15
Samsooni Filisxeemeta Halo Keyis
1 Guutha wodepe guye, giste caka wode Samsooni ba machiw be7anaw issi urge kole ekidi bis. Na7ee aawako, “Taani ta machiya de7iya kifiliya gelanaw koyayis” yaagis.
Shin I aaway I gelonnaada diggis. 2 I aaway Samsoonako, “Neeni iyo ixidaba daanin iyo ne laazanthas immas. Shin I, kaalo michiya iipe aadhada mala lo77o gidekee? Iyo eka” yaagis.
3 Samsooni, “Taani ha77i Filisxeeme asaa bolla iitabaa oothiko bala gidike” yaagis. 4 Hessafe guye, bidi heedzu xeetu workanata oykidi nam7aa nam7a goyna issife gathi qachidi goynatape giddon xompe wothidi qachis. 5 Xompiyan tama oythidi buroo caketiboona Filisxeemeta kathaa giddo workanata yeddis. Tamay caketida kathaa, eqon de7iya kathaa, woyniyanne shamahuwa mis.
6 Filisxeemeti, “Haysa oothiday oonee?” yaagidi oychidosona.
Asay, “Hessa oothiday Samsoona. Timina asi gidida iya bolloy, iya machiw iya laazanthas immida gisho hessa oothis” yaagidosona. Filisxeemeti bidi iyonne I aawa taman xuuggidosona.
7 Samsooni entako, “Hinte hessa oothida gisho ta halo keyonna aggike” yaagis. 8 I enta wolqaama iita shochi shocidi darota wodhis. Hessafe guye bidi, Etaama gongoluwan de7is.
9 Filisxeeme asay yidi Yihudan dunkaanidi Leha katamaa olis. 10 Yihuda asay, “Ayis nuna olanaw yidetii?” yaagidi oychidosona.
Enti, “Nuuni Samsoona oykidi qachanawunne I nu bolla oothidaysada iya bolla oothanaw yida” yaagidi zaaridosona. 11 Yaatin, Yihudape heedzu mukulu asay Etaama gongoluwa bidi, Samsoona, “Nuna haarey Filisxeeme gideysa erikii? Yaatin, nu bolla haysa mela palaba ayis oothay?” yaagidosona.
I zaaridi, “Enti ta bolla oothidaysada taanika enta bolla oothas” yaagis.
12 Enti zaaridi, “Nuuni yiday nena qachidi, Filisxeemetas aathidi immanaasa” yaagidosona.
Samsooni zaaridi, “Hinte nu nena wodhoko gidi taw caaqite” yaagis.
13 Enti, “Ero, nuuni nena qachidi entaw aathidi immanaape attishin, wodhoko” yaagidi zaaridosona. Hessa gisho, nam7u ooratha wodoron qachidi gongoluwape kessidi efidosona.
14 Samsooni Leha bida wode Filisxeemeti buraaqishe iyako yidosona. Godaa Ayyaanay iya bolla wolqan wodhis. Iya kushey qashetida wodoroy shaloy tama be7idi duuxereteysada duuxereti wodhis. 15 Mata wode hayqida hare gaco demmidi, iyara mukulu asi wodhis. 16 Samsooni,
“Hare gacon,
aha bolla aha dooras.
Hare gacon
mukulu asi wodhas” yaagis. 17 Haasaya wursidaape guye, ba oykida gacuwa holidi he bessaa Ramat-Leha*Ramat-Leha: Ha sunthaa birshethay “Gapata Dere” guussu. yaagidi xeegis.
18 Samsooni daro saamotidi, “Neeni haysa mela gita xoono taw ne aylliyas immadasa. Yaatin, taani ha77i saamon hayqo? Ha qaxaretonna asaa kushen wodho?” yaagidi Xoossaako waassis. 19 Xoossay Lehan de7iya aafo kakaa phalqin iyape haathi keyis. Samsooni he haatha uyidi alida wode iyaw shempoy simmis. Hessa gisho, he bessaa Ayn-Haqore†Ayn-Haqore: Ha sunthaa birshethay Xeegeyisata Pulto guussu. yaagidi xeegis. He bessay hachi gakanaw Lehan de7ees.
20 Filisxeemeti biitta haariya wode Samsooni Isra7eele laatamu laythi aysis.