1 He wode Godaa keethaanne halaqa gidiya, Imera na7aa kahiniya Phaskori Ermiyaasi tinbite odishin si7is. 2 Phaskori nabiya Ermiyaasa deshisidi, Qommo Biniyaame Pengiyan Xoossa keethaa geliya pengen gonge luhon qashisis. 3 Wontetha gallas Phaskori Ermiyaasa qashope birshin, Ermiyaasi iyaw haysada yaagis: “Hachife doomin, Goday ne sunthaa Phaskori yaagenna; I ne sunthaa ‘Yan Han Dagama’ yaagana. 4 Goday haysada yaagees: ‘Taani nena, newunne ne laggeta ubbaas dagama oothana. Enti neeni xeellishin, banta morketa mashshan wurana. Taani Yihuda asa ubbaa Babiloone kawa kushen aathada immana. I enta di7idi, Babiloone efidi, yan mashshan wodhana. 5 Hessadaka, ha katama shaluwanne duretetha ubbaa, oyki yedhidaba ubbaa, haaridaba ubbaanne Yihuda kawota miishiya ubbaa taani enta morketas aathada immana; enti enta bonqidi Babiloone efana. 6 Qassi neeni Phaskori, ne son de7iya asa ubbay di7etidi, Babiloone baana. Neeni wordo tinbite odida ne laggeta ubbaaraka yan hayqananne yan moogetana’ yaagees” yaagis.

7 Abeeti Godaw, neeni tana cimmadasa; taanika cimetas. Neeni taape minnada, tana xoonadasa. Gallasa kumetha taani asa miichas attas; ubbay tana qelqisis. 8 Taani haasaya wode ubban, “Makallabaynne dhayoy gakis” gada waassayis. Godaa qaalay taw gallas gallas borenne qelqisethi ehis. 9 Taani, “Taani GODAABA denthada odike” woyko, “Iya sunthan nam7antho odike” giiko, Godaa qaalay ta meqethaa giddon qum7etidi, eexiya tama mela gididi, ta wozanan michees. Taani giddon oykada ashshona gada daaburas; shin teqanaw danda7abike. 10 Taani daro kalkasha si7as; “Yan han dagami de7ees! Ane iya mootite! Nuunika iya mootoos” yaagosona. Taw mata laggeti ubbay ta kundethaa naagidi, “Ooni eri, nuuni iya oykana melanne nu haluwa keyana mela, I cimmanaw danda7ees” yaagosona.

11 Shin Goday yashisiya toora qaradan taara de7ees. Hessa gisho, tana yedetheysati dhubetana; enti tana xoonokona. Entaw giigonna gisho, enti gita yeella yeellatana. Enta kawushay kumthi dogetenna. 12 Abeeti Ubbaafe Wolqaama Godaw, xillota paaceyso, wozananne kaha be7eyso, neeni ta morketa bolla ne haluwa keyada tana bessa. Ayis giiko, taani ta mootuwa new aathas.

13 Godaas yexite! Godaa galatite! ayis giiko, I manqota iitata kushepe ashshees.

14 Taani yeletida gallasay baadetidaysa gido! Ta aayiya tana yelida gallasay anjetofo! 15 Ta aawas, “New mishiraacho; new adde na7i yeletis!” yaagi odidi, daro ufaysida urayka baadetidaba gido! 16 He addey Goday qadhetonna aathidi yeggidi dhaysida katamatada hano. He addey wonta waasuwa, gallas seetan, “Olay gakis!” giya odaa si7o. 17 Ayis giiko, ta aayiya taw duufo gidana melanne I uloyka tana merinaw oyki uttana mela, tana ulon wodhibeenna. 18 Taani metonne azzano be7anawunne laytha ubbaa yeellatashe wursanaw, ayis ta aaye ulope keyadina?