidosona. 7 Enti taako waassida wode enta giddoninne Gibxeta giddon dhumaa yeggas. Yaatada, abbay enta bolla simmanaadanne enta mittanaada oothas. Taani Gibxeta bolla oothidaba hinte hinte ayfen be7ideta. Hinte mela biittan daro wode de7ideta. 8 Hessafe guye, Yordaanose shaafape doloha baggan de7iya Amooreta biitta hintena ehas. Enti hintena olidosona, shin ta hintew xoono immas. Ta enta dhaysin, hinte enta biitta laattideta. 9 Hessafe guye, Moo7abe biitta kawoy, Sifoora na7ay Balaaqi, dendidi, Isra7eeletara oletis. I hintena baaddana mela Bi7oora na7aa, Balaama xeegis. 10 Shin ta Balaama si7abike; I hintena anjana mela oothada, hintena Balaaqa kushiyape ashshas. 11 Hinte Yordaanose shaafa pinnidi, Iyaarko yideta. Iyaarko asay, Amooreti, Parzeti, Kanaaneti, Hiteti, Gergeseti, Hiwetinne Yaabuseti hintera oletanaw dendidosona, shin ta hintena xoonisas. 12 Yordaanose shaafape doloha baggan de7iya nam7u Amoore kawota bolla oothidaysada, kazhe kiittada entana hinte sinthafe goodda kessas. Hessi haniday, hinte mashshaana woyko hinte dongiyana gidenna. 13 Hinte qeexi kessiboonna biittanne hinte keexiboonna katamata taani hintew immin de7eeta. Ha77i hinte tokiboonna woyne ayfiyanne shamaho ayfiya meeta’ ” yaagees.

14 Qassika Iyyasuy kaallidi, “Godaa bonchite; polo ammanetethaninne suure wozanan iyaw kiitetite. Hinte mayzati Efraxiisa shaafape hefinthaninne Gibxen goyinnida eeqata aggidi Godaa goyinnite. 15 Hinte Godaa goyinnanaw koyonna ixiko, hinte aawati Efraxiisa shaafape hefinthan de7ishe goyinnida eeqata gidin, woyko ha77i hinte de7iya Amooreta eeqata gidin, hinte goyinnana Xoossa hachi doorite. Shin taani, ta soo asaara nu Godaa goyinnana” yaagis.

16 Asay zaaridi, “Godaa aggidi, hara eeqa xoossata goyinnanaysi nuupe haako. 17 Nu Godaa Xoossay nunanne nu aawata Gibxe aylletethaafe kessis; I oothida gita malaatata be7ida. Nu kanthidi aadhida biitta ubban Goday nuna naagis. 18 Goday Amooretanne he biittan de7iya hara kawotethata nu sinthafe gooddidi kessis. Hessa gisho, I nu Xoossaa gidiya gisho nu iya goyinnana” yaagidosona.

19 Iyyasuy zaaridi, “Goday geeshshinne qanaatiya Xoossi*Qanaatiya Xoossi: Xoossay ba bonchuwa haraara shaaketonna Xoossi woyko barka de7iya woyko dumma Xoossi gideysa bessanaasa. gidiya gisho, hinte iya goyinnanaw danda7eketa. I hinte naaquwa woyko hinte nagara atto geenna. 20 Hinte Godaas zoko zaaridi, eeqa xoossata goyinniko, I hintew kase lo77o gidikoka simmidi hintena qohananne dhaysana” yaagis.

21 Asay zaaridi, “Nu hara eeqa xoossata goyinnoko; nuuni Godaa, iya xalaala goyinnana” yaagis.

22 Iyyasuy, “Hinte Godaa goyinnana gidaysas hinte, hinte huuphen marka” yaagis.

Entika, “Ee nuuni marka” yaagidosona.

23 Iyyasuy zaaridi, “Hinte giddon de7iya eeqa xoossata diggite; hinte wozanaa Godaako, Isra7eele Xoossaako zaarite” yaagis.

24 Entika, “Nuuni Godaa, nu Xoossaa goyinnana; iya kiita naagana” yaagidosona.

25 He gallas Iyyasuy, Seekeman asay Xoossara caaqana mela oothis. Enti kaallana higgiya entaw giigisidi, 26 higge maxaafan xaafis. Hessafe guye, issi gita shuchi ekidi, Godaa dunkaaniya matan de7iya wolaa garsan essis. 27 Iyyasuy asaako, “Ha shuchaa be7ite; I nu bolla marka. Goday nuus odidaba ubbaa ha shuchay si7is. Hinte Xoossaa bolla makalliko, ha shuchay hinte bolla marka gidana” yaagis.

28 Yaatidi, Iyyasuy asaa ubbaa moyzis. Asa ubbay banta laata biitta simmidi bidosona. 29 Godaa aylley, Nawe na7aa Iyyasuy xeetanne tammu laythan hayqis. 30 Asay iya Ga7aasa zumaape pudeha baggan, derey dariya Efreeman de7iya iya laata biittan, Timnaat-Saaran iya moogidosona.

31 Iyyasuy paxa de7ida wode ubban Isra7eele asay Godaa goyinnidosona. Iyape guye, Xoossay Isra7eele asaas oothida ooso ubbaa banta ayfen be7ida cimata wode ubban Godaa goyinnidosona.

32 Isra7eele asay Gibxe biittafe eki keyida, Yoosefa meqethaa Seekeman moogidosona. He bessaa Yayqoobi Seekema aawa Hamoora naytape issi xeetu bira santimen shammis. He biitta guyepe Yoosefa kochay laattidosona.

33 Aarona na7ay Alaazari hayqidi, iya na7aa Pinihaasas imetida derey dariya Efreema biittan de7iya Gib7an moogetis.