1 Ermiyaasi buroo naageysata dabaaban qashetidi de7ishin, Godaa qaalay zaaridi iyako yis. 2 Sa7aa medhida Goday, giigisidi iya bessan wothida Goday, iya sunthay Godaa geeteteysi haysada yaagees: 3 “Tana xeega; ta new koyana; ne eronna gitabaanne wolqaamaba ta new qoncisana.” 4 Goday, Isra7eele Xoossay, Babiloone olaa, biitta doorethaanne, di7etetha teqana mela dirsa gimbiya minthanaw laallida ha katama keethatabaanne Yihuda kawota gadhotaba haysada yaagees. 5 Enta iitatetha gaason, ta ha katamaa bollafe ta som7uwa denthida gisho, hintera oletanaw taani ta hanquwan shocana asaa ahan ha bessan kunthanaw Babilooneti gelana.

6 Gidoshin, “ta ha katamaanne iyan de7iya asaa zaarada pathana; enta payyatetha zaarana; saronne wopa duussu entaw immana. 7 Taani Yihuda asaanne Isra7eele asaa di7ope zaarana; enti kase de7idaysada oothada enta gimbana. 8 Enti tana oothida nagara ubbaafe ta enta geeshshana; enti naaquwanne enta makalla ubbaa atto gaana. 9 Yerusalaame katamay taw ufaysi, bonchonne galata sa7an de7iya kawotethata ubbaa sinthan ehana. Taani Yerusalaame asaas oothiya lo77obaanne katamaas ehiya duretethaanne sarotethaa si7idi, kawotethati ubbay yashshan kokorana” yaagees Goday.

10 “Hinte, ‘Asinne mehey bayna baysa’ gida ha bessan, asinne mehey bayna Yihuda katamataninne Yerusalaame ogetan ufaysinne ililsa girsi si7etana. 11 Yethinne Yaagano girsi, ufaysa girsi, hessadaka, xoossa keethi galata yarsho ehidi,

12 “Ha asaynne mehey bayna baysa biittaninne iyan de7iya katamatan henthanchoti banta dorsa wudiya heemmiya gadey daana. 13 Gezze katamatan, gadha katamatan, Negebe mela biittan de7iya katamatan, Biniyaame biittan, Yerusalaame yuushuwan de7iya bessataninne Yihuda katamatan henthanchoti banta dorsata zaaridi taybana” yaagees Ubbaafe Wolqaama Goday.

14 “Taani Isra7eele asaasinne Yihuda asaas gelida qaala poliya wodey yaana. 15 He wode taani Dawita kochaafe issi xillo Aaca denthana; I suure pirda pirdana; xillo oothana. 16 He wode Yihuda asay attana; Yerusalaame asay wopu gidi de7ana. Ha katamay, ‘Goday nu Xillotethaa’ geetetidi xeegetana. 17 Dawita kochaafe Isra7eele araatan uttiya asi dhayenna. 18 Hessadaka, xuussa yarsho, katha yarshonne hara yarsho yarshanaw Leewe kochaafe kahine gidiya asi merinaw ta sinthafe dhayenna” yaagees Goday.

19 “Godaa qaalay Ermiyaasako haysada yaagidi yis. 20 Gallasasinne qammas ta wothida wogaa menthidi, gallasinne qammi banta wodiyan simeretonna mela oothidi ta caaquwa laammanaw hinte danda7iko, 21 iya kochaafe araatan uttiya asi dhayonnaada, ta aylliya Dawitara caaqida caaquwa laammana; taw oothiya, Leewe koche gidida kahinetara caaqida caaquwa laammana. 22 Taani ta aylliya Dawita kochaanne ta sinthan oothiya Leewe kocha taybanaw danda7etonna salo xoolintotadanne makanaw danda7etonna abba shafiyada darsana” yaagees Goday.

23 Godaa qaalay qassika Ermiyaasako haysada yaagidi yis. 24 “Ha asay, ‘Goday ba doorida nam7u kawotethata, Isra7eelenne Yihuda aggaagis’ yaagidi odeteysa ne akeekabikii? Enti ta asaa kadhidi, bana danda7ida kawotethi gidokona gidi qopoosona. 25 Taani gallasaranne qammara caaqida caaquwanne salonne sa7a higgiya minthaboonnaba gidiko, 26 Yayqooba zerethaanne ta aylliya Dawita kochaa aggaagana. Iya naytape Abrahaame, Yisaaqanne Yayqooba kochata bolla kawothanaw Dawita kochaa doorike. Taani ta asaa maarana; enta shaluwa zaarana” yaagees Goday.