1 Isra7eele asay Mixiphan shiiqida wode, “Nu giddofe oonika Biniyaame asas ba na7a macho immofo” yaagidi caaqi uttidosona. 2 Isra7eeleti Beetele katamaa bidi, yan sa7i qammana gakanaw Xoossaa sinthan uttidi, banta qaala dhoqu oothidi yeekidosona. 3 Enti, “Abeeti Godaw, Isra7eele Xoossaw, haysi Isra7eelen ayis hanidee? Hachi Isra7eele asaa giddofe issi kochay ayis pacidee?” yaagidosona.

4 Wontetha gallas guura dendidi, yarsho bessi giigisidi, xuussa yarshonne issifetetha yarsho shiishidosona. 5 Isra7eeleti, “Isra7eele zare ubbaafe Godaa sinthan shiiqiya bessaa yoonna kochay oonee?” yaagidi oychidosona. Enti hessa oychida gaasoy, “Mixipha kataman Godaa sinthan shiiqanaw yiboona asi oonika hayqo” yaagidi kase caaqida gishosa.

6 Isra7eele asay banta ishatas, Biniyaame kochatas qadhetidi, “Hachi Isra7eelepe issi kochay dhayis. 7 Nuuni nu macca nayta entaw immonna mela Godan caaqida gisho hayqope attida Biniyaame kochati macho ekana mela nuuni ay oothinoo?” yaagidosona. 8 Qassika enti, “Isra7eele kochatape Mixiphan Godaa sinthe yoonnay oonee?” yaagidi oychidosona. Galadan de7iya Yaabesa katamaape issi asika qangethi gathanaw yoonnaysa be7idosona. 9 Enti asa taybida wode Galadan de7iya Yaabesape issi asika bentibeenna.

10 Hessa gisho, maabaray 12,000 mino olanchota Galadan de7iya Yaabesa katamaa kiittidosona. Enti bidi, “Yaabesan de7iya maccasaanne nayta issuwaka ashshona mashshan buthite. 11 Hessada oothidi; addenne addera aqida macca ubbaa wodhite” yaagidi kiittidosona. 12 Yaabesa kataman de7iya asaa giddofe addera aqiboona oyddu xeetu geela7o macca nayta demmidosona. Enta Kanaane biittan, Seelon dunkaanida gutaa ekidi yidosona.

13 Hessafe guye, kumetha maabaray Irmoona Zaalla matan de7iya Biniyaame asaara sigetanaw cima yeddidosona. 14 Biniyaame asati simmidi yidosona. Isra7eele asay Yaabesa katamaape wodhonna ehida geela7o nayta entaw immidosona. Shin geela7ota tayboy addeta taybuwara ginibeenna.

15 Isra7eele kochata giddon de7iya issifetethay duuxana mela Goday oothida gisho asay Biniyaametas daro qadhetidosona. 16 Maabara cimati, “Biniyaame kochatape maccasi hayqidi wurida gisho, hayqope attida addetas nuuni maccas waatidi demmanee? 17 Isra7eele asaa giddofe qushetidi dhayonna mela Biniyaame kochatape attidaysata laattiya na7i daanaw koshshees. 18 Gidoshin, nuuni nu macca naytape entaw immanaw danda7oko. Isra7eele asay kase, ‘Ba na7a Biniyaame kochaas immiya uray baadetidaysa gido’ yaagidi caaqetidi uttidosona” yaagidosona.

19 Yaatin, cimati, “Heko, laythan laythan Seelon Godaa bonchiya ba7aaley matis” yaagidosona. Seeloy Beetelepe pudeha baggara, Laboonape dugeha baggara, Beetelepe Seekema efiya ogiyape doloha baggara de7ees. 20 Hessa gisho, cimati, Biniyaame asata haysada yaagidi kiittidosona; “Bidi woyne gade giddon qosetidi, 21 naagite. Seelo katamaa macca nayti ba7aale gallas karaabo oykidi, yexishenne durishe yaa wode hinte woyne gade giddofe keyite. Seelo macca naytape dafi ekidi, Biniyaame biitta efite. 22 Enta aawati woyko enta ishati nuuko maggannanaw yaa wode nuuni entako, ‘Hayyana, enta nuus immite; nuuni enta ola bessaafe un7ethidi ekibooko. Hinte dosidi immiboona gisho bala gideketa’ yaagana” yaagidosona.

23 Biniyaame asay Isra7eele cimati gidaysada oothidosona. Issoy issoy Seelon yexiya macca naytape baw macho dafidi ekis. Enti banta laata biitta simmidi, katamata zaari keexidi yan de7idosona. 24 He wode Isra7eele asay yaape laaletidi, issoy issoy ba kochaako, ba kochaakonne ba soo asaako bis.

25 He wode Isra7eele biittan kawoy baawa; asi ubbay baw lo77o daanidaba oothees.