1 Abeeti Godaw, ta neera mootetiya wode ubbanka ne xillo. Gidoshin, ne xillo pirdaba neera odetanaw koyayis. Iita asati oothiyabay entaw ayis injetii? Gene asati ayis duretidi de7oona? 2 Neeni enta tokadasa; enti xapho yeddidosona; diccidi ayfe ayfidosona. Enti nena doonape yeggokona; shin enta wozanaape ne haahon de7aasa. 3 Shin abeeti Godaw, ne tana eraasa; tana be7aasa; ta nebaa ay qopiyako paacasa. Shuka dorsada, he iita asata goochada kessa; shuka gallasas enta dummayada wotha. 4 Biittay ira dhayidi qohetannay, denban de7iya maatay melanay awude gakanaasee? Asaa iitatethaa gaason, do7inne kafoy wuris. Asay qassi, “Goday nu oothiyaba demmenna” yaagosona.

5 Goday Ermiyaasako, “Neeni tohon woxiya asatara gaaddetada daaburiko, parara waanada gaaddetanee? Ne saro biittan dhubetiko, Yordaanose wora giddora waanada hemetanee? 6 Ne ishati, hinte soo asati nena aathidi immidosona; ne bolla dendidosona. Hessa gisho, lo77oba odikoka enta ammanopa.

7 “Ta Isra7eele aggas; ta dooretida kawotetha yeggas; ta siiqiya asaa iya morketa kushen aathada immas. 8 Ta doorida asay taw woran de7iya gaammo mela gidis. I ta bolla gudis; hessa gisho, ta iya ixas. 9 Ta doorida asay ubba baggara phircoy teqida kafo mela gididosona. Bidi do7ata ubbaa shiishidi iya maana mela ehite.

10 “Daro allaga kawoti ta woyne gadiya iissidosona; ta gadiya yedhidosona; ta lo77o goshsha baysa kessidosona. 11 He biittay iitidi oxis; ta sinthan melanne baysa gidis. Qadhetey bayna gisho biittay kumethi iitis. 12 Mela biittan de7iya aykoka bayna dere kanthidi, bonqeysati yidosona. Godaa mashshay biitta ha gaxape ya gaxaa gakanaw mis. Hessa gisho, oonika saro attanaw danda7enna. 13 Enti giste zeridi, agunthu cakidosona; enti daro daaburidosona; shin aykoka demmibookona. Godaa wolqaama sheniya gaason enta kathay dhayis” yaagis.

14 “Taani ta asaa, Isra7eeles, immida biitta oykida, iita shooro kawotethata enta biittafe shoddana. Qassi Yihuda asaa enta giddofe kessana. 15 Shin enta biittafe shoddidaape guye, zaarada entaw qadhetana. Enta issuwa enta laata biittanne enta kawotethaa zaarada ehana. 16 Kase ta asaa Ba7aale sunthan caaqana mela tamaarsidaysada enti ta asaa ogiya tamaarikonne ta sunthan caaqiko enti ta asaa giddon minnidi daana. 17 Shin kiitetonna ixida kawotethata taani polo shoddada dhaysana” yaagees Goday.