1 Hessafe guye, Goday taako haysada yaagis: “Hari attoshin Museynne Sameeli ta sinthan eqidi woossiyakoka ta wozanay ha asaako simmenna. Enta ta sinthafe digga; enti boo. 2 Enti nena, ‘Nu awu baanee?’ gidi oychiko, Goday haysada yaagees gada entaw oda: ‘Hayqos pirdetidaysati hayqos; mashshas pirdetidaysati mashshas; koshas pirdetidaysati koshas; di7etanaw pirdetidaysati di7etanaw boo’ yaagis.

3 “Taani oyddu qommo gadota enta bolla ehana yaagees Goday. Hessika, enta wodhanaw mashsha, enta aha goochanaw kanata, enta asho midi dhaysanaw salo kafotanne sa7a do7ata ehana. 4 Hizqiyaasa na7ay, Yihuda kawoy Minaasey Yerusalaamen oothida iita oosuwa gisho, ta enta sa7aa kawotetha ubbaas dagama oothana.

5 “Yerusalaame asaw, hintew oone qadhetanay? Hintew azzananay oonee? Hinte waanidetii? gidi hintena oychanay oonee?” yaagees Goday.

6 “Hinte tana aggideta; hinte guye simmideta. Hessa gisho, taani hinte bolla ta kushiya denthada hintena dhaysas; hizape ta hintew qadhetike. 7 Enti banta iita ogiyape simmonna ixida gisho enta katamata pengiyan pithe ekada harqas. Ta enta nayta wodha wursas; ta asaa dhaysas. 8 Enta am7eta tayboy abba gaxan de7iya shafiyape daris. Taani seeta gallas na7atethata aayeta bolla dhayo ehana. Qoponna de7ishin, enta bolla dagamanne kokorsi ehana. 9 Laapun nayti hayqida aayiya shempanaw xoonetada daaburasu. Iwu gallasi qammis; iya kawuyasunne yeellatasu. Paxa attidaysata enta morketa sinthan mashshan wursana” yaagees Goday.

10 Ta aaye, tana ayis yeladii? Tana ayye! Ta biitta ubban de7iya asaara kacciyanne baaxetiya asi gidas. Ta oodeska tal7abike; oodefeka tal7ada ekabike; shin asa ubbay tana baaddees.

11 Goday taako, “Tuma ta nena lo77o oosos ashshada ekana. Tuma ne morketi metuwa wodenne waaye wode nena woossana mela oothana. 12 Asi birata, pudeha baggafe yaa birata woyko naase birata menthanaw danda7ii? 13 Biitta ubban hinte oothida nagaraa gisho, hinte shaluwanne duretetha hinte morketas aathada immana. 14 Hintena eronna biittan hinte morketi hintena aylle oothana. Ta hanqoy miya tama gididi merinaw eexana” yaagis.

15 Abeeti Godaw, ne eraasa. Tana hassaya; tana maadda; tana yedetheyisata bolla ta haluwa keya. Ne danda7an tana wora yeggofa. Ta ne gisho cayeteysa qopa. 16 Abeeti Godaw, Ubbaafe Wolqaama Xoossaw, ta ne sunthan xeegetida gisho, ne qaalay taako yin mas. Ma simmin tana pashkisis; ta wozanaa ufaysis. 17 Qelqiseyisata cugan uttabike; entara ufaytabike. Neeni ne kushiya ta bolla wothida gishonne ta bolla yilotida gisho ta tarka dumma uttas. 18 Ta hargey paxonnay, ta madunthay melonnay aybisee? Ne taw eqiya shaafada, meliya pultoda hanayee?

19 Hessa gisho, Goday haysada yaagees: “Ne taako simmiko, ta zaarada nena ekana; ne taw oothana. Hada oda aggada, boncho qaala xalaala odetiko, ne ta doona gidana. Enti neeko simmana; shin ne entako simmaka. 20 Ta nena ha asaas naase biratan gimbetida gimbe oothana. Enti neera oletana; shin nena xoonokona; ta nena ashshana. 21 Iitata kushepe ta nena ashshana; qadhey bayna wozana mino asaape ta nena wozana” yaagees Goday.