1 Naa7odi hayqidaape guye Isra7eele asay Godaa sinthan zaaridi iitabaa oothidosona. 2 Hessa gisho, Goday Haxoora kataman de7iya Kanaane kawa Iyaabisas enta aathidi immis. Iya tora moconay Haroseeti Hagoyma kataman de7iya Sisaara. 3 Iyaabisas uddufun xeetu birata para gaareti de7iya gishonne I Isra7eele asaa qadhey bayna laatamu laythi un7ethida gisho enti maado demmanaw Godaako waassidosona.

4 He wode Lafidoota machiya, nabiya Diboora Isra7eele asaa kaalethawus. 5 Diboora derey dariya Efreema biittan, Ramapenne Beetelepe giddon de7iya Diboora zamba garsan uttada pirdawusu. Isra7eele asay pirda demmanaw iiko yoosona. 6 Issi gallas Diboora Abinooma na7aa Baaraqa Niftaaleme biittan de7iya Qaadesape xeegisada, “Goday Isra7eele Xoossay nena haysada yaagidi kiittis; ‘Niftaalemenne Zabloona zariyape tammu mukulu asaa ekada Taabore zumaa bolla keya. 7 Taani Yabina tora moconata Sisaari para gaaretanne olanchota ekidi, Qisoona shaafan nena olanaw yaana mela oothana. Yan taani new iya aathada immana’ yaagees” yaagasu.

8 Baaraqi, “Neeni taara biiko taani baana; shin neeni taara boonna ixiko taani biike” yaagis.

9 Iya zaarada, “Ero, taani neera baana; shin Goday Sisaara maccasa kushen aathidi immana gisho ta buussay new boncho gidenna” yaagasu. Hessa gisho Diboora dendada, Baaraqara Qaadesa basu. 10 Baaraqi Niftaalemenne Zabloona kochata Qaadesa xeegin, tammu mukulu asi iya kaallidi keyis; Dibooraka iyara basu.

11 He wode Qeena asi gidida Hebeeri, Muse bolloy, Hobaaba yaray hara Qeenatape shaaketidi Qaadesa matan Zenaanimen de7iya wolaa matan ba dunkaaniya tokis.

12 Abinooma na7ay Baaraqi Taabore zuma bidaysa Sisaari si7ida wode, 13 uddufun xeetu birata para gaaretanne baara de7iya asa ubbaa xeegisidi, Haroseet-Hagoymape Qisoona shaafa shiishis.

14 Yaatin Diboori Baaraqako, “Hachi Goday Sisaara ne kushen aathidi immiya gallas gidiya gisho denda. Heko, Goday new sinthe aadhis” yaagasu. Baaraqi tammu mukulu olanchota kaalethidi, Taabore zumaape wodhis. 15 Goday Sisaara, iya para gaaretanne iya olanchota ubbaa Baaraqa mashshas aathidi immis. Yaatin, Sisaari ba para gaariyape wodhidi tohon baqatis. 16 Baaraqi para gaaretanne olanchota Haroseet-Hagoyma gakanaw yedethis. Sisaara olanchoti ubbay mashshan hayqidosona; issi asika attibeenna.

17 He wode Haxoora kawoy Yaabini Hebeera keethaa asaara saro de7ees. Hessa gisho, Sisaari tohon baqatidi, Qeena asi gidida Hebeera mache Ya7eeli dunkaaniya gakis. 18 Ya7eela Sisaara mokanaw keyada, “Ta godaw, gela; haa gela; yayyofa” yaagasu. I dunkaaniya giddo iiko gelin iya afilara kammas.

19 Sisaari, “Tana saamees; haathe tana ushsharki” yaagis. Iya maatha ogoro dooyada ushshasu; yaatada zaarada kammasu. 20 Hessafe guye i, “Dunkaaniya pengen eqa. Ay asika yidi, ‘Haysan asi de7ii?’ yaagidi oychiko, ‘Baawa’ yaaga” yaagis.

21 Sisaari daro daaburida gisho dhisko hayqi aggis. Hebeera machiya Ya7eela naariqanne dunkaane dhishe ekada, loddara iyako shiiqada dhishiya haytha karen dhishada, sa7ara oythin Sisaari hayqis.

22 Baaraqi Sisaara koyishe yin, Ya7eela iya mokanaw kare keyada, “Haaya; ne koyiya addiya taani nena bessaana” yaagasu. Hessa gisho, iira dunkaaniya giddo gelidi, Sisaara haytha karen dhishey gelin iya ahay sa7an zin7idaysa be7is.

23 He gallas Xoossay Isra7eele asay Kanaane kawa Yabina xoonana mela oothis. 24 Yabina kawa dhaysana gakanaw Isra7eele asay iya bolla minni minni bis.