1 Daro wode gakanaw Goday Isra7eele asaa enta yuushuwan de7iya morketape shempisis. He wode Iyyasuy cimin, laythi sugetis. 2 Iyyasuy, Isra7eele asa ubbaa, cimata, halaqata, daynnatanne toora moconata issife xeegidi, “Taani ha77i daro cimas. 3 Goday, hinte Xoossay ha biittan de7iya kawotethata oli xoonana mela waatidi hintena maaddidaako be7ideta. 4 Dolohan Yordaanose shaafa, wulohan Medetiraane abba gakanaw de7iya oyketida biittanne oyketonna biitta ubbaa hinte kochaas shaaka immas. 5 Goday, hinte Xoossay enta hinte sinthafe gooddidi kessana. Goday, hinte Xoossay hintew caaqidaysada hinte enta biitta laattana.

6 “Muse higge maxaafan xaafetida ubbaa minnidi naagitenne polite; iyape ushachi woyko haddirsi goopite. 7 Hinte giddon attida deriyara walaketofite. Enta xoossata sunthaa xeegopite woyko enta sunthan caaqofite. Entaw oothopite woyko entaw goyinnofite. 8 Shin hachi gakanaw hinte oothidaysada Godaa hinte Xoossaas ammanetite.

9 “Goday, gitanne mino kawotethata hinte sinthafe gooddidi kessis. Hintera hachi gakanaw oonika eqetanaw danda7ibeena. 10 Goday, hinte Xoossay hintew caaqidaysada, I hintew oletiya gisho, hintefe issi asi mukulu asaa yedethana. 11 Godaa, hinte Xoossaa ubba wode siiqite. 12 Shin hinte guye simmidi, hinte giddon attida deriyara walaketiko, hinte enta maccasa, qassi enti hinte maccasa ekidi entara qashetiko, 13 Goday, hinte Xoossay he deriya hinte sinthafe gooddidi kessonnaysa erite. Goday, hinte Xoossay hintew immida ha lo77o biittafe hinte dhayana gakanaw, enti hintew xihenne gite gidana. Enti hinte zokuwas lisso, hinte ayfiyas agunthu gidana.

14 “Ha77i ta hayqanaw matas. Goday, hinte Xoossay hintew immana gidi caaqida lo77oba ubbaafe issoyka attiboonaysa hinte ubbay, hinte wozananinne shempuwan ereeta. I hintew immana gidi caaqidabape issoyka attona ubbay poletis. 15 Goday, hinte Xoossay hintera caaqida caaquwa hinte menthidi, hara xoossatas oothikonne goyinniko, Godaa hanqoy hinte bolla eexana. 16 Goday, hinte Xoossay hintew immana gidi caaqida lo77oba ubbaa ashshona polidaysada, I hintew immida ha lo77o biittafe hintena dhaysana gakanaw iita ubbaa hinte bolla ehana. I hintew immida lo77o biittafe ellesidi hinte dhayana.”