1 Godaape Ermiyaasako yida qaalay haysa: 2 “Ha caaqo qaala si7ada Yihuda asaasinne Yerusalaame kataman de7iya asaas oda. 3 Goday Isra7eele Xoossay haysada yaagees gada oda. ‘Ha caaquwa naagonna asi oonika baadetidaysa gido’. 4 Taani kase hinte aawata Gibxe biittafe, birata seerisiya coociyape kessiya wode, ‘Taw kiitetite; ta hintena kiittiyaba ubbaa oothite. Hinte ta ase gidana; taka hinte Xoosse gidana’ yaagada odas. 5 Hessadaka, maathinne eessi goggiya biitta kase hinte aawatas immanaw, taani caaqida caaquwa polana.”

Taani, “Ero, Godaw, amin77i” yaagas.

6 Goday taako, “Ha qaalata ubbaa Yihuda katamataninne Yerusalaame ogetan haysada yaagada awaaja: ‘Ha caaqo qaala si7ite; iya kaallite. 7 Kase hinte aawata ta Gibxe biittafe kessida wodiyape hachi gakanaw, zaara zaarada, “Taw kiitetite” gada seeras. 8 Shin enti ta qaala si7ibookona woyko taw kiitetibookona. Enti banta iita wozanaa kaallidosona. Ta caaqo qaala enti naagana mela kiittas; shin enti ixidosona. Hessa gisho, he caaquwa baadetha ubbaa enta bolla ehas’ ” yaagis.

9 Zaaridika Goday taako haysada yaagis: “Yihuda asaynne Yerusalaamen de7iya asay ta bolla maqetidosona. 10 Enti kase ta qaala si7onna ixida banta mayzata nagarako guye simmidosona. Enti hara xoossata goyinnidosona; entaw oothidosona. Isra7eele asaynne Yihuda asay ta kase enta mayzatara caaqida caaquwa menthidosona. 11 Hessa gisho, ‘Enti baqatidi attanaw danda7onna metuwa enta bolla ehana. Enti taako waassinka ta enta si7ike. 12 He wode Yihuda asaynne Yerusalaame asay, ixaane cuyisiya banta xoossatako waassana. Shin meto wode he xoossati enta maaddokona. 13 Hinteno, Yihuda asaw, hinte xoossati hinte katamata mela daro. Qassi Ba7aale geetetiya yeellaya xoossaas ixaane cuyisanaw hinte giigisiya yarsho bessati Yerusalaame ogeta mela daro’ yaagees Goday.

14 “Ermiyaasa, ha asaas tana aykoka woossofa; enta gisho gaannatopa woyko oychofa. Enti banta metuwa gallas tana xeegiya wode ta enta si7ike.

15 “Daro asaara ba iita maquwa maqetashe, ta dosiya ta asay, ta keethan bentanaw bessii? Hinte hinte iita oosuwa oothishin, yarshetida mehiya ashoy hintena seerape ashshanee? Hessa gidiyako hinte ufaytanashin” yaagis.

16 Goday nena, dicciya, lo77o ayfe ayfiya shamaho yaagidi sunthis. Shin, I he shamahuwa wolqaama dada guunthan, taman xuuggana; iya tasheyka meqana.

17 Taani, hintena tokida Ubbaafe Wolqaama Goday, hinte bolla iitabaa ehanaw awaajas. Isra7eele asaynne Yihuda asay Ba7aales ixaane cuyisidi tana yiloyidosona.

18 Goday enta maquwa taw qoncisida gisho ta eras. He wode enti oothiya iita oosuwa tana bessis. 19 Taani shukas giigida dorsada hanas. Enti, “Ane mithaanne iya ayfiya dhaysoos. Iya sunthay hassayetonna mela iya paxa de7eyisata giddofe shoddidi diggoos” yaagidi maqetidaysa ta erabike. 20 Shin abeeti Ubbaafe Wolqaama Godaw, xillo pirdeyso, asa wozananne qofaa shaakada ereyso, ne enta bolla ne haluwa keyada tana bessa. Taani ta qohuwa nena bessaas.

21 Hessa gisho, “Godaa sunthan tinbite odopa ixiko, ne nu kushen hayqanna” yaagidi, nena wodhanaw koyiya Anatoota asaaba Goday haysada yaagees. 22 Ubbaafe Wolqaama Goday haysada yaagees: “Ta enta seerana; enta panthati mashshan hayqana; enta macca naytinne adde nayti koshan hayqana; 23 entafe issoynne attenna. Ayis giiko, taani seeriya laythi Anatoota asa bolla iitaba ehana” yaagees.