1 “He wode Yihuda kawota meqethay, halaqata meqethay, kahineta meqethay, nabeta meqethaynne Yerusalaamen de7iya asaa meqetha ubbay duufope maxetidi keyana. 2 Enti siiqida, kiitetida, kaallida, zore oychidanne goyinnida awa, ageenanne salo xoolintota ubbaa sinthan micetana. Enta meqethay shiiqenna woyko moogetenna; shin biitta bolla pito mela yegetana. 3 Ta laallida bessatan de7iya, ha iita kawotethaafe attida asa ubbay de7ope hayqo amotana” yaagees Ubbaafe Wolqaama Goday.

4 Goday haysada yaagees gada oda: “Issi asi kundiko, simmidi dendeneyee? Woyko issi asi oge baletiko guye simmenneyee? 5 Yaatin, ha asay ayis guye simmidee? Yerusalaamey ayis ubba wode oge baleetii? Enti cimo baqidi oykidosona; simmonna ixidosona. 6 Ta minthada hayzas; shin enti tuma haasayokona. ‘Ta ay oothadina?’ gidi ba iita nagaraa paaxey issoyka baawa. Ubbay olas gaallabiya parada baw baw woxees. 7 Hari attoshin, haatha kafoti banta wodiya eroosona; holleti, kaarotinne masqala kafoti banta simmiya wodiya naagoosona; shin ta asay Godaa woga erokona.

8 “Yaatin waanidi, ‘Godaa higgey nuura de7iya gisho nu cinca’ gaanaw danda7eetii? Wordancho xaafeti ta higgiya wordo kessidaysa be7eketii? 9 Cincati yeellatana; enti kawuyananne oyketana. Enti Godaa qaala ixin, entaw ay cincatethi de7ii? 10 Hessa gisho, ta enta macheta haratas, enta goshsha allaga asas immana. Guuthafe gita gakanaw bessonna go77as yiiqetoosona. Nabetinne kahineti ubbay asaa cimmoosona. 11 Enti ta asaa madunthaa laafa gidi, guutha dhale wothoosona. Saroy baynashin ‘Saro, saro!’ yaagosona. 12 Ha shaatiya oosuwa oothishe, enti yeellatidona? Akay, enti aykoka yeellatibookona. Enti yeelli aybeko erokona. Hessa gisho, enti kundidaysata giddon kundana; enti seeretiya wode kawuyana. 13 Enta goshsha ayfiya ta entafe ekana. Enta woyne ayfey dhayana; balase mithaa ayfey bentenna. Iya boncoy shullana; ta entaw immidaba entafe ekana” yaagees Goday.

14 Asay zaaridi haysada yaagosona: “Nu si77i gidi ayis uttanee? Ane shiiqite; gimbetida katamata gelidi yan hayqana. Goday nu Xoossay nuna hayqos aathidi immis. Nu iya bolla nagara oothida gisho, nu wodhiya haathi uyana mela oothis. 15 Sarotethi ufaysan naagida; shin lo77obay yibeena. Nu paxo amotida; shin dagama gidis. 16 Morke para garmamoy Daane kataman si7etees; enta korma parata caagethan biitti qaaxees. Enti biittanne biittan de7iyaba ubbaa, katamaanne kataman de7iya ase ubbaa midi dhaysanaw yidosona. 17 Taani shooshata hinte giddo yeddana. Biti teqanaw danda7onna haso shooshata hinte giddo yeddana; enti hintena dukana” yaagees Goday.

18 Ta azzanuwas minthethoy baawa; ta wozanay til7is. 19 Ta asay haaho biittan waassiya waasuwa si7ite. Enti, “Goday Xiyoonen baawee? Ha Xiyoone Kawoy zaaridi yan deennee?” yaagidi waassoosona.

Goday enta Kawoy, “Enti banta medhida misiletan, banta pathonna allaga eeqatan tana ayis yiloyidona?” yaagis.

20 Asay zaaridi, “Heko caka wodey aadhis; boney wuris; nuuni attibooko” yaagidi waassoosona.

21 Ta asay madunxida gisho, ta wozanayka madunxis. Ta kayotas; yashshi tana oykis. 22 Galadan tiyetiya dhaley baawee? Yan aakimey deennee? Yaatin, ta asaa meqoy ayis paxennee?