28
Wordo Nabiya Hanaana
He laythi, Yihuda kawoy Sedeqiyaasi kawoto doomida oyddantho laythan, ichashantho ageenan Gaba7oona addey, Azuura na7ay nabey Hanaani, Xoossa keethan kahinetanne asa ubbaa sinthan taako haysada yaagis: “Ubbaafe Wolqaama Goday, Isra7eele Xoossay, ‘Babiloone kawa qambara menthana. Babiloone kawoy, Nabukadanaxoori, Babiloone efida Xoossa keethaa miishe ubbaa ta nam7u laytha giddon zaarada ha bessaa ehana. Iyo7aqeema na7aa, Yihuda kawa Yo7akina, Yihudape di7etidi Babiloone bida asa ubbaa zaarada ha bessaa ehana. Taani Babiloone kawa qambara menthana’ ” yaagees Goday.
Xoossa keethaa giddon eqida kahinetanne asa ubbaa sinthan nabey Ermiyaasi, nabiya Hananako haysada yaagis. “Amin7i! Goday ne gidaysada ootho. Xoossa keetha miishetanne di7etidi bida asa ubbaa Babiloonepe zaaridi, ne odiya qaala Goday polo! Gidoshin, ta newunne ne asaas odeysa si7a. Neepenne taape kase de7ida nabeti, olaba, dhayobanne gadoba gita kawotethata bolla tinbite odidosona. Shin, Saroba odiya nabey, tuma Xoossi kiitida nabe gideysi eretey, I odiya tinbitey poletiya wodena” yaagis.
10 Hessafe guye, nabey Hanaani, nabiya Ermiyaasa gannaafe qambara ekidi menthis. 11 Hanaani asa ubbaa sinthan, “Taani nam7u laytha giddon Babiloone kawa Nabukadanaxoora qambara kawotethata ubbaa gannaafe denthada haysada menthana” yaagees Goday. Hessafe guye, Ermiyaasi dendidi, ba ogiya bis.
12 Nabey Hanaani, nabiya Ermiyaasa gannaafe menthida guutha wodepe guye, Godaa qaalay nabiya Ermiyaasako haysada yaagishe yis. 13 Bada Hanaanas oda; “Neeni mitha qambara menthadasa; shin neeni iya gisho birata qambara medhana. 14 Babiloone kawa Nabukadanaxooras haaretana mela taani ha kawotethata ubbaa gannan birata qambara wothana; entika iyaw haaretana. Taani hari attoshin, bazzo do7atika iyaw haaretana mela oothana” yaagees Ubbaafe Wolqaama Goday, Isra7eele Xoossay.
15 Hessafe guye, nabey Ermiyaasi, nabiya Hananako haysada yaagis: “Hananiya, si7a! Goday nena kiittibeenna; shin neeni ha asay wordoban ammanetana mela oothadasa. 16 Hessa gisho, Goday, ‘Ta nena sa7a bollafe diggana. Neeni ha asay ta bolla makallana mela oothida gisho ne ha laythi hayqana’ ” yaagis.
17 He laythi laapuntha ageenan nabey Hanaani hayqis.