1 “He wode taani Isra7eele zeretha ubbaas Xoosse gidana; entika ta ase gidana” yaagees Goday.

2 “Mashshafe attida asay mela biittan ta sinthan saba demmana. Taani Isra7eele asaas shempo immanaw yaana. 3 Taani entaw haaho bessafe qoncas; taani hintena merina siiquwan dosas; ta qadhiyan hintena taako shiishas. 4 Geela7o Isra7eele, ta hintena zaarada keexana; hinteka keexetana. Neeni karaabuwa zaara oykada, ufayteysatara neeni yexananne durana. 5 Samaare zumaa bolla woyne tokana; tokidaysati iya ayfiyan ufaytana. 6 Efreema gezze biittan naageysati, ‘Haa yiite; Godaako, nu Xoossaako, pude Xiyoone boos’ yaagidi xeegiya wodey yaana” yaagees Goday.

7 “Yayqooba asaas ufaysan yexite; kawotethata ubbaafe aadhiya Isra7eeles ililite. ‘Isra7eele asaape attidaysata ashsha’ yaagidi galata mazmure yexite. 8 Taani enta pudeha bagga biittafe ehana; sa7aa gaxape ta enta shiishana. Qooqeti, wobbeti, wodetha maccasatinne iqethi oykida maccasati entara issife yaana; daro asay banta biitta simmana. 9 Ta enta zaarada ehiya wode enti ufaysafe dendoysan yeekishenne woossishe yaana. Taani enta shaafa lanqiyara, enti dhubetonna giigida ogiyara kaalethana. Taani Isra7eeles aawa; Efreemi taw bayra na7a.

10 “Hinteno, kawotethato, Godaa qaala si7idi, haaho bessan, yuushoy abban teqetida biittatan, ‘Isra7eele laallidaysi I enta shiishana; henthanchoy ba wudiya heemmeysada I enta heemmana’ yaagidi awaajite. 11 Goday Yayqooba kochata wozana; I enta, entafe minneyisata kushepe ashshis. 12 Enti yidi Xiyoone zuma bolla ufaysan yexana; enti, Goday immiya keehatethan, kathan, woynen, zayten, dorsaninne mehen ufaytana. Enti haathe loythidi ushshida atakilte bessa mela gidana; enti zaaridi azzanokona. 13 He wode geela7oti ufaysan durana; panthatinne cimati ufaytana. Ta enta yeehuwa ufaysan laammana; ta enta minthethana; enta azzanuwa gisho enta ufaysana. 14 Taani kahinetas daro kathi immana; ta asay ta keehatetha kaallana” yaagees Goday.

15 “Yeehoynne zelelsi Rama kataman si7etis; Raheela ba naytas yeekasu; enti bayna gisho yeeho minthetho ixasu” yaagees Goday.

16 “Yeehuwa aggidi, hinte afuthaa quchite. Hinte oothida oosuwas woyto hinte ekana; morke biittafe hinte nayti simmana. 17 Hinte nayti banta biitta simmanaw de7iya gisho, hintew ufaysi de7ees” yaagees Goday.

18 “Efreema kochata zuuzuntha ta si7as. Enti, ‘Neeni nuna wadhetiboonna wofaanoda wadhadasa; nuka keedida. Neeni Godaa, nu Xoossaa gidiya gisho nuna zaara; nuuni neeko simmana. 19 Nu kase neepe haakidi bida; shin ha77i nu nagara paaxida. Ne nuna seerin, yeellatidi nu tiraa baqida. Nuuni nu na7atetha laytha nagaraa gisho, kawuyidanne yeellatida’ yaagidosona.

20 “Efreemi taw tuma al7onne ta dosiya na7a gidennee? Taani iya sunthaa denthiya wode ubban iya hassayayis. Hessa gisho, ta wozanay iya laamotees; ta iyaw daro qadhetayis” yaagees Goday.

21 “Hinte ogiyan malaata wothite; malaata mithi essite; hinte bida ogiya akeekite. Geela7o Isra7eele, simma; ne katamata gela. 22 Hinteno, ammanoy bayna Isra7eeleto, awude gakanaw toylatetii? Goday sa7a bolla oorathaba oothana; hessika maccasi adde yuushon eqana” yaagees Goday.

23 Ubbaafe Wolqaama Goday, Isra7eele Xoossay, haysada yaagees: “Taani Isra7eele asaa di7etethaafe zaarada ehiya wode Yihuda biittaninne iya katamatan enti, ‘Neno xillotethi aqiya bessaw, geeshsha deriyaw, Goday nena anjo’ yaagidi zaaridi odetana. 24 Yihudaninne Yihudan de7iya katamatan asay daana; goshshanchotinne henthanchoti banta wudiyara yan daana. 25 Taani daaburanchota gashtisana; qassi koshatidi gilqidaysata kalsana” yaagees Goday.

26 He wode barkada ta yuushuwa xeellas; ta dhiskoy taw mal7o dhisko gidis.

27 “Taani Isra7eeleninne Yihudan asenne mehe kunthiya wodey yaana. 28 Enta shoddanaw, laallanaw, shira yegganaw, dhaysanawunne gado ehanaw dendidaysada enta zaarada gimbanawunne tokanaw dendana” yaagees Goday.

29 “He wode asay, ‘Aawati qaw7e woyne ayfe min, nayta achay doccis’ yaagidi haasaya leemisoy attana. 30 Shin issoy issoy ba nagaran hayqana; qaw7e woyne ayfe miya oodeska iya achay doccana” yaagees Goday.

31 “Taani Isra7eeleranne Yihudara ooratha caaqo caaqana wodey yaana. 32 He caaqoy ta enta Gibxefe kessanaw enta kushiya oykida wode enta mayzatara caaqida caaquwa mela gidenna. Ta entaw azina mela gida uttinka enti ta caaquwa menthidosona” yaagees Goday.

33 “Shin taani he wodiyape guye Isra7eelera caaqana caaqoy haysa: taani ta higgiya enta guuggiyan wothana; enta wozanan xaafana. Taani enta Xoosse gidana; entika ta ase gidana. 34 Hizape guye, asi ba laggiya woyko ba ishaa, ‘Godaa era’ yaagidi tamaarsenna. Guuthafe gita gakanaw ubbay tana erana. Taani enta naaquwa atto gaana; enta nagaraa zaarada qopike” yaagees Goday.

35 Gallas poo7ana mela awa wothiday, qamma poo7ana mela ageenanne xoolinto kiittiday, abba qaathidi, beetay guummanaada oothey, iya sunthay Ubbaafe Wolqaama Godaa geeteteysi haysada yaagees. 36 “Ha eqidi de7iya medhetetha higgey ta sinthafe shaaretiko, he wode Isra7eele kochay ta dere gideysi merinaw attana” yaagees Goday.

37 “Bolla salota wadhanaw woyko garsa sa7aa baasoy eretanaw danda7iko, he wode ta Isra7eele zeretha ubbaa, enti oothida nagaraa gisho ta sinthafe diggana” yaagees Goday.

38 “Hanaani7eela shako Gimbiyafe doomidi, Maazane Pengiya gakanaw Yerusalaame katamay ta katama gididi, keexetiya wodey yaana. 39 He katamaa zaway wuloha baggafe bidi Gaareba zumanne Go7a yuushuwa gakanaw dalgana. 40 Aha moogiyanne bido yeggiya zangaaraynne Qediroona Zangaarape qommora doloha baggara bidi, Para Penge maazaniya gakanaw de7iya biitta ubbay Godaas dummatidi, geeshshi gidana. Hizape guye, katamay merinaw shodetenna; laaletenna” yaagees Goday.