1 Yihuda kawoy Sedeqiyaasi kawotida tammantho laythan, Babiloone kawoy Nabukadanaxoori kawotida tammanne hospuntho laythan Godaape ha qaalay Ermiyaasako yis. 2 He wode Babiloone kawa olanchoti Yerusalaame teqidosona; nabey Ermiyaasi Yihuda kawo gadhon de7iya, naageysata dabaaban iya bolla gordetin de7ees.

3 Yihuda kawoy Sedeqiyaasi iya haysada yaagidi qachidi wothis: “Ne ayis haysada yaagada tinbite oday? ‘Goday ha katamaa Babiloone kawa kushen aathidi immana; I iya oykana’ yaagada ayis oday. 4 Yihuda kawoy Sedeqiyaasi Babiloone aadhidi imetana; I Babiloone kawa kushen gelana. Iya sinthan eqidi, iyara odetana; I ba ayfen iya be7ana. 5 Nabukadanaxoori Sedeqiyaasa Babiloone efana; ta iyabaa be7ana gakanaw I yan daana. Neeni Babiloonetara oletanaw qopiko, hessi new hanenna” yaagees Goday.

6 Ermiyaasi, “Godaa qaalay he wode taako haysada yaagidi yis” yaagis.

7 “Ne aawa isha Saluma na7ay, Hanami7eeli neeko yidi, ‘Wozanaw maati de7iya mata dabboy nena gidiya gisho Anatoota kataman de7iya ta gadiya shamma’ yaagana. 8 Goday gidaysada, ta aawa ishaa na7ay Hanami7eeli taako naageysata dabaaba yidi, ‘Wozanaw maati de7iya mata dabboy nena gidiya gisho, Biniyaame biittan Anatootan de7iya ta gadiya shamma’ yaagin, taani hessa odiday Godaa gideysa eras.

9 “Anatoota kataman de7iya gadiya ta aawa ishaa na7aa Hanami7eelape shammas. Iya gatiya mizaanen likin, tammanne laapun bira santime gidis. 10 Shama pirimaa markati de7iya bessan paramas; gordas; maatame iya bolla wothas; miishiya mizaanen likada iyaw immas. 11 Hessafe guye, taani zal7iya hanota qoncisiya ashshagetidi attametida shama pirimaanne attametiboona shama pirimaa ekas. 12 Ta aawa ishaa na7ay Hanami7eeli, shama pirimaa paramida markatinne naageysata dabaaban uttida Ayhudeti ubbay be7ishin, he shama pirimaa Mahiseya na7aa, Neera na7aa Baarokas immas. 13 Enta sinthan ta Baaroka haysada yaagada kiittas: 14 ‘Ubbaafe Wolqaama Goday, Isra7eele Xoossay, haysada yaagees: Daro wode gam7ana mela ha ashshagetidi attametida pirimaanne attametiboona pirimaa efada oton wotha.’ 15 Ubbaafe Wolqaama Goday, Isra7eele Xoossay, haysada yaagees: ha biittan asay zaaridi keethe, gadenne woyne tokiya bessi shammana” yaagees Goday.

16 Taani Neera na7aa Baarokas shama pirimaa warqatiya immidaape guye, haysada yaagada woossas. 17 “Abeeti Ubbaa Haariya Godaw, ne salotanne sa7aa ne gita wolqaaninne ne micetida kushen medhadasa. New danda7etonnabay baawa. 18 Neeni ne siiquwa mukulu asaas bessaasa; shin aawata nagaraa enta nayta bolla zaarasa. Abeeti gitanne wolqaama Xoossaw, ne sunthay Ubbaafe Wolqaama Godaa geetetees. 19 Ne halchoy gita; ne oothiya oosoy wolqaama. Asa oge ubbaa ne be7aasa; asa ubbaas iya ogiyadanne iya oosuwada zaarasa.

20 “Ne Gibxen malaatanne mallata oothadasa; hachi gakanaw ha mallata Isra7eele asaa giddoninne hara kawotethata ubbaa giddon ooso aggabaaka. Hessafe dendoysan ne sunthay ubba bessan eretis. 21 Neeni ne asaa Isra7eele Gibxefe malaataninne mallatan, ne mino qesiyan, ne micetida kushiyaninne gita dagaman kessadasa. 22 Enta mayzatas ne immanaw caaqida biitta, maathinne eessi goggiya biitta entaw immadasa. 23 Enti he biitta gelidi laattidosona. Shin enti new kiitetibookona; ne higgiya naagibookona; enti oothana mela ne kiitida ubbaa oothibookona. Hessa gisho, ne enta bolla ha gaduwa ubbaa ehadasa.

24 “Babiloone asay katamaa oykanaw gimbiya yuushuwan biitta dooridi teqidosona. Olape, koshapenne boshape dendoysan katamay enta oliya Babiloone kushen aadhidi imetis. Ne ha77i be7eysada ne gidaba ubbay poletis. 25 Abeeti Ubbaa Haariya Godaw, katamay Babiloone asaas imetanaw haniya wodeka ne tana, ‘Marka xeegada, miishen gadiya shamma’ gadasa” yaagada woossas.

26 Hessafe guye, Godaa qaalay Ermiyaasako haysada yaagidi yis: 27 “Taani Godaa, asa ubbaa Xoossaa. Taw danda7etonnabay de7ii?” yaagis. 28 Taani ha katamaa Babiloone asaasinne Babiloone kawa Nabukadanaxooras aathada immana; enti iya oykana. 29 Ha katama teqida Babiloone asay yidi, katamaa taman xuuggana; pooqiya bolla Ba7aale eeqas ixaane cuyisishenne hara xoossatas ushsha yarsho gussishe tana hanqethida asay de7iya keethatika xuugetana. 30 “Isra7eeleynne Yihudi banta na7atethafe doomidi, ta sinthan iitabaape attishin, lo77oba, oothibookona; enti banta kushen oothida oosuwan tana hanqethidosona. 31 Ha katamay keexetida wodepe hachi gakanaw, ha katamaa asay tana daro hanqethida gisho ha katamaa ta sinthafe dhaysana. 32 Isra7eeleynne Yihudi, enta kawotinne halaqati, enta kahinetine nabeti oothida iita ooso ubban tana yiloyidosona. 33 Enti banta som7uwa gidonashin, banta zokuwa taw zaaridosona. Ta enta zaara zaarada tamaarsinka, enti si7ibookona woyko seera ekibookona. 34 Enti ixetida banta eeqata ta sunthay xeegetida keethan essidi tunisidosona. 35 Enti banta adde naytanne macca nayta Moloka eeqas yarshanaw Hinooma Zangaaran Ba7aale eeqas yarsho dhoqa bessata giigisidosona. Enti hessa oothana mela ta kiittabike; Yihuda asay nagara oothana mela hessa enti oothana gada ta naagabike” yaagis.

36 “Neeni, ‘Ha katamay olan, koshaninne boshan Babiloone kawa kushen aadhidi imetana’ yaagida ha katamaaba Goday Isra7eele Xoossay haysada yaagees. 37 Ta suulliya hanquwaninne gita sheniyan enta laallida biitta ubbaafe shiishada ha bessaa zaara ehada, enti sarotethan daana mela oothana. 38 Enti ta ase gidana; ta enta Xoosse gidana. 39 Enti taw merinaw yayyana mela, ta entaw issi wozananne issi oge immana; hessi entawunne entafe guye enta naytas lo77o gidana. 40 Taani entara merinaw caaqana; he caaquwan ta entaw lo77oba ooso aggike. Enti tana aggidi guye simmonna mela enti taw yayyana mela oothana. 41 Ta entaw lo77oba ootheysi tana ufaysees; ta kumetha wozanapenne ta kumetha shempuwafe tuma ha biittan enta tokana” yaagees Goday.

42 “Ta ha asaa bolla iita bosha ubbaa ehidaysada ta entaw immana gida lo77oba ubbaa immana. 43 Hinte, ‘Ha biittay asaynne mehey bayna baysa biitta gidana; I Babiloonetas imetis’ yaagida biittan asay zaaridi gade shammana. 44 Ta enta zaarada ehiya gisho, asay gade shammana; marka sinthan zal7iya hanota qoncisiya pirima paramidi, maatame wothana. Haysi ubbay Biniyaame biittan, Yerusalaame yuushuwan de7iya heeratan, Yihuda katamatan, derey dariya katamatan, gadha katamataninne Negebe mela biittan de7iya katamata ubban hanana” yaagees Goday.