1 Daanepe Barsaabe gakanaw Galadan de7iya Isra7eele asi ubbay issi asada Mixiphan Godaa sinthan issife shiiqidosona. 2 He shiiqida Xoossaa asaara, Isra7eele zare ubbaa halaqati de7oosona. Enta giddon mashshe dancidi oletanaw danda7iya 400,000 olanchoti de7oosona. 3 He wode Isra7eele asay Mixiphan shiiqidaysa Biniyaame asay si7idosona.

Isra7eele asay, “Ha iitabay waanidi hanidaako nuus odite” yaagidosona.

4 Hayqida laggethe azinay, Leewey, haysada yaagidi zaaris; “Taaninne ta laggethiya sa7i qammin aqanaw Biniyaame biittan de7iya Gib7a katamaa yida. 5 Gib7a katamaa asati tana wodhanaw yidi, keethaa yuushuwa teqidosona. Shin guyepe ta laggethera wolqan, taran taran gahetidi iyo wodhidosona. 6 Taani I aha ekada qanxerethas; enti ha iitabaanne yeellaba Isra7eelen oothida gisho Isra7eele asay de7iya biitta ubbaa issi issi qanxo yedas. 7 Hiza, hinte ubbay Isra7eele asi; zoretidi bessiya pirdaa immite” yaagis.

8 Asa ubbay issife dendidi, “Nu giddofe oonika ba dunkaaniya woyko ba keethaa guye simmenna. 9 Nuuni Gib7a bolla haysa oothana; saama yeggidi, Gib7a katamaa olanaw baana asata doorana. 10 Isra7eele zare ubbaafe ola biya asaas shinqe giigisana mela xeetape tamma, mukulaape xeetaa, tammu mukulaape issi mukula dooridi ekana. Attida olanchoti Biniyaame biittan de7iya Gib7a bidi, Isra7eele bolla haysa mela iitabaa oothida asaa bolla halo keyanaw boo” yaagidosona. 11 Isra7eele asa ubbay katamaa olanaw issife shiiqidosona.

12 Isra7eele kochati Biniyaame kocha ubbaas haysada yaagidi ase kiittidosona; “Hinte giddon hanida ha iitabay aybee? 13 Nuuni enta wodhidi, Isra7eelepe iitabaa dhaysana mela Gib7an de7iya he iita asata kessidi nuus immite” yaagidosona.

Shin Biniyaameti Isra7eele asay odidaysa si7onna ixidosona. 14 Enti Isra7eele asaara oletanaw banta katamatape keyidi issife Gib7an shiiqidosona. 15 He gallas Biniyaame katamatape yida mashshan oletiya laatamanne usupun mukulu olanchota shiishidosona. Hessika Gib7an de7iya asaa giddofe dooretida laapun xeetu asaape hara. 16 Ha olanchota giddofe laapun xeetu asati haddirsa kushen ootheyisata; enti yambarshan shuchu holidi, hari attoshin issi binaanaka balokona. 17 Biniyaame asaa gujonna, Isra7eele asay mashshan oletiya 400,000 olanchota shiishidosona.

18 Isra7eele asay dendidi, Beetele bidi, “Biniyaame asaa olanaw nuupe sinthatidi keyanay oonee?” yaagidi Xoossaa oychidosona.

Goday, “Yihuda kochay sinthatidi keyo” yaagis.

19 Wontetha gallas wonta guura Isra7eele asay dendidi Gib7a katamaa matan shiiqidosona. 20 Hessafe guye Isra7eele asay Biniyaame asaa olanaw bidi Gib7a katamaa matan salpidosona. 21 He gallas Biniyaame asay Gib7ape keyidi, Isra7eele asaape 22,000 olanchota wodhidosona. 22 Isra7eele asay issoy issuwa minthethin, koyro gallas enti olas salpida bessan nam7antho salpidosona. 23 Isra7eele asay bidi sa7i qammana gakanaw Godaa sinthan yeekidosona. Enti, “Nu ishatara, Biniyaame asatara oletanaw nam7antho keyino?” yaagidi Godaa oychidosona.

Goday, “Ee, entara oletanaw keyite” yaagis.

24 Isra7eele asay Biniyaame asaara oletanaw nam7antho shiiqidosona. 25 Nam7antho gallasika Biniyaame asay Gib7a katamaape keyidi, Isra7eele olanchotape mashshan oletiya 28,000 asaa wodhidosona.

26 Hessafe guye, Isra7eeleti ubbay Beetele bidi yeekidosona; yan xoomishe sa7i qammana gakanaw, Godaa sinthan uttidosona. Godaa sinthan xuussa yarshonne issifetetha yarsho shiishidosona. 27 He wode Xoossaa caaqo Taabotey Beetele kataman de7iya gisho Isra7eele asay Godaa oychidosona. 28 He wode Aarona na7ay, Alaazara na7ay Finihaasi kahinetethan oothees. Isra7eele asay, “Nu isha gidida Biniyaame asaara oletanaw keyinoye attino” yaagidi Godaa oychidosona.

Goday, “Bidi oletite; taani enta wonto hinte kushen aathada immana” yaagis.

29 Isra7eele asay guutha olanchoti Gib7a katamaa yuushuwan zugidi naagana mela oothidosona. 30 Heedzantho gallas Isra7eele olanchoti kaseysada Biniyaame olanchota olanaw bidi, Gib7a katamaape sintha baggara salpidosona. 31 Biniyaame asay entara oletanaw katamaape keyidi, enta kaalli keyidi haakidi bidosona. Kaseysada Beetelenne Gib7a efiya dalga ogetaninne dembatan Isra7eele asaape hastamu gidiya asaa wodhidosona. 32 Biniyaame asay, “Nuuni kaseysada enta xoonida!” yaagidosona.

Shin Isra7eele asay, “Enti katamaape haakidi, ogiya bolla keyana mela ane nuuni baqatoos” yaagidi woxidosona. 33 Isra7eele asa ubbay banta bessaafe dendidi, Ba7aal-Tamaara geetetiya bessan salpiya wode Gib7a denban zugidi uttida Isra7eeleti keyidosona. 34 Isra7eele asaape dooretida tammu mukulu asay Gib7a bolla ola denthidosona; olay daro wolqaamis. He ubbay haniya wode Biniyaame asaas dhayoy matidaysa eribookona. 35 Isra7eeleti Biniyaame asaa bolla xoono demmana mela Goday oothis. He gallas Isra7eele asay Biniyaame asaape mashshan oletiya laatamanne ichashu mukulunne issi xeetu olanchota wodhidosona. 36 Hessafe guye, Biniyaame asay xoonetidaysa eridosona.

Isra7eele asay Gib7a katamaa yuushuwan zugidi uttida olanchotan ammanetida gisho, Biniyaame asan xoonetidaba daanidi guye shiiqida gishosa. 37 Qosetidi naagiya olanchoti Gib7a katamaa ellesi woxi gelidi katamaa giddon demmida ubbaa wodhidosona. 38 Qosetidi naagiya asatinne Isra7eele asay cuyaa shaarada denthana mela kase zoreti uttidosona. 39 Ola denban de7iya Isra7eele asay baqateysa aggidi, guye simmidi, enta olidosona.

Biniyaame asay Isra7eele asaape hastamu gidiya asaa wodhidi, “Kaseysada ha77ika nu enta xoonida” yaagidosona. 40 Shin malla cuyay katamaape pude kessi doomis. Biniyaame asay guye xeelliya wode katamay taman xuugetin, cuyay pude keyeysa be7idosona. 41 Hessafe guye, Isra7eeleti Biniyaame asaa bolla guye simmidosona. Biniyaame asay wurana haneysa erida gisho dagammidosona. 42 Hessa gisho, enti Isra7eele asaa sinthafe bazzo simmidi baqatidosona; shin kessi ekanaw danda7ibookona. Katamatape keyida Isra7eele olanchoti gidduwan enta wodhi wursidosona. 43 Isra7eeleti Biniyaame asaa teqidi, Gib7a katamaape doloha baggara de7iya bessaa gakanaw yedethidi darota wodhidosona. 44 Yan Biniyaame asaape tammanne hospun mukulu mino olanchoti hayqidosona; 45 Entafe attidaysati guye simmidi, bazzuwa kanthidi, Irmoona zaallako baqatidosona. Isra7eeleti entafe ichashu mukulu asaa oge bolla wodhidosona. Entafe attidaysata Gidooma gakanaw yedethidi nam7u mukulu asaa wodhidosona. 46 He gallas Biniyaame asaape mashshan oletiya laatamanne ichashu mukulu mino olanchoti hayqidosona.

47 Shin usupun xeetu asati bazzuwa kanthidi, Irmoona Zaallako baqatidi, yan oyddu ageena gam7idosona. 48 Isra7eele asay attida Biniyaame asaako guye simmidi, addenne macca, naytanne mehiya ubbaa wodhidosona; heeran de7iya katamata ubbaa taman xuuggidosona.