1 Godaape Ermiyaasako yida qaalay haysa: 2 “Dendada urqa medhiya addiya soo ba. Yan ta nena ta qaala sissana” yaagis. 3 Taani duge urqa medhiya addiya soo bada, I ba gertuwa bolla urqa medhishin be7as. 4 I medhishin, he miishey iya kushen iitis. I he urqa zaaridi munuqidi, bana lo77iya hara miishe kessidi medhis.

5 He wode Godaa qaalay, haysada yaagishe taako yis: 6 “Isra7eele asaw, urqa medhiya addey ootheysada ta hintena oothanaw danda7ikina? Isra7eele asaw, urqay bana medheysa kushen de7eysada, hinteka ta kushen de7eeta. 7 Issi kawotethi woyko issi derey shodetana mela, laaletana melanne dhayana mela ta odida wode, 8 he kawotethay ba iitatethaafe simmiko, ta enta bolla ehana gida iitabaa ehonna aggaagana. 9 Qassi hara wode issi deriya woyko kawotethaa, ‘Ta hintena keexananne tokana’ gada odida wode, 10 he kawotethay ta odeysa si7onna ixidi, ta sinthan iitabaa oothiko, ta oothana gida lo77oba oothonna aggaagana.

11 “Hessa gisho, Yihuda asaasinne Yerusalaamen de7iya asaas haysada yaaga. Taani hintew dhayo giigisaysinne iitabaa halchayis. Hinte ubbay hinte iita ogiyape simmite; hinte ogiyanne hinte oosuwa laammite. 12 Shin enti, ‘Haysi aykoka maaddenna! Nuuni nu qofaada hanana; nu issoy issoy nu iita wozanaa kaallana’ yaagana” yaagis.

13 Hessa gisho, “Goday, ‘Haysa melaba si7i ereetii?’ yaagidi kawotethata oychite. Geela7o gidida Isra7eeley daro shaatiyaba oothasu. 14 Libaanose zuma bolla de7iya shachay, zaalla bollafe dhayidi erii? He zumaape goggiya irxa haathi meli erii? 15 Shin ta asay tana dogidosona; pathonna xoossatas ixaane cuyisidosona. Banta ogiyape, banta beni ogiyape, gaxa keyidi dhubetidosona. 16 Enti banta biitta baysanne kadhetidaba kessidosona. Yaara aadhiya oonika malaaletidi ba huuphiya qaathees. 17 Baani doloha bagga carkuwan laaleteysa mela, taani ta asaa morketa sinthan laallana. Enta metuwa gallas ta entaw zoko zaaranaape attishin, ta som7uwa enta bessike” yaagees Goday.

18 Asay, “Kahineta matan higgey, cincata matan zorey, nabeta matan qaali dhayonna gisho ane Ermiyaasa bolla maqetoos. Nu inxarsan oykoos; I odiya qaala si7onna ixana” yaagidosona.

19 Abeeti Godaw, tana si7a; ta morketi ta bolla giyaba hayza. 20 Lo77o oothida asas zaaroy iiteyee? Shin enti taw olla bookosona. Ne hanqoy entafe simmana mela ta enta gisho gaannateysa be7a. 21 Hessa gisho, enta nayta koshas aathada imma; enta mashshas aathada imma. Enta macheti na7i baynaysatanne am7o gido. Enta addeti wodhiya hargen gahetonna; enta na7atethati olan wuro. 22 Enti tana oykanaw olla bookida gishonne ta tohuwas xihe wothida gisho, qoponna bonqeyisata enta bolla yedda; enta keethan waasoy keyo. 23 Shin abeeti Godaw, enti tana wodhanaw maqeteysa ne eraasa. Ne enta iitatethaa atto goopa woyko enta nagaraa ne sinthafe quchofa. Enti ne sinthan xoonetidi kundo; ne shenetiya wode enta haysada ootha.