1 Goday yaagees, “Isra7eele asaw, simmiko, taako simmite. Hinte tana shaatiya hinte eeqata ta sinthafe diggiko, ta ogiyape kare keyonna ixiko, 2 tuman, suuretethaninne xillotethan, ‘De7o Xoossay eriya mela’ gidi caaqiko, he wode kawotethati iyan anjetananne iyan ceeqana.”

3 Goday Yihudanne Yerusalaame asaako haysada yaagees: “Hinte othe biitta goyite; aguntha bolla zeropite. 4 Hinteno, Yihudanne Yerusalaame asaw, hinte Xoossaas qaxaretite; hinte wozanaa shoohuwa diggite. Hessi hanonna ixiko hinte iitatethaa gisho, ta hanqoy tamada eexana; iya oonika toysanaw danda7enna” yaagees Goday.

5 Yihudan awaajite; Yerusalaamen moyze punnite! Hinte qaala dhoqu oothidi haysada gidi waassite! Issife shiiqidi gimbetida katamatako yedhite. 6 Asay Xiyoone baana mela mallite! Hinte shempuwa ashshanaw gam7onna baqatite! Gam7ofite! Ta pudeha baggafe gadonne dhayo biitta bolla ehana hanayis. 7 Gaammoy worape keyeysada kawotethata dhayseysi ba bessaafe dendidi hinte biitta dhaysanaw yis. Hinte katamati laaletidi baysa gidana. 8 Hessa gisho, kayo ma7o ma7idi, “Woo! Woo!” gidi zeleelitenne yeekite. Godaa suulliya hanqoy nu bollafe kichibeenna.

9 “He wode kawanne halaqata wozanay til7ana; kahineti dagammana; nabeti hirgana” yaagees Goday.

10 Taani, “Ubbaa Haariya Godaw, mashshi enta qoodhen wodhiya wode ‘Hintew sa7i saro gidana’ yaagada ha asaanne Yerusalaame ayis cimmay” yaagas.

11 He wode ha asaasinne Yerusalaames haysada yaagidi odetana: “Mela biittan de7iya aykoy bayna dhoqa deretape michiya carkoy ta asaa bolla carkana; hessi kathi geeshshanaasa gidenna. 12 Ta kiitan wolqaama carkoy carkana; ta enta pirdana” gees.

13 Heko, morkey shaarada keyees. Iya para gaareti gote mela; iya parati arganthafe aadhidi eesotoosona. Nuna ayye! Nu dhayida!

14 “Neno Yerusalaame, attana mela ne wozanaa meeccada iitatethaafe geeya. Iita qofay ne wozanan awude gakanaw gam7anee? 15 Daane katamaapenne Efreema zumaape yidaysati iitabaa awaajosona. 16 Yihuda katamata bolla ola awaajiya olanchoti haaho biittafe yuussaa bolla de7oosona gidi kawotethatas odite; Yerusalaameska awaajite. 17 I ta bolla makallida gisho, gaden de7iya kathaa naageysada olanchoti Yihuda yuushuwa teqana” yaagees Goday.

18 Yihuda asaw, hinte hanoynne hinte oosoy haysa ubbaa hinte bolla ehis. Haysi hintew seera. I ay mela cammi! Hinte wozanaa ay mela caddi!

19 Tana ayye! Ta haysa waata danda7ane! Ayye ta wozanaa! Ta wozanay kokorees; ta si77i gaanaw danda7ike. Taani moyze punonne ola girsi si7ida gisho si77i gaanaw danda7ike. 20 Dhayoy dhayo bolla yees; biittay kumethi dhayis. Ta dunkaaney kundis; ta shaqarayka laaletis. 21 Taani awude gakanaw ola malla be7anee? Awude gakanaw moyze puno si7anee?

22 “Ta asay eeya; enti tana erokona. Enti qofi bayna nayta mela; entaw akeeki baawa. Enti iitabaa oothanaw cinca; shin lo77oba oothidi erokona” yaagees Goday.

23 “Taani sa7aa be7iya wode, sa7i aykoyka bayna baysa gididaysa be7as. Qassi salota xeelliya wode, poo7oy baynaysa xeellas. 24 Ta dereta xeelliya wode enti qaaxoosona; taani zumata be7iya wode yaa haa woxoosona. 25 Ta xeelliya wode asi baawa; salo kafoti ubbay paallidi baqatidosona. 26 Ta xeelliya wode aradda biittay qaa7e gididaysa be7as. Godaa sinthaninne iya suulliya hanquwa sinthan he biitta katamati laaletidosona.

27 “Biittay dhayana; shin ta iya kumethi dhaysike. 28 Sa7ay yeekana; saloy dhumana. Taani odas; marsike. Taani qofa qachas; aggike” yaagees Goday.

29 Para asatanne donge asata waasuwan, asay katama ubbaafe baqatana. Baggati woxidi wora gelana, baggati zaalla bolla keyana. Katama ubbay baysi gidin de7iya asi dhayana.

30 Neno, dhayos attidaare ne waanay? Ne zo7o ma7uwa ayis ma7adii? Worqa alleeqo ayis wothadii? Ne ayfiya siphintha ayis tiyay? Neeni coo nena loythaasa; ne laggethoti nena kadhidosona; enti nena wodhanaw koyoosona. 31 Taani iqethi oykida maccasi waassiya waasuwa mela si7as. I waasoy koyro na7a yeliya maccasa waaso mela. He waasoy, Yerusalaamey shempo dhayada, ba kushiya miccada, “Tana ayye! Ta dhayas! Tana wodhanaw hanoosona!” yaagada waassiya waasuwa.