1 Nuhaamis I azina Abemeleke baggara dabbothiya, Boo7eza geetetiya issi eretida dure addey de7ees. 2 Issi gallas Moo7abe Uruuta Nuhaamo, “Taw qadhetiya asi kaallada budhe qoranaw kathi cakiya bessi boosha?” yaagasu.

Iyaka, “Ee ta naate ba” yaagasu.

3 Hessa gisho, Uruuta bada katha cakiya asa geeduwaape budhe qoro doomasu. Piko mela budhiya qoriya gadey Abemeleke dabbuwa Boo7eza gade gidis. 4 Heko, guutha wodepe Boo7ezi Beetelemepe gade bidi, kathi cakiya asaa, “Godi wolqa immo” gidi sarothis.

Enti zaaridi, “Godi anjo” yaagidosona.

5 Yaatin, Boo7ezi kathi cakeyisata kaapuwa, “Hanna na7atetha maccasiya oonee?” yaagidi oychis.

6 Katha cakeyisata kaapoy zaaridi, “Hanna yegelsiya Nuhaamira Moo7abe biittafe yida Moo7abe maccasi. 7 Iya tana, ‘Katha cakeyisata geeduwa kaallada mirqiya giddofe budhe qoro?’ gada oychasu. Ha77i buroo shempanaw uttawus; wonta guura yoodepe hano gakanaw haysan qorashe gam7asu” yaagis.

8 Boo7ezi Uruuto, “Ta naate si7a; hizape budhe qoranaw hara gade boopa. Qassi haysafe awuka qaaxofa. Ta macca aylletara haysan pee7a. 9 Asay kathi cakiya bessaa xeella xeellada macca aylletara gidada enta geedo kaallada qora. Adde aylleti nena bochonaada taani entaw odas. Qassi nena saamiko, adde aylleti tikidi wothida haathaafe paqada uya” yaagis.

10 Uruuta shoca ziggada, “Taani allaga gidikina? Neeni haysa mela taw qadhetiday aybise?” yaagasu.

11 Boo7ezi zaaridi, “Ne azinay hayqosaape doomin, neeni ne azina aayes oothidaba ubba, neeni ne aayiw, ne aawanne ne yeletida biitta aggada, ne eronna deriyara daanaw yidaysa taani geeshshada si7as. 12 Neeni oothidabaas Godi new kushe zaaro. Neeni iya qefiya garsan attana gada yida, Isra7eele Goday Xoossay new kumethaba immo” yaagis.

13 Uruuta, “Ta godaw, neeni taw daro qadhetadasa; taani ne aylletape issiniwuka gakike, shin taw keehaba hasayada, tana minthethadasa” yaagasu.

14 Quma miya wode Boo7ezi, “Haa shiiqa; uythu ekada woyniyan tushada ma” yaagis. Iyaka katha cakiya asa matan uttasu. Boo7ezi iw banga shaashshi immis; iya mada kallin kathay gididi palahis.

15 Iya budhe qoranaw dendiya wode, Boo7ezi ba aylleta, “Mirqiya giddofeka iya qoriko iyo yeellayopite. 16 Ubbaka mirqiyaafe shoddidi iw yeggite iya eko; iyo kaccofite” yaagis.

17 Hessan Uruuta omarsi gakanaw qorasu. Iya qora pe7idaysa qoxin, tammu kilo giraame banga gideysa ekasu. 18 Iya he katha ba77a ekada katama simmasu; iya ay mela qoridaako ehada ba azina aayiw bessasu. Qassi iya mishin attida kathi ehidaysa kessada iw immasu.

19 I azina aayiya, “Hachi haysa awupe qoradii? Awun ootha pee7adii? New haysada keehida uray anjeto” yaagasu.

Yaagin Uruuta iya ba ootha pee7ida gadiya godaaba ba azina aayes odasu. “Taani hachi oothada pee7ida gadiya godaa sunthay Boo7eza geetetees” yaagasu.

20 Nuhaama zaarada, “Hayqidaysatasinne de7on de7eysatas ba keehatetha aggiboonna Goday iya anjo” yaagasu. Gujadaka, “Ha addey nuus mata dabbo; nuna ubba wozanaw gathiya asatape issoy iya” yaagasu.

21 Moo7abe Uruuta, “I tana, ‘Ta kathay caketidi wurana gakanaw, ta oosanchotape shaaketonashin yada budhe qora’ yaagis” yaagasu.

22 Nuhaama ba na7a mache Uruutiko, “Ta naate, tumaka Boo7eza gadiyan oothiya maccasatara biiko new lo77o. Hara asa gade biiko nena metoothana” yaagasu.

23 Hessa gisho, bangaynne gistiya cakay wurana gakanaw Uruuta Boo7eza macca aylletako shiiqada, budhiya qorashe gam7asu. Qassi ba azina aayera issife de7asu.