1 Goday taako, “Bada oto medheysafe xugga shamma. Neera guutha biitta cimatanne guutha kahine cimata ekada, 2 Kun7a Me7o Pengiya matara aadhada, Hinooma Zangaara ba; yan ta new odiya qaala awaaja. 3 ‘Hinteno, Yihuda kawoto, hinteno Yerusalaame katama asaw, Godaa qaala si7ite!’ Ubbaafe Wolqaama Goday, Isra7eele Xoossay haysada yaagees: ‘Si7iya ubbaa haythas iitiya palaba ha biitta bolla ta ehana.’ 4 Ha asay tana aggidi, enti woyko enta aawati woyko Yihuda kawoti eronna hara xoossatas ixaane cuyisidi ha bessaa tunisidosona. Enti xillo asaa suuthaa ha bessan gussidosona. 5 Ta enta kiittonaba woyko entaw odonnaba woyko ta qoponnaba oothidosona; banta adde nayta nagaras taman xuussa yarsho oothidi yarshanaw, dhoqa goyinno bessata gimbidosona. 6 Hessa gisho, ha bessay Toofeta woyko Hinooma Zangaara geeteteysi attidi, Shuha Zangaara yaagetidi xeegetana gallasay yaana. 7 Yihudanne Yerusalaame asaa halchuwa ta ha bessan laallana. Enti banta morketa mashshaninne bantana wodhanaw koyiya asaa kushen hayqanaada oothana. Enta aha salo kafotasinne sa7a do7atas kathi oothada immana. 8 Taani ha katamaa baysanne miichas kessana. Yaara aadhiya ubbay iya dhayuwan malaaletidi, ‘Poora’ yaagana. 9 Enti banta macca naytanne adde nayta ashuwa maanada oothana. Enta wodhanaw koyiya morketi enta teqidi waaysiya wode un7etidi enti issoy issuwa ashuwa maana” yaagis.

10 “Hessafe guye, neera bida asaa sinthan xuggaa mentha. 11 Entako haysada yaaga: xuggay meqidaysadanne zaaridi koolanaw danda7etonnaysada ta ha kawotethaanne ha katamaa mentherethana. Asi aha moogiya bessi bayna gisho Toofetan moogetana. 12 Ha bessaaninne iyan de7iya asaa bolla haysa oothana. Ha katamaa Toofetada oothana. 13 Yerusalaame asaa keethatinne Yihuda kawota keethati, keethaa bolla dembayidi oothida bessan salo xoolintotas ixaane cuyisidanne hara xoossatas ushsha yarsho gussida keethati ubbay Toofetada tuna gidana” yaagees Ubbaafe Wolqaama Goday.

14 “Hessafe guye, Ermiyaasi Goday tinbite odana mela kiitida Toofetape simmidi, Xoossa keetha giddon de7iya dabaaban eqidi asa ubbaako haysada yaagis: 15 Enti morgiya gabbisidi, ta odiyaba si7onna ixida gisho ha katamaa bollanne iya heeran de7iya gutata bolla ehana gida iitabaa ubbaa ehana hanayis” yaagees Ubbaafe Wolqaama Goday.