1 Koshaba Goday Ermiyaasas odida qaalay haysa: 2 “Yihuda biittay kayotees; iya katamati labbanidosona. Yan de7iya asati biittan uttidi yeekosona; Yerusalaamepe gita waasoy si7etis. 3 Dure asati haathe tikanaw banta aylleta kiittoosona. Enti haatha ollaako boosona; shin haathe demmokona; banta otuwa mela tooki ekidi simmoosona. Haniyaba dhayidi yeellatishe, banta huuphiya guuluntoosona. 4 Iri bukonna gisho biittay melidi za77is. Goshshanchoti yeellatidi, banta huuphiya guuluntidosona. 5 Maati bayna gisho woshi7ey ba yelida galo mariw denban yeggada bawusu. 6 Bazzo hareti aybika bayna dhoqa zumata bolla eqidi, workanada lafettoosona. Entaw miyabay dhayin, enta ayfey xeellanaw daaburis” yaagis.

7 Asay haysada yaagidi woossis: “Abeeti Godaw, nu nagaray nu bolla markatikoka, ne sunthaa gisho, nuus issiba ootha. Nu nena aggidi daro wode guye simmida; ne bolla nagara oothida. 8 Abeeti Isra7eele ufaysaw, meto wode ashsheyso, ne imathada, issi qamma aqanaw gelida oge asada ayis hanay? 9 Ne dagammida asada, ashshanaw danda7onna asada ayis hanay? Abeeti Godaw, ne nu giddon de7aasa! Nuuni ne sunthan xeegetida; nuna aggofa!” yaagis.

10 Ha asataba Goday haysada yaagees: “Enti toylatethi daro dosoosona; banta tohuwa teqokona. Hessa gisho, Goday entan ufaytenna. I enta iita oosuwa hassayidi, enta nagaraa gisho enta seerana” yaagees.

11 Hessafe guye, Goday taako, “Ha asaa sarotethaas woossofa. 12 Enti xoomikoka, ta enta waasuwa si7ike. Xuussa yarshonne katha yarshuwa enti yarshikoka, ta ekike. Taani enta olan, koshaninne gadon dhaysana” yaagis.

13 Taani zaarada, “Abeeti Ubbaa Haariya Godaw, nabeti ‘Hinte ola be7eketa woyko koshi gakenna. Goday ha biittan polo sarotethi immana’ yaagosona” yaagas.

14 Goday zaaridi, “Nabeti ta sunthan wordo odoosona; ta enta kiittabike woyko entaw odabike. Enti hintew odey wordo qoncethi, pathonna kaayonne bantaw medhi kessida wordo haasayoosona. 15 Hessa gisho, Godaa sunthan odiya nabeta ta kiittabike. Shin enti, ‘Oli woyko koshi ha biitta bochenna’ yaagosona. He nabeti bantaw olaninne koshan dhayana! 16 Qassi tinbitey odetida asay koshanne ola gaason hayqana; enta ahay Yerusalaame ogiya bolla holetana. Enta woyko enta macheta, enta adde naytanne woyko enta macca nayta moogiya asi dhayana. Entaw bessiya waayiya enta bolla tigana” yaagis.

17 Ta azzanuwaba ta asaas odana mela Goday tana kiittis. “Ta asay deshetidi, daro madunxida gisho, ta ayfey qammanne gallas qanxonna afuxana. 18 Ta demba keyiko, mashshan hayqidaysata be7ayis. Katamaa geliko, koshan qohetidaysata be7ayis. Nabetinne kahineti banta oosuwa oothosona; shin ay oothiyako erokona” yaagas.

19 Abeeti Godaw, ne Yihuda aggadii? Xiyoone asaa ixadii? Nu paxonnaada oothada ayis dechadii? Nu “Saro gidana” gidi naagida; shin aybika lo77obay bentibeenna. Nu “Paxana wodey yaana” gidi naagida; shin dagama xalaali gakis.

20 Abeeti Godaw, nu iitatethaa erida; nu aawata balaa akeekida; nuuni nagara oothida. 21 Ne sunthaa gisho gada nuna kadhopa; ne boncho araata kawushofa. Ne nuura caaqida caaquwa hassaya; ne caaquwa menthofa. 22 Kawotethata eeqatape issoy ira bukisanaw danda7ii? Saloy ba shenen puusanaw danda7ii? Danda7enna! Abeeti Godaw, nu Xoossaw, hessa danda7ey nena! Haysa ubbaa oothey nena gidiya gisho nenan ufaysi oothoos.