1 “Ane Yerusalaame ogiya bolla keyite; pudenne duge hemetite; iya yuushuwa xeellitenne akeekite; iya gutaranka koyite. Xillo pirdiyanne tuma koya issi asi hinte demmiko, ta Yerusalaame maarana. 2 Enti, ‘De7o Goday eriya mela’ gidi caaqikoka, wordo caaqoosona” yaagees Goday.

3 Abeeti Godaw, ne ayfeti tumaa xeellokonaayee? Ne enta shocadasa shin enta sakibeenna. Ne enta mentherethadasa shin enti simmonna ixidosona. Enti banta som7uwa zaallafe aathidi minthidi banta nagaraape simmonna ixidosona.

4 Hessafe guye, taani, “Haysati Godaa ogiyanne banta Xoossaa higgiya eronna gisho, manqonne eeya” yaagada qopas. 5 Hiza, ta gita asatako bada entaw odana. Godaa ogiyanne banta Xoossaa higgiya eroosona. Shin enti ubbay iya qambara menthidosona; iya qashuwaka duuthidosona. 6 Enta makallaynne enta kundethay daro gidiya gisho, gaammoy worape keyidi, enta wodhana. Suudhumey bazzofe keyidi, enta maana. Maahey enta katamata hokidi naagana. He katamatape keyiya ubbay puuzetana.

7 “Taani hinte nagaraa ayis atto go? Hinte nayti tana aggidi, wordo xoossatan caaqidosona. Taani enta muzada kalsas, shin enti laymatidosona; enta keethan aqidosona. 8 Enti dhiiketida korma parada, hara asa macho laggethanaw singethoosona. 9 Tuma ta ha oosota gisho, enta seeranaw bessikina? Haysa mela kawotethaa bolla ta haluwa keyikina?” yaagees Goday.

10 “I woyne gadiya giddo gelidi iissite, shin kumethi dhaysofite. Enti Godaaba gidonna gisho I tasheta karidi yeggite. 11 Isra7eele asaynne Yihuda asay kumethi kaddidosona” yaagees Goday.

12 Enti haysada gidi Godaa bolla wordo odetidosona: “I aykoka oothenna; qohiyabay aybika nu bolla yeenna. Morke mashshay woyko koshi nuna polo demmenna. 13 Nabeti carko mela; entan Xoossaa qaalay baawa. Hessa gisho, enti giyaba ubbay enta gako” yaagosona.

14 Hessa gisho, Isra7eele asaako, “Enti ha qaala odida gisho taani ta qaala ne doonan tama oothana; ha asay mithi gidana; tamayka enta maana” yaagees Goday, Ubbaafe Wolqaama Xoossay.

15 Goday Isra7eele asaako, “Hinteno, Isra7eele asaw, ta hinte bolla haaho biittafe issi kawotethi ehana. Enta qaala hinte eronna, enta oday hintew gelonna wolqaamanne beni kawotethi. 16 Enta donge pal7e shoohoy dooya duufo mela; enta olanchoti wolqaama. 17 Enti hinte kathaanne hinte goshsha ayfiya maana; hinte adde naytanne macca nayta wodhana; hinte dorsaanne mehiya bonqana; hinte woyniyanne balase mithaa dhaysana. Hinte ammanetiya, gimbetida katamata banta mashshan olidi dhaysana” yaagees.

18 “Gidoshin, he gallasatan gidikoka, taani ta asaa kumethi dhaysike” yaagees Goday 19 Asay nena, “ ‘Goday nu Xoossay nu bolla haysa ubbaa ayis oothidee?’ gidi oychiko, ne entako, ‘Hinte tana aggidi, hinte biittan imatha xoossata goyinnidaysada, hinteka asa biittan haratas haggaazana’ yaaga” yaagis.

20 “Haysa Yayqooba asaas oda; Yihuda biittan awaaja. 21 Hinteno, ayfey de7ishin be7onaysato, haythi de7ishin si7onnaysato, eeyanne akeekona asaw haysa si7ite! 22 Hinte taw yayyanaw bessennee? Hinte ta sinthan kokoranaw koshshennee? yaagees Goday. Abbay aadhidi boonna mela shafe iyaw zawa oothiday tana? Zuley sugikoka iyape aadhanaw danda7enna; hobbey dendikoka kanthidi aadhenna. 23 Shin ha asaas muumenne makalla wozani de7ees. Enti hara soo simmidi wora bidosona. 24 Enti banta wozanan, ‘Nuus sila iranne torche ira woden woden immiya, kathaa shiishiya wode nuus immiya Godaa ane yayyoos’ yaagibookona. 25 Hinte balay hessa teqis; hinte nagaray hintena lo77obaape ashshis” yaagees.

26 “Ta asaa giddon iita asati de7oosona. Kafo oykanaw naagiya asada hokidi naagoosona. Enti gite yeggidi asaa oykoosona. 27 Kafo keethan kafoy kumidaada, enta keethay cimon kumis; enti wolqaamanne dure. 28 Enti ordenne modho gididosona; enta iita oosuwas zawi baawa. Enti yi7o nayta gisho mootetokona; manqotas suure pirdibookona. 29 Yaatin, taani hessa gisho enta seeranaw bessennee? Haysa mela kawotetha bolla ta haluwa keyanaw bessennee?” yaagees Goday.

30 “Daro iitabaynne daganthiyabay biitta bolla hanis. 31 Nabeti wordo odoosona; kahineti enta zoriyan aysoosona. Ta asayka hessa melaba dosees. Shin wursethan hinte waananee?” yaagees Goday.