Uruuti Maxaafa
Gaatha Qofa
Metoy, hayqoy, koshinne saamoy kumida Uruuti taarikey, iitatethinne geellatethi kumida ayseysata woden hanida taarike. Ba yeletethan Moo7abe biitta asi gidida Uruuta issi Isra7eele addiya macho. I azinay hayqida wode Uruuta ba azina aayes ammanetida maccasi. Hessadaka, Isra7eele Xoossas wolqaama siiqoy aqida maccasi gidasu. Isra7eele taariken allaga biittafe kawa Dawita sheeshan, guyepe Yesuusa yeleta susan, gelida maccasape issiniya Uruuto.
Ha qantha maxaafan, besse ekida caaqoy Uruuta Nuhaamira caaqida caaquwa. Hessika, Uruuta, “Taani neepe shaaketana melanne nena aggada guye simmana mela tana waaysopa. Neeni biya soo aw gidikoka taani baana; neeni de7iya soo awunka taani daana. Ne derey ta dere gidana, ne Xoossay ta Xoosse gidana. Ne hayqiya son ta hayqana, yan moogetana. Hayqope attishin, harabay tana neepe shaakiko, Goday tana pirdo” (1:16-17) yaagada caaqida caaquwa.
Wursethan, ba koyro azinaas dabbo gidida hara asi gelasu. He eko gelo taarikiyan, Isra7eele koyro kawo gidida Dawitas wogga aawa Isseye yelasu.
Maxaafa Ayfe Qofata
Nuhaama Uruutira Beeteleme simo (1:1-22)
Uruuta Boo7ezera gahetethi (2:1-23)
Nuhaama Uruutis qopida qofa (3:1-18)
Boo7ezi Uruuto machis (4:1-22)
1
Nuhaamonne Uruuto
1 Isra7eele biitta daynnati aysiya wode he biittan koshi keyis. Issi addey ba macheranne ba nam7u adde naytara Yihuda biittan Beeteleme katamape dendidi Moo7abe biitta guutha wode yan daanaw betis. 2 He addiya sunthay Abemeleke, iya mache sunthay Nuhaamo, iya nam7u adde nayta sunthay Mahaloonanne Kelewoona. Enti Yihuda Beetelemen de7iya Efraata yara. Enti Moo7abe bidi yan de7idosona.
3 Enti yan de7ishin Nuhaami azinay Abemelekey hayqin, iya ba nam7u naytara attasu. 4 He nayti Moo7abe biitta macca naytape Orfanne Uruuto geeteteyisata machidi, tammu laythi de7aape guye, 5 Mahalooninne Kelewooni nam7ayka hayqidosona. Nuhaama I azinaynne nam7u nayti hayqin barka attasu.
6 Iya Moo7aben de7ishin, Goday ba asa Isra7eeles keehidi kathi entaw immidaysa si7ada ba nam7u nayta machetara Moo7abe biittafe guye simmanaw dendasu. 7 Iya ba de7iya bessaafe nam7u ba nayta machetara guye Yihuda efiya oge bolla keyidosona.
8 Nuhaama ba nayta machetako, “Hinte ubbatika hinte aaye soo, aaye soo simmite. Hinte hayqidaysatasinne taw keehidaysada Goday hintew keeho. 9 Hinte gelana azinata son Goday hintew shempo immo” yaagada yeerada entana anjasu.
Entika banta qaala dhoqu oothidi yeekidi, 10 “Nuka neera ne asako baana” yaagidosona.
11 Shin Nuhaama entako, “Ta nayto hinte soo simmite. Hinte taara ayis beetii? Hintew azina gidana adde nayta hizape guye yelana daanii? 12 Ta nayto simmite, taani azina gelonnaada cimas. I wona taani yelana giyako ubba hachi qamma azina gelada adde na7a yeliyakoka, 13 hessati diccidi gakanaa gaso entana naaganeyee? Enta gisho gidi azina gelonna attanayee? Ta nayto, hessi hanonnaba gideysa hinte ereeta. Goday tana un7ethida gisho hintefe ta aadho cametas” yaagasu.
14 Hessan enti banta qaala dhoqu oothidi darsi yeekidosona. Orfi ba azina aayiw yeerada guye simmasu. Shin Uruuta iipe shaaketike gada ganta kana shasho gidasu.
15 Nuhaama zaarada, “Be7a, ne azina isha machiya ba asaakonne ba xoossatako simmasu, neka iira simmada ba” yaagasu.
16 Shin Uruuta zaarada, “Taani neepe shaaketana melanne nena aggada guye simmana mela tana waaysopa. Neeni biya soo awu gidikonne ta baana, neeni de7iya soo awunka taani daana. Ne derey ta dere gidana, ne Xoossay ta Xoossa gidana. 17 Ne hayqiya son ta hayqana, yan moogetana. Hayqope attishin, harabay tana neepe shaakiko, Goday tana pirdo.” 18 Uruuta iira baanaw qanxidaysa Nuhaama erada si77i gasu.
19 Yaape nam7u maccasati Beeteleme gakanaw bidosona. Bidi enti Beeteleme gakida wode he katama asa ubbay entaban malaaletidosona. Qassi maccasay, “Hanna Nuhaamo?” yaagidosona.
20 Iya zaarada ubba danda7iya Xoossay ta de7uwa daro camethida gisho, “Tana Nuhaamo goopite; ‘Maara’ giite. 21 Taani kumethi keyada bas, shin Goday tana mela kushe zaaris. Goday tana kawushshis; ubbaa danda7iya Xoossay tana un7ethis. Tana ayis Nuhaame gidi xeegetii?” yaagasu.
22 Hessada hanada Nuhaama ba na7aa mache Moo7abe Uruutira simmasu. Enti Beeteleme gakiday bangi buroo caka doometiya wodena.