1 Goday taako, “Bada liino qacinape dadetida danco shammada, ne xeessan danca; shin haathan boshisopa” yaagis. 2 Hessa gisho, taani Goday kiittidaysada dancuwa shammada ta xeessan dancas.

3 Goday nam7antho taako haysada yaagis: 4 “Ne shammada dancida dancuwa ekada, Efraxiisa shaafa bada shucha qophon qosa” yaagis. 5 Goday taw odidaysada efada, Efraxiisa shaafa lanqen qosas.

6 Daro gallasape guye Goday, “Efraxiisa shaafa bada, ta nena, ‘Yan qosa’ gida dancuwa eka” yaagis. 7 Taani Efraxiisa shaafa bada, dancuwa moogida bessaafe ekas. Shin he dancoy iitidi aykoka maaddonnaba gidis.

8 Hessafe guye, Godaa qaalay taako, 9 “Taani Yihuda ceeqetethaanne Yerusalaame otoruwa haysada oothada dhaysana. 10 Ta qaala si7onna ixidi, banta wozanaa muumisidi, hara xoossata goyinnanawunne entaw oothanaw biya ha iita asati, ha dancuwada maaddonnaba gidana. 11 Dancoy asa xeessi baqidi oykeysada Yihudinne Isra7eeley taara oyketidi, ta sunthaas galatanne boncho gidana melanne ta ase gidana mela oothas; shin enti si7onna ixidosona” yaagees Goday.

12 Goday taako, “Goday Isra7eele Xoossay, haysada yaagees gada oda yaagis: ‘Issi issi xuggay woyne ushshan kumana’ yaaga. Enti neeko, ‘Nuuni issi issi xuggay woynen kumanaysa erokoyee?’ yaagiko, 13 ne entako, ‘Taani ha biittan de7iya asa ubbaa, hari attoshin, Dawita araatan uttiya kawota, kahineta, nabetanne Yerusalaamen de7iya asa ubbaa, enti mathotana gakanaw woyne ushshan kunthana. 14 Taani enta, issuwa issuwara, aawa na7aara dom7ethana. Ta enta dhaysana; ta entaw keehike, qadhetike; enta maarike’ ” yaagees Goday.

15 Haysa odey Godaa gidiya gisho hinte otoruwa aggidi si7ite; akeekite.

16 I dhuma ehanaape sinthe, hinte tohoy dhumiya deriyan dhubetanaape sinthe, Godaa hinte Xoossaa bonchite. Hinte, “Poo7oy yaana” gidi naageta; shin I sakana dhuman laammana.

17 Shin hinte si7onna ixiko, hinte otoruwa gisho ta geeman yeekayis. Godaa wudey di7etidi bida gisho, ta yeekayis; ta ayfey afuthu gussees.

18 Goday taako, “Kawuwasinne kawa aayes, haysada yaagada oda: Hinte boncho kallachay hinte huuphiyape kundida gisho, hinte kawotetha araatape duge wodhite. 19 Negebe biittan de7iya katamati ubbay gordetidosona. Enta dooyanaw issi asika yan baawa. Yihuda asay kumethi di7etidi bidosona” yaagis.

20 Goday, “Ane dhoqu gada, pudeha baggafe yeyisata xeella. New imetida wudey, ne ceeqetida dorsati awun de7oona? 21 Neeni, new lagge gidana mela koydaysati nena xoonidi haariya wode woygay? Yelos keyida maccasada iqethi nena oykennee? 22 Yerusalaame, neeni ne wozanan, ‘Ha ubbay tana ayis gakidee?’ giiko, ne ma7oy qaaretidaynne ne bonqetiday ne nagaray darida gishosa. 23 Tophey ba malaa woyko maahey ba gazzatethaa laammanaw danda7ii? Hessadaka, iita ooson meezetida hinte, lo77o ooso oothanaw danda7eketa” yaagis.

24 “Ta hintena bazzo carkoy efiya suullada laallana. 25 Hinte tana dogida gishonne wordo xoossatan ammanetida gisho hinte saamaynne ta hintew immiya gishoy haysa. 26 Hinte kalloy bentana mela ta hinte ma7uwa qaara yeggana. 27 Ne borso oosuwa, korma parada ziitas caageysa, yeelli bayna laymatethi, zuma bollanne denban ne oothiya ixetida oosuwa ta be7as. Yerusalaame, nena ayye! Ne awude gakanaw geeyonna daanee?” yaagees Goday.