5
Xoono Gerersi
1 He gallas Dibooranne Abinooma na7ay Baaraqi ha mazmuriya yexidosona.
2 Halaqati Isra7eele asaa kaalethida gisho,
asayka bana aathidi immida gisho,
Godaa galatite.
3 Hinteno kawoto, si7ite;
Hinteno haareysato, hayzite;
Taani Godaas yexana.
Isra7eele Xoossaa galatana.
4 Abeeti Godaw, neeni Sayre zumaape dendiya wode,
Edoome biittafe ne keyiya wode,
biitti qaaxis; Salope iri bukis;
haathi shaarape goggis.
5 Siina Godaa,
Isra7eele Xoossaa sinthan,
dereti qaaxidosona;
6 Anaata na7aa Samgaara wodenne
Ya7eela wode ogey dogetis;
zal7anchoti yuusho ogera boosona.
7 Diboori Isra7eele asaas,
aayo gidada dendana gakanaw,
Isra7eele gutati baysatidosona;
8 Isra7eele asay allaga xoossata doorida wode,
biitta bolla oli dendis.
Oytamu mukulu Isra7eele olanchota giddon,
issi gondalley woyko issi toori bentibeenna.
9 Ta wozanay Isra7eele toora moconatara,
Asaa giddofe dosan bantana aathidi,
immidaysatara de7ees.
Godaa galatite;
10 Hinteno, bootha hareta toggeysato,
lo77o gilaasiya bolla uttidi dincaketeysato,
oge gaxara hemeteysato haysa si7ite.
11 Haatha ollata matan,
shiiqida asaa yetha si7ite.
Enti Godaa xoonuwa yexoosona;
Isra7eele asaa xoonuwa odoosona.
Hessafe guye, Godaa asay
katamaa pengetako wodhidosona.
12 Diboora, Denda! Denda!
Denda! Dendada mazmure yexa.
Abinooma na7aw, Baaraqa, denda!
ne di77idabaa ekada ya.
13 Hessafe guye, attida asati,
halaqatako wodhidosona.
Godaa asati oletanaw giigidi
Baaraqako yidosona.
14 Amaaleqa kochati beni de7ida bessan
de7iya Efreema asati yidosona.
Biniyaame asati enta kaallidosona.
Makirape halaqati,
Zabloonape kawotetha
xam7a oykeysati yidosona.
15 Yisakoora halaqati Diboorara de7oosona;
ee, Yisakoore asay Baaraqara yidosona;
enti iya kaallidi, zangaara gelidosona.
Shin Robeela kochati qofan shaaketidi,
banta wozanan heettidosona.
16 Enti ayis attidonaa?
Dorsata heemmanaseyee?
Robeela kochati qofan shaaketidi,
banta wozanan heettidosona.
17 Gaade kochati Yordaanose pinthan attis,
Daana kochati markabetan attidosona.
Aseera kochati banta de7iyason,
Abbaa gaxan attidosona.
18 Zabloona kochati,
bantana hayqos aathidi immidosona.
Niftaaleme kochati,
toora denban bantana aathidi immidosona.
19 Magido pultota matan Tanakan,
kawoti oletidosona.
Kanaane kawoti yan oletidi,
bira woyko haraba di77ibookona.
20 Salope xoolintoti oletidosona;
banta yuushan Sisaara olidosona.
21 Qisoona shaafay enta efis;
benipe de7iya Qisooni enta shokis.
Ta shempe, minna; sinthe hordofa.
22 Parati adarsishe yidosona,
banta tohuwan biitta giirsoosona.
23 Godaa kiitanchoy haysada yaagis;
“Merooza baaddite!
Yan de7iya asaa iissidi baaddite!
Enti Godaa maaddanaw yibookona;
iya wolqaama morketa olanaw keybookona.”
24 Qeena asi gidida Hebeera machiya,
Ya7eeli maccasa ubbaafe anjetidaaro gido.
Dunkaanen de7iya maccasa ubbaafe,
iya anjetidaaro gido.
25 Sisaari iyo haathe oychin maathi immasu;
lo77o ogoron meqida maathi ehasu.
26 Ba haddirsa kushen dunkaane dhishe,
ba ushacha kushen
oosanchota naariqa oykasu.
Sisaara huuphen dhishasu;
iya haytha karera kantha kessasu.
27 I tohuwa garsan kundis;
I tohuwa matan zohetis.
I tohuwa garsan kundis;
he kundida bessan hayqis.
28 Sisaara aayiya maskootera kare xeellasu;
“Ta na7aa para gaarey ayis gam7idee?
Parati ayis ellesidi simmibokona?”
yaagada bana oychasu.
29 I cinca maccasati I oysha zaaridosona;
shin iya ba qofan zaara zaarada yaagasu.
30 “Enti di77o demmidi shaaketonna aggokona;
Issi issi addes issi geela7oy woyko
nam7u geela7oti gakonna aggenna.
Enti Sisaaras lo77iya ma7o immana;
tawka qoodhen ma7iya,
alleeqetida ma7o ehana” yaagasu.
31 Abeeti Godaw, ne morketi ubbay haysada hayqo;
shin nena doseysati wonta xalqeda phoolo.
Hessafe guye, biittay oytamu laythi wopu gidi de7is.