1 Isra7eele asay Godaa sinthan qassika iitabaa oothidosona. Yaatin, Goday enta oytamu laythi Filisxeeme asaa kushen aathidi immis.

2 He wode Xor7a kataman Maanuhe geetetiya issi addey de7ees. I Daane koche; iya machiya maynthi gidida gisho iyaw na7a yelabuuku. 3 Issi gallas Godaa kiitanchoy he maccasees qoncidi, “Neeni maynthi; new na7i baawa; shin ne qanthatana; adde na7aka yelana. 4 Hessa gisho, woyne woyko mathoyiya ushshi uyonna melanne tunabaa aybaka moonna mela naageta. 5 Ne qanthatada adde na7a yelana. Na7ay yeletida wodiyape doomidi Xoossas dummatida Naazirawe gidiya gisho iya huuphiya meedopa. I Isra7eele Filisxeemeta kushepe asho doomana” yaagis.

6 Maccasiya bada, ba azinaas haysada yaagada odasu; “Issi Xoossa asi taako yis; iya medhoy Xoossa kiitancho mela daro yashshees. I awupe yidaako taani iya oychabike; ika ba sunthaa taw odibeenna. 7 Shin I taako, ‘Ne qanthatana; adde na7a yelana. Na7ay yeletida wodepe doomidi hayqana gakanaw Xoossas dummatida Naazirawe gidiya gisho woyne woyko mathoyiya ushshi uyopa; tunabaaka moopa’ yaagis” yaagasu.

8 Hessafe guye, Maanuhey, “Abeeti Godaw, na7ay yeletiya wode ay oothanaw koshshiyako erisana mela neeni kiitida Xoossa uray nuuko simmidi yaana mela ootharki” yaagidi Godaa woossis.

9 Xoossay Maanuhe woosa si7is. Machiya gaden uttidashin Xoossa kiitanchoy nam7antho yis; shin he wode I azinay Maanuhey iira deenna. 10 Machiya ellesada ba azinaako bada, “Heede taako yida addey hachi taw qoncis” yaagasu.

11 Maanuhey uttida bessaafe dendidi, ba machiw kaalli bidi uraako, “Ta machera odetiday nenee?” yaagidi oychis.

Uray, “Ee, tana” yaagis.

12 Maanuhey, “Neeni odida qaalay poletiya wode yeletana na7aa de7uwasinne oosuwas wogay aybee?” yaagidi iya oychis.

13 Godaa kiitanchoy, “Ne machiya taani odida ubbaafe naageto. 14 Woyne mithafe bentiyaba aybaka moopo; woyne woyko mathoyiya ushshi uyopo; tuna gididaba moopo. Taani iw odida ubbaa ootho” yaagis.

15 Maanuhey Godaa kiitanchuwako, “Nuuni new issi urge deeshi shukidi giigisana gakanaw hayyana guuthu gam7arki” yaagis.

16 Godaa kiitanchoy, “Taani gam7iyakoka ne kathaa miike. Shin neeni xuussa yarsho giigisanaw koyiko, Godaas yarshanaw danda7aasa” yaagis. I Godaa kiitancho gideysa Maanuhey eribeenna.

17 Maanuhey Godaa kiitanchuwako, “Neeni odida qaalay poletiya wode nuuni nena bonchana mela ne sunthay oonee?” yaagidi oychis.

18 Godaa kiitanchoy, “Ne ta sunthaa ayis oychay? Ta sunthay malaalseysa”*Malaalseysa: Ta suntha ne eranaw woyko oykanaw danda7onna gisho ta sunthay malaalseysa yaagidi iya sunthay malaalsiya ooson qonceysa bessis. yaagidi zaaris.

19 Maanuhey urge deeshinne katha yarshuwa ekidi shucha bolla Godaas yarshis. Maanuheynne iya machiya xeellishin, Goday malaalsiyaba oothis. 20 Yarsho bessaafe tama lacoy pude laxidi keyishin, Godaa kiitanchoy tama lacuwa giddora salo keyis. Maanuheynne iya machiya hessa be7idi som7ora sa7an gufannidosona. 21 Godaa kiitanchoy Maanuhesinne iya machees zaari bentonna aggin, maanuhey I Godaa kiitancho gididaysa he wode akeekis.

22 Maanuhey ba macheko, “Nuuni Xoossaa be7ida gisho hayqana” yaagis.

23 Shin iya machiya, “Goday nuna wodhanaw koydaba gidiyako, xuussa yarshuwanne katha yarshuwa nuupe ekenna woyko ha ubbaa nuna bessenna woyko haysa nuus odenna” yaagada zaarasu.

24 Machiya adde na7a yelasu; iya sunthaa Samsoona gada xeegasu. Na7ay diccis; Godayka iya anjis. 25 Na7ay Xor7afenne Eshta7oolape giddon de7iya Daane gutan de7ishin Godaa Ayyaanay iya denthetho doomis.