1 Issi gallas Samsooni Filisxeeme katama gidida Gaaza katamaa bis; Yan issi layma maccas be7idi iira aqanaw I soo gelis. 2 Gaaza katamaa asay Samsooni enta katamaa yidaysa si7idi keetha teqidi qamma kumethi naagishe katamaa pengiyan aqidosona. Sa7i wontiko wodhana gidi naagishe doona phuqona aqidosona. 3 Shin Samsooni yan gidi bilahe gakanaw gam7is. Bilahe dendidi katamaa dirsa pengiya, pengiya oykiya nam7u tuussatanne kobe biratata issife shoddis. He ubbaa hashen tookidi Kebroonape sintha baggara de7iya zumaa huuphe kessis.

4 Guutha wodepe guye Samsooni Soreqa zangaaran de7iya issi Dalilo geetetiya maccasiw dosis. 5 Filisxeeme halaqati iiko bidi, “Neeni iya cimmada, he wolqa ubbaa I awupe demmiyakonne nuuni iya waati xoonidi qachanaw danda7iyako oycha. Nuuni issoy issoy new tammanne issi kilo giraame bira santime immana” yaagidosona.

6 Hessa gisho Dalila Samsoonako, “Haysa mela minotethi ne awupe demmidaako, hayyana taw odarkii. Asi nena qachidi waatidi ne wolqaa daabursanaw danda7ii?” yaagasu.

7 Samsooni, “Tana laapun irxa dafora asi qachiko daaburada hara asada hanana” yaagidi zaaris.

8 Filisxeeme halaqati Dalilas laapun irxa dafota ehin iya Samsoona qachasu. 9 Qol7an ase qotta wothada, “Samsoona, Filisxeemeti yidosona” gada xeegasu. Shin shaloy tami oykin duuxereteysada dafota duuserethi yeggis. Ha77ika iya minotethaa xuuray eretibeenna.

10 Dalila Samsoonako, “Neeni tana eeya oothaasa; ne taw wordo odadasa. Ha77ika nena waati qachanaw danda7etiyako hayyana taw oda” yaagasu.

11 I zaaridi, “Asi go7etiboonna ooratha wodoron tana qachiko daaburada hara asada hanana” yaagis.

12 Dalila ooratha wodoro ekada Samsoona qachasu. Qol7an ase qotta wothada, “Samsoona, Filisxeemeti yidosona” yaagasu. Shin I wodoruwa ba qesiyape shaloda duuserethi yeggis.

13 Dalila Samsoonako, “Ha77i gakanaw ne tana cimmaasa; neeni taw wordo odadasa. Ha77ika nena waatidi qachanaw danda7etiyako hayyana taw oda” yaagasu.

I zaaridi, “Ta huuphiya laapun binaana dathata qacinara gathada, quxarada daddiko, taani daaburada hara asada hanana” yaagis.

14 Hessafe guye, Samsooni dhiskidashin, Dalila iya huuphiya laapun binaana dathata qacinara gathada dooqasu. Hessafe guye, “Samsoona, Filisxeemeti yidosona” yaagasu. I dhiskofe barkidi, ba binaanay dooqetidi toletida bessaafe shoddi ekis.

15 Yaatin iya, “Ne wozanay taara deenna, ‘Woygada ta nena dosayis’ gay? Heedzu toho tana cimmadasa. Neeni ha minotethaa awupe demmiyako taw oda” yaagasu. 16 Gallas gallas oychada I hayqo amottana gakanaw iya waaysasu.

17 Wursethan Samsooni, “Ta aaye ulope doomin taani Xoossaas dummatida Naazirawe gidida gisho, ta huuphe binaanay meedetidi erenna. Ta binaanay meedetiko, ta wolqay taape eketin, taani daaburada hara asada hanana” yaagidi, ba xuura ubbaa iw odis.

18 Ba wozanan de7iyaba ubbaa I odidaysa Dalila be7ida wode, “Ba wozanan de7iyaba ubbaa taw odida gisho, ane issi toho simmidi yiite” yaagada Filisxeeme halaqatas kiita yeddin enti bira ekidi iiko yidosona. 19 Dalila Samsoona ba wodire bolla dhiskisada issi asi xeegin yidi, iya huuphiya laapun datha binaana meedin iya wolqay iyape dhayis. Hessafe guye, iya waayso doomasu. 20 Iya, “Samsoona, Filisxeemeti yidosona” yaagasu.

I dhiskofe barkidi, kaseysada duuserethada baana yaagidi qopis; shin Goday iyape shaaketidaysa eribeenna.

21 Filisxeemeti iya oykidaape guye, iya nam7u ayfeta wooci kessidosona. Gaaza katamaa efidi naase birata santhalaatan qachidi qasho keethan kathi gaacisidosona. 22 Enti iya huuphiya binaana meedidaape guye, binaanay simmidi dolo doomis.

23 Filisxeeme halaqati, “Nu xoossay nu morkiya Samsoona nu kushen aathidi immis” yaagidi banta xoossaa Daagonas yarsho yarshanawunne ufaytanaw issife shiiqidosona.

24 Asi ubbay iya be7ida wode, “Nu biitta dhaysidanne nuupe darota wodhida nu morkiya, nu xoossay nu kushen aathidi immis” yaagidi banta xoossaa galatidosona. 25 Enti daro ufaytida gisho, “Duridi nuna ufaysana mela Samsoona xeegite” yaagidosona. Samsoona qasho keethafe xeegidi ehin, I enta sinthan duridaape guye tuussatape giddon essidosona.

26 Samsooni ba kushiya oykidi kaalethiya na7aako, “Taani entan zempada eqana mela keethaa tookida tuussata tana oytha” yaagis. 27 Keethaa giddon addeynne maccasi, hessadaka Filisxeeme halaqati ubbay kumidi de7oosona. Samsooni durishin, pooqiya bolla uttidi be7iya heedzu mukulu gidiya addeynne maccasi be7oosona.

28 He wode Samsooni, “Abeeti Ubbaa Haariya Godaw, tana qoparki. Abeeti Xoossaw, Filisxeemeti ta nam7u ayfeta kessida gisho, halo keyana mela tana issi toho mintharki!” yaagidi Godaa woossis. 29 Samsooni keethaa tookida giddo tuussata nam7aaka oykis. Issuwa ushacha kushen, issuwa, haddirsa kushen oykidaape guye, 30 “Taani Filisxeemetara issife hayqana” yaagidi waassis. Baw de7iya wolqa ubban sugin, keethay halaqata bollanne garsan de7iya asa ubbaa bolla kundis. Samsooni paxa de7ishe wodhida asaape hayqishe wodhida asay daro.

31 Iya ishatinne iya dabboti ubbay yidi, iya aha ekidosona. Xor7afenne Eshta7oolape giddon iya aawa Maanuhe duufuwan moogidosona. Samsooni Isra7eele laatamu laythi aysis.