1 Godaa qaalay taako haysada yaagishe yis: 2 “Bada Yerusalaame asa haythan haysada yaagada awaaja. Ne na7atethan taw ay mela ammanetidako, ne buroo meddan de7iya wode tana ay mela siiqidaako, ta akeekayis. Neeni mela biittan zerethi zereti eronna biittan tana kaalladasa. 3 He wode Isra7eeley Godaas geeshshi; iyaw bayra katha mela. Iyape mida ubbay bala gidoosona; enta bolla dhayoy yis. Hessa odey Godaa” yaagees.

4 Hinteno, Yayqooba nayto, Isra7eele zare, ubbay Godaa qaala si7ite! 5 Goday yaagees; kase hinte aawati taape ay bala demmidi taape haakidi bidonaa? Enti pathonna eeqata goyinnidi pathonnaba gididosona. 6 Enti, “Nuna Gibxefe kessida, mela biittan kaalethida, aaforanne mela biittara aathida, koshinne sakana dhumi de7iya biittara pinthida, oonika aadhonanne de7onna bessara kaalethida Goday awun de7ii?” yaagidi oychibookona. 7 Hinte he biitta ayfiyape lo77uwa maana mela ta hintena aradda biitta ehas. Shin hinte yidi, ta biitta tunisideta; ta laata iisideta. 8 Kahineti, “Goday awunee?” yaagidi oychibookona. Ta higgey enta kushen de7iya asati tana eribookona. Deriya ayseysati ta bolla makallidosona. Nabeti Ba7aale eeqa sunthan tinbite odidi pathonna eeqata goyinnidosona.

9 “Hessa gisho, ta hintera buroo mootetana; hinte nayta naytara mootetana. 10 Ane wuloha bagga bidi, yuushoy abban teqetida biitta Qophiroosa xeellite; doloha bagga bidi Qedaare biitta ase kiittidi xomoosite. Haysa melabay haysafe kase hanidaako be7ite. 11 Enti tuma xoossata gidonna ixikoka ba xoossata laammida derey oonee? Shin ta asay entaw boncho gidida tana pathonna eeqatara laammis.”

14 “Isra7eeley shametida aylleyee? woyko son yeletida aylleyee? Yaatin, morketi ayis do7oda shankatoona? 15 Iya morketi gaammoda iya bolla gudoosona. Enti banta qaala dhoqu oothidi daarosona. Enti iya biitta kaysi kessidosona; iya katamati laaletidi asi bayna soo gididosona. 16 Hesaa bollaka Mempisanne Xafinaasa asati iya huuphiya meedidosona. 17 Neno Isra7eele, oge ubban nena kaalethiya, Godaa ne Xoossaa aggada haysa ne bolla ehiday nena gidikii? 18 Nayle shaafape haathe uyanaw Gibxe buussi nena ay maaddanee? Efraxiisa shaafape haathe uyanaw Asoore buussi nena ay maaddanee? 19 Hiza ne iitatethay nena seerana; ne tana kaddidaysi ne bolla pirdana. Ne tana Godaa ne Xoossaa aggidaysi ay mela iitanne camo gidiyako akeeka be7a. Ne taw yayiya yashshay baawa” yaagees Goday, Ubbaafe Wolqaama Xoossay.

20 “Ta ne qambara daro wodepe kase menthas; ne qashuwa duuthas. Neeni, ‘Ta nena goyinnike’ yaagadasa. Dere bollanne daashsha mitha garsan laymatanaw zin7adasa. 21 Ta nena dooretida zerethafe ekada, lo77o woyne gaden tokas. Yaatin, waanada, guye simmada, woran dolida, iita woyne gidadii?” yaagees Goday.

22 “Ne sangeenora meecetiyakoka, saamunan gorpetiyakoka ne qitay ta sinthana. 23 Neeni waanada, ‘Ta tunabike; Ba7aale eeqa goyinnabike’ gay? Neeni zangaaran hanidaba xeella; ne oothidaba akeeka. Neeni yaanne haanne woxiya ziita keyida gimale mela. 24 Neeni bazzo meezetida, ziita wode carko singethiya hare mela. I amoy dendin, ooni iyo teqanaw danda7ii? Iya baw koyada gakiya gisho ay adde hareyka iyo demmanaw daaburenna. 25 Neno, Isra7eele, ne caammay wurana gakanaw ne kottonoy melana gakanaw hara xoossata geedo woxofa. Shin neeni, ‘Atto, hessi tana maaddenna. Taani imatha xoossata dosas; taani enta goyinnana’ yaagadasa.

26 “Kaysoy oyketida wode yeellateysada Isra7eele asay yeellatidosona; enti, enta kawoti, enta halaqati, enta kahinetine enta nabeti ubbay yeellatana. 27 Enti mithaako, ‘Ne ta aawa’ yaagosona; shuchaa, ‘Tana ne yeladasa yaagosona. Enti banta som7uwa aggidi, banta zokuwa zaaridosona. Shin enti meto wode nuna ashsha!’ yaagosona. 28 Shin hinte, hintew medhida xoossati awun de7oona? Hinte meton geliya wode hintena ashshanaw danda7iko dendidi hintena asho. Hinteno, Yihuda asaw, hinte xoossati hinte katamata mela daro” yaagees Goday.

29 “Hinte taara ayis mootetetii? Hinte ubbay taw makallideta. 30 Ta hintena coo seeras; hinte hinte oosuwape simmiyaba gideketa. Koshatida gaammoda hinte mashshay hinte nabeta mis” yaagees Goday.

31 Hinteno, ha wodiya yeletaw, Godaa qaala si7ite. Ta Isra7eeletas bazzo woyko sakana dhuman de7iya biitta gidadinaayee? Yaatin, ayis ta asay, “Nuuni nu sheneda baana; neeko simmoko” yaagidona? 32 Geela7iya ba alleequwa, mushuriya ba ma7uwa dogay? Shin ta asay tana tayboy bayna gallas dogidosona. 33 Neeni ne laggethota geedo wothaa waanada meezetadii? Daro iita maccasati ne ogiya tamaarosona. 34 Menthidi gelishin oykida asaa suuthan gidonashin xillo manqota suuthan ne ma7oy iitis. Neeni hessa ubbaa oothadaka, 35 Neeni, “ ‘Taani xillo; tuma Goday ta bolla hanqetenna; taani nagara oothabike’ giya gisho ta ne bolla pirdana. 36 Neeni ne ogiya laammashe ayis woxay? Nena Asoorey yeellaydaysada Gibxey yeellayana. 37 Goday ne ammaneteyisata kawushida gishonne ne entafe maade demmonna gisho ne huuphiya oykada yaape keyana” yaagees Goday.