1 Godaape Ermiyaasako yida qaalay haysa: 2 “Xoossa keetha pengiyan eqada, haysada yaagada awaaja. Hinteno, Godaa goyinnanaw ha pengetara geliya Yihuda asaw, ubbay Godaa qaala si7ite! 3 Ubbaafe Wolqaama Goday, Isra7eele Xoossay haysada yaagees: hinte ogiyanne hinte oosuwa laammite; ta hintena ha bessan wothana. 4 ‘Haysi Xoossa keethi! Haysi Xoossa keethi! Haysi Xoossa keethi’ yaagidi cimo qaalan ammanetofite. 5 Hinte, hinte ogiyanne oosuwa tuma laammiko, issoy issuwas xillo pirdiko, 6 bete asaa, yi7o naytanne am7eta naaqonna aggiko, ha bessan xillo asa suuthu gussonna aggikonne, hinte qohetonaada hara xoossata goyinnona aggiko, 7 ta hinte mayzatas merinaw immida biittan hintena wothana. 8 Shin hinte maaddonna cimo qaalan ammaneteta” yaagees.

9 “Hinte kaysoteeta, wodheeta, laymateta, wordo caaqidi markateeta, Ba7aale eeqas yarsho yarsheeta, haysafe kase hinte eronna hara xoossata goyinneta. 10 Yaatidi, ta sunthan xeegetida Xoossa keethaa yidi, ta sinthan eqidi, ‘Nuuni saro’ yaageeta. Shin ha shaatiya oosuwa ubbaa ootheeta. 11 Ta sunthan xeegetida ha Xoossa keethay hintew pangati qosetiya gongolo gidetiyee? Hinte oothiyaba ubbaa taani ta ayfen be7as” yaagees.

12 “Taani ta sunthay de7iya bessi oothada koyro doorida, Seelo biite. Ta asaa Isra7eele iitatethaa gisho, taani he bessaa waatidaako be7ite. 13 Hinte ha ubbaa oothiya wode ta hintew zaara zaara odas; shin si7onna ixideta. Ta hintena xeegas; shin taw koybeketa. 14 Hessa gisho, ta Seelo bolla oothidaysada haysan hinte ammanetiya, ta sunthan xeegetida ha Xoossa keethaa bolla, hintewunne hinte mayzatas immida ha bessaa bolla hessada oothana. 15 Hinte dabbota, Efreema kochaa ta diggidaysada ta sinthafe hintenaka diggana” yaagees.

16 “Ermiyaasa, ta si7onna gisho, ha asaas woossofa; enta gisho tana oychofa woyko waassofa; entaw gaannatopa. 17 Enti Yihuda katamataninne Yerusalaame ogetan oothiyabay aybeko be7ikiyee? 18 Nayti mithi mixoosona; aawati tama eethoosona; maccasati, ‘Salo Kawiw’ geetetiya eeqees uythi uukanaw dhiille munuqoosona. Enti tana yiloyanaw ushsha yarsho hara xoossatas gussoosona. 19 Enti haysa oothey tuma tana qohanaaseyee? Haysan qohetidi yeellatanay enta gidokonaayee?” yaagees Goday.

20 Hessa gisho, Ubbaa Haariya Goday haysada yaagees: “Ta hanqoy ha bessaa bolla, asaa bollanne mehiya bolla, gaden de7iya mithaa bollanne biittan de7iya kathaa bolla gukana; I eexana, to7anaw danda7enna.”

21 Ubbaafe Wolqaama Goday, Isra7eele Xoossay haysada yaagees: “Hinte xuussa yarshuwa hara yarshota bolla gujidi, ashuwa hintew miite. 22 Ta hinte mayzata Gibxe biittafe kessiya wode, xuussa yarshobanne hara yarshotaba odabike woyko kiittabike. 23 Shin ta entako, taw kiitetite; ta hinte Xoossaa gidana; hinteka ta ase gidana. Hintew injetana mela ta hintena kiittiya oge ubban hemetite. 24 Shin enti tana si7onna woyko taw besse immonna ixidosona. Enti banta iita wozanaa qofaa kaallidi bidosona; sinthe baanaysa aggidi guye bidosona. 25 Hinte mayzati Gibxefe keyida wodepe doomidi hachi gakanaw ta aylleta, nabeta wonta wonta hintew kiittas. 26 Shin hinte tana si7onna woyko taw besse immonna ixideta. Hinte morgiya minthideta; hinte aawatape aadhidi iitabaa oothideta.

27 “Ha ubbaa ne entaw oda; shin enti ne giyaba si7okona. Ne enta xeegana; shin enti koyokona. 28 Hessa gisho, Ermiyaasa, ne entako haysada yaaga: ha kawotethay ba Godaa Xoossaa kiitetonna woyko iya zoriya si7onna kawotethi. Tumi dhayis; tumi enta inxarsan deenna. 29 Hinte huuphiya meedidi wora holite. Goday bana yiloyida yeleta ixida gishonne yeggidi aggida gisho aybika bayna dhoqa zumaa bolla keyidi zeleelite” yaagis.

30 “Yihuda asay ta sinthan iitabaa oothidosona. Enti ta sunthan xeegetida Xoossa keethaa tunisanaw taani ixiya eeqata ehidi iya giddon wothidosona. 31 Enti banta adde naytanne macca nayta taman xuuggidi yarshanaw, Hinooma Zangaaran Toofeta geetetiya yarsho bessa gimbidosona. Shin hessi ta enta kiittaboonabanne ta qofan baynaba. 32 Hessa gisho, he bessay Hinooma Zangaara woyko Toofeta geetetidi xeegeteysi attidi, Shuka Zangaara yaagetidi xeegetana wodey yaana. Moogiya bessi bayna gisho, Toofeti enti banta aha moogiya bessi gidana. 33 He wode he asaa ahay salo kafotasinne sa7a do7atas kathi gidana; enta gooddana asika baawa. 34 Taani yethi, ufaysinne yaagano girsi Yihuda katamataninne Yerusalaame ogetan si7etonnaada oothana; biittay baysa gidana” yaagees Goday.