1 Kawoy Sedeqiyaasi Malkiya na7aa Phaskoranne Ma7iseya na7aa kahiniya Sofoniyaasa kiitida wode, Godaa qaalay Ermiyaasako haysada yaagidi yis: 2 Enti, “Babiloone kawoy Nabukadanaxoori ba olanchotara ha katamaa teqida gisho nuus Godaa oycha. Ooni eri, Goday beniysada malaalsiya oosuwa nu gisho oothidi, iya guye zaaronna aggenna” yaagidosona. 3 Ermiyaasi entaw zaaridi, “Bidi Sedeqiyaasako yaagite: 4 ‘Neeni Babiloone kawuwaranne gimbiyafe karera ne katama teqida iya olanchotara oletiyanne ne kushen de7iya ola miishiya ta ne bolla zaarana; enta ubbaa ha katamaa giddo gelsana. 5 Taani, ta huuphen seeras micetida kushen, wolqaama qesiyan, yilon, hanqoninne wolqaama gadon nena olana. 6 Ta ha kataman de7iya asaanne mehiya shocana; enti iita gadon wurana. 7 Hessafe guye, Yihuda kawa Sedeqiyaasa, iya moorinnata, gadope, mashshafenne koshape attida, ha katama asa ubbaa, Babiloone kawa Nabukadanaxoorasinne enta wodhanaw koyiya morketas aathada immana. I enta qara mashshan goyrana. I entaw qadhetenna; saletidi aggenna; maarenna’ ” yaagees Goday Isra7eele Xoossay.

8 Goday Ermiyaasako, “Gujada asaako haysada yaaga: ta hinte sinthan de7o ogiyanne hayqo ogiya wothas. 9 Ha kataman gam7iya oonika mashshan woyko koshan woyko gadon hayqana. Shin katamaape keyidi katamaa teqidi oykida Babiloonetas ba kushiya immiya oonika paxa attana; he uray ba shempuwa ashshana. 10 Taani ha katamaa bolla lo77oba gidonashin iitabaa oothanaw dendas. Ta iya Babiloone kawas aathada immana; I ha katamaa taman xuuggana” yaagees Goday.

11 Yihuda kawa keetha asaas haysada yaaga: Godaa qaala si7ite! 12 Hinteno, Dawita kochato, Goday hinteko haysada yaagees; “Wonta wonta suure pirdite; bonqetidaysata un7ethiya asaa kushepe ashshite. Hessa hinte oothonna ixiko, hinte iita oosuwa gaason ta hanqoy tamada eexana; oonika iya toysenna” yaagees Goday.

13 Neno, Yerusalaame, denban de7iya zaallada, zangaarape dhoqu gada bentaasa; shin ta nena olana. Neeni, “Oonika ta bolla xaalenna woyko ta de7iya bessaa gelenna” yaagasa.

14 Shin, “Taani Goday nena ne oosuwada seerana. Taani ne kawo keethan tama oythana; ne yuushuwan de7iya ubbaa midi dhaysana” yaagees Goday.