1 Iyosyaasa na7ay Sedeqiyaasi, Yihudan kawoto doomida wode ha qaalay Godaape Ermiyaasako yis. 2 “Dafo gonne wodorora de7iya qambara medhada ne gannan wotha. 3 Yihuda kawa Sedeqiyaasako Yerusalaame kiitetida asaa baggara, Edoome, Moo7abe, Amoone, Xiroosanne Sidoona kiitta. 4 Enti banta godatas odana mela enta kiitta. Ubbaafe Wolqaama Goday, Isra7eele Xoossay haysada yaagees: 5 ‘Ta gita wolqaaninne ta micetida kushen sa7aa, sa7an de7iya asaa, mehenne do7ata medhas; taani iya, ta koyiya oodeska immayis. 6 Ha77i ta biitta ubbaa ta aylliyas, Babiloone kawa Nabukadanaxooras immas. Qassi ta bazzo do7atika iyaw haaretana mela oothas. 7 Iya biittay haratas haaretiya wodey gakanaw kawotethati ubbay iyaw, iya na7aasinne iya na7aa na7aas haaretana. Hessafe guye, daro kawotethatinne gita kawoti iya haarana.’

8 “Shin ay biitti woyko ay kawotethi Babiloone kawa Nabukadanaxooras kiitetonna ixikonne iya qambaran gelonna ixiko, he kawotethay iya kushen dhayana gakanaw mashshan, koshaninne boshan seerana. 9 Hessa gisho, ‘Babiloone kawas haareteketa’ giya hinte nabeta, hintew kaayeyisata, hinte amuho billeyisata, hinte marotanne moytille xeegeyisata si7opite. 10 Enti hintew wordo odoosona; hintena hinte biittafe shoddana; hintena gooddada kessana; hinteka dhayana. 11 Shin ay kawotethika Babiloone kawa qambaran gelidi, iyaw haaretiko, ta he kawotethaa iya biittan ashshana; enti he biitta goyana; yan daana” yaagees Goday.

12 Taani, Yihuda kawa Sedeqiyaasaska ha qaala odas; “Babiloone kawa qambaran gelada iyawunne iya asaas haaretiko, ne de7on daana. 13 Goday Babiloone kawas haaretonna ixiya kawotethas odidaysada mashshan, koshaninne boshan nenne ne asay ayis hayqeetii? 14 Enti odey wordo gidiya gisho, ‘Hinte Babiloone kawas haareteketa’ yaagidi odiya nabeta si7opite. 15 Ta enta kiittabike; shin enti ta sunthan wordo tinbite odoosona. Hessa gisho, ta hintena gooddada kessana; hintenne hinte nabeti dhayana” yaagees Goday.

16 Hessafe guye, ta kahinetasinne asa ubbaas haysada yaagada odas: “Xoossa keetha miishey Babiloonepe matara simmidi yaana” yaagidi wordo odiya nabeta si7opite. 17 Enti giyaba si7onna aggidi, Babiloone kawas haaretite; hinte de7on daana. Ha katamay ayis laaletida bessi gidanee? 18 Enti tuma nabe gidikonne Godaa qaalay entan de7iko, Xoossa keethan, Yihuda kawo gadhoninne Yerusalaamen attida miishey Babiloone boonnada Ubbaafe Wolqaama Godaa Xoossaa woosso.

19 “Ubbaafe Wolqaama Goday, xoossa keetha karen eqida nam7u naase birata tuussatabaa, gita keretabaa, caana gaaretabaanne hara miishetaba haysada yaagees: 20 Babiloone kawoy Nabukadanaxoori Iyo7aqeema na7aa, Yihuda kawa Ikoniyaananne Yihudaninne Yerusalaamen de7iya gita asa ubbaa di77idi efida wode, 21 Ubbaafe Wolqaama Goday, Isra7eele Xoossay, Xoossa keethan, Yihuda kawo gadhoninne Yerusalaamen attida miishetaba haysada yaagees; 22 Enti Babiloone biitta gaazetana; ta enta gisho yaana wodey gakanaw, enti yan daana. He wode ta enta guye zaarada enta bessan wothana” yaagees Goday.