1 Hayqida ta asaas qammanne gallas yeekana mela ta huuphey haatha olla, ta ayfey pulto haathi gideerenne. 2 Enti ubbay makallanne laymatiya asi gidiya gisho, taani ta asaape shaaketada baana mela, oge asi aqiya bessi, taw mela biittan de7ereneshin.

3 “Enti banta inxarsan wordo odetanaw ubba wode giigidi de7oosona. Enta biittan tuma gidonashin wordoy kawotis. Enti issi nagarape hara nagaran pinnidosona; tana erokona” yaagees Goday.

4 “Ishi cimmeysa, shooroy zigireysa gidiya gisho shooruwape naageto; ishay ishaa ammanetofo. 5 Shooroy shooruwa cimmees; tuma odetey deenna. Wordo odetana mela banta inxarsaa tamaarsidosona; nagara oosona bantana daabursidosona. 6 Ne cimo giddon de7aasa; enti banta cimuwan tana eronna ixidosona” yaagees Goday.

7 “Hessa gisho, ta enta biratada seerisana; enta paacana. Ta asaa gisho, ta haraba ay oothanaw danda7iyana? 8 Enta inxarsay wodhiya donge toora mela; enti cimon haasayoosona. Banta doonan issoy issuwara saro qaala haasayoosona; shin banta wozanan xihe wothoosona. 9 Yaatin, ta ha hanotaas enta seeranaw bessennee? Taani haysa mela kawotethaa bolla halo keyanaw bessennee?” yaagees Ubbaafe Wolqaama Goday.

10 Taani dhoqa deretas yeekana; enta gisho waassana; bazzon de7iya hentha gadetas zeleelana. Enti dhayidosona; yaara issi asika aadhenna. Mehe waasoy si7etenna; salo kafotinne do7ati baqatidosona.

11 “Yerusalaame katamaa laaletida keelanne workanati gupiya bessi oothana. Yihuda katamata oonika doonna baysa kessana” yaagees Goday.

12 Haysa akeekanaw danda7iya cinca asi oonee? Hara asas odana mela Goday ooddes qoncisidee? Issi asika iya giddora aadhona mela biittay iitidi bazzoda oniday aybisee?

13 “Haysi haniday, entaw ta immida higgiya enti aggida gishosa. Enti taw kiitetonanne ha higgiya kaallonna ixida gishosa. 14 Hessa aggidi, enti banta wozanaa muumetetha kaallidosona; enta aawati tamaarsida Ba7aale geetetiya eeqa goyinnidosona” yaagees Goday.

15 Hessa gisho, Ubbaafe Wolqaama Goday, Isra7eele Xoossay haysada yaagees: “Taani ha asaa cammiya kathi muzana; wodhiya haathi ushshana. 16 Enti woyko enta aawati eronna kawotethata giddon ta enta laallana. Enta dhaysana gakanaw mashshan yedethana” yaagees.

17 Ubbaafe Wolqaama Goday haysada yaagees: “Ane qopite. Yeeho yeekiya maccasata xeegite; zelelsi eriya asata ehite. 18 Enti ellesidi yidi, nu ayfey afuthu holthu oothana gakanawunne nu ayfiya ciroy haathe pultana gakanaw zelelsi kesso. 19 Xiyoonen zelelsa girsi si7etees; ‘Nu dhayida! Nu kawuyida! Nu keethay laaletida gisho, nu biitta aggidi baanaw koshshees’ ” yaagosona.

20 Hinteno, maccasato, Godaa qaala si7ite! Hinte haythay iya doonape keyiya qaala hayzo. Hinte macca nayta zelelsi tamaarsite; issoy issuwa yeeho tamaarso. 21 Hayqoy yooga nayta ogen, na7atethata dabaaban qeexishe yidi, nu maskooteta gakis; nu miixaa gelis.

22 “Asa ahi buureda denban yegetana; cakeysati cakidi guye yeggida katha mela enta oonika shiishenna” yaagees Goday.

23 “Cinci ba cincatethan ceeqofo; wolqaami ba wolqan ceeqofo; durey ba duretethan ceeqofo. 24 Shin ceeqiya oonika tana eroninne akeekon ceeqo. Maarotethi, suure pirdanne xillotethi sa7a bolla oothiya Godaa, tana eridi ceeqo; hessi tana ufaysees” yaagees Goday.

25 “Banta asho xalaala qaxaretida asaa ta seerana wodey yaana. 26 Hessatika Gibxe, Yihuda, Edoome, Amoonenne Moo7abe asaanne banta huuphiya yuushuwa meedidi, mela biittan de7iya asa ubbaa. Ha kawotethati ubbay tuma qaxaretibookona; Isra7eele asa ubbayka banta wozanan qaxaretibookona” yaagees Goday.