Ermiyaasa Maxaafa
Gaatha Qofa
Ermiyaasi, K.Y.S. 600 laytha heeran de7ida nabe. Ermiyaasa maxaafan qoncidi odetiday: Yerusalaame dhayo, xoossa keetha dhayonne aysiya daro asay di7etidi Babiloone baanaysa (shem 39, 52). Babiloone kawoy Yerusalaame katamanne xoossa keetha wursethi dhaysanape sinthe, Ermiyaasi Yerusalaamen de7is.
Ermiyaasi, daro wode eeqa goyinnonne enta nagara gaason Xoossa asaa bolla dhayoy yaanaysa odees. I odida tinbitetape baggati poletin, Ermiyaasi ba ayfen be7is. Leemisos, Babiloone kawoy Nabukadanaxoori Yerusalaame oykidi, katamanne xoossa keetha laallees; Yihuda kawoy daro asaara di7etidi Babiloone bidaysa be7is. Gujidika, asay di7ope simmanaysanne Isra7eele kawotethay simmidi eqanaysa Ermiyaasi sinthatidi odis.
Ermiyaasi di7etidi Babiloone bibeenna (shem 40), shin Godoliya hayqidaape guye (shem 40—41), issi issi Yihuda asay iya wolqan Gibxe efin (shem 42—43), yan guutha wode de7is.
Ermiyaasika Hizqeelada Xoossafe ekida ba kiita mallaninne leemison odees. Danco shamo, he dancuwa moogo, qassi bookidi keso (13:1-11); macho ekona mela digetethi, asaara yeeho yeekona mela digetethi (16:1-9), xugga shamonne Isra7eele cimata sinthan mentho (19:1-13); qambara gannan aathidi tooho (shem 27—28); ola wode gade shamo (32:6-15); Rakaaba yarati woyne ushshu uyona ago (35:1-19).
Ermiyaasa maxaafa oyddu kifilen shaakidi be7anaw danda7etees.
1. Iyosyaasa, Iyo7aaqeme, Yo7akinanne Sedeqiyaasa kawotethaa laythan Yihuda asaasinne enta kaalethiya asaas Xoossafe imetida qaala (shem 2—25).
2. Dumma dumma tinbite qaalata, Ermiyaasa de7uwan poletida gita gita qofata, Ermiyaasa xaafey Baaroki xaafidi oykida guutha xuufeta (shem 26—45).
3. Dumma dumma allaga biitta asaas Xoossafe kiitetida tinbiteta (shem 46—51).
4. Yerusalaame oyketethanne asay di7etidi Babiloone baanaysa odiya taariketa (shem 52).
Ermiyaasi asaa bollanne biitta bolla dhayoy yaanaysa odida wode kawoynne kahineti iya boridosonanne wogi bayna goodidosona (11:18-23; 18:18; 20:1-3; 26:1-19; 37:13—38:6). Ermiyaasi, asay Xoossara gelida caaquwa minthidi naagana mela odees (shem 30-33). Hizqeela mela Ermiyaasika kahinenne nabe.
Ermiyaasi ba asaa daro dosiyanne enta bolla iita pirdi yaana mela koyonna asi. Xoossay, I nabe gididi haggaazana mela xeegida wode I un7etidaysa bessiya xuufeti maxaafa giddon daro bessan qoncis. Xoossaa qaalay iya wozana giddon tamada eexiya gisho, I kammidi ashshanaw danda7ibeenna.
Ha maxaafan xaafetida gita gita tinbitetape issoti issoti metoy kumida Ermiyaasa wodiyape aadhidi, Xoossay immiya ooratha caaqoy poletiya wodiya sinthe xeelloosona. He wode ooratha caaqoy asaa wozanan xaafetiya gisho, akeekisiyanne naagisiya astamaare koshshenna. (31:31-34).
Maxaafa Ayfe Qofata
Ermiyaasa xeegetethinne dooretethi (1:1-19)
Yihudanne Isra7eele bolla odetida pirda (2:1—25:38)
Wordo nabetanne Ermiyaasa (26:1—29:32)
Ooratha caaquwan asay banta biitta simmana (30:1—33:26)
Ermiyaasa dumma dumma haggaazota (34:1—38:28)
Yerusalaamenne haariya Godoliya kundethi (39:1—42:22)
Ermiyaasi Gibxe biittan (43:1—44:30)
Ermiyaasi Baarokas ufaysa qaala immis (45:1-5)
Yihuda yuushon de7iya kawotethata (46:1—51:64)
Yerusalaame kundethaba odetida hara kiita (52:1-34)
1
1 Biniyaame biittan, Anatoota kataman de7iya kahinetape issuwa gidida Kalqe na7aa Ermiyaasa qaalay haysa. 2 Amoone na7ay, Yihuda kawoy Iyosyaasi kawotida tammanne heedzantho laythan Godaa qaalay Ermiyaasako yis. 3 Iyosyaasa na7ay, Yihuda kawoy Iyo7aqeemi kawotida laythatan Godaa qaalay Ermiyaasako yis. Qassi Iyosyaasa na7ay, Sedeqiyaasi kawotin, tammanne issi laythi gakanawunne, ichashantho ageenan Yerusalaame asay di7etidi bida wodiya gakanaw Godaa qaalay iyako yis.
Ermiyaasa Xeegetethaa
4 Godaa qaalay taako haysada yaagishe yis: 5 “Neeni ne aaye ulon medhetanaape sinthe ta nena erayis. Ne yeletanaape sinthe ta nena dummayada wothas; kawotethatas nena nabe oothada shuumas” yaagis.
6 Taani, “Ubbaa Haariya Godaw, taani na7a gidiya gisho waatada odetaneko erike” yaagas.
7 Shin Goday, “ ‘Taani na7a goopa’; taani nena kiittiya bessaa bada ta kiita ubbaa asaas oda. 8 Taani nena ashshanaw neera de7iya gisho entaw yayyofa. Haysa odey Godaa” yaagis.
9 Goday ba kushiya yeddidi, ta doona bochidi, “Heko; taani ta qaala ne doonan wothas. 10 Shoddanawunne laallanaw, dhaysanawunne shira yegganaw, keexanawunne tokanaw, asaa bollanne kawotethata bolla ta nena hachi shuumas” yaagis.
11 Godaa qaalay taako, “Ermiyaasa, neeni ay be7ay?” yaagis.
Taani zaarada, “Lawuze mitha xam7a be7ayis” yaagas. 12 Goday, “Neeni like be7adasa. Taka ta qaala polanaw haysada be7ayis” yaagis. 13 Zaaridi Goday, “Haraa ay be7ay” yaagis.
Taani zaarada, “Issi pentiya xaaroy pudeha baggafe issi bagga gedi gidi uttidaysa be7ayis” yaagas.
14 Goday, “Pudeha baggafe dhayoy podhidi, biittan de7iya asa ubbaa bolla gukana. 15 Taani pudeha bagga kawotethatan de7iya asa ubbaa xeegana hanayis. Enta kawoti yidi, Yerusalaame geliya pengetan, dirsa yuushuwaninne Yihuda katamata ubban banta araata wothana. 16 Yihuda asay tana aggidi, iita oothida gisho, hara xoossatas ixaane cuyisida gishonne banta kushen oothida xoossata goyinnida gisho ta pirdaa enta bolla ehas.
17 “Shin neeni giigeta! Dendada taani nena kiittiyaba ubbaa entaw oda. Entaw yayyofa; ne entaw yayyiko, ta nena enta sinthan gujada yashisana. 18 Hachi ta nena ha biitta bolla, Yihuda kawota bolla, halaqata bolla, kahineta bollanne ha asaa bolla gimbetida katamada, birata tuussadanne naase biratan dirida dirsada oothada minthas. 19 Enti neera oletana; shin ta ashshanaw neera de7iya gisho nena xoonokona. Haysa odey Godaa” yaagis.