1 Iyosyaasa na7ay Yihuda kawoy Iyo7aqeemi kawotida oyddantho laythan, Goday Ermiyaasako haysada yaagis: 2 “Issi xaatha maxaafaa ekada, Iyosyaasa wode taani new odo doomida koyro gallasape doomada, hachi gakanaw Isra7eele bolla, Yihuda bollanne hara kawotethata bolla taani odida qaala ubbaa xaafa. 3 Ta Yihuda asaa bolla ehana gada halchida bosha ubbaa si7idi, ooni eri, enti banta iita oosuwape simmana; ta enta naaquwanne enta nagaraa atto gaana” yaagis.

4 Hessa gisho, Ermiyaasi Neera na7aa Baaroka xeegidi, Goday iyaw odidaba ubbaa Baarokas odin, I xaatha maxaafan xaafis. 5 Hessafe guye, Ermiyaasi Baarokako, “Taani qasho keethan de7iya gisho, xoossa keethi gelanaw danda7ike. 6 Hessa gisho, ne xooma gallas xoossa keethi bada, ta odin, ne xaatha maxaafan xaafida Godaa qaala entaw nabbaba; banta katamatape yida Yihuda asa ubbaas nabbaba. 7 Ha asaa bolla Goday awaajida hanqoy gita gidiya gisho, ooni eri, enti banta iita oosuwape simmidi, Godaa woossana” yaagis. 8 Neera na7ay Baaroki nabey Ermiyaasi kiittidaysada xoossa keethan Godaa qaala ubbaa nabbabis.

9 Iyosyaasa na7ay Yihuda kawoy Iyo7aqeemi kawotida ichashantho laythan, uddufuntho ageenan, Yerusalaamen de7iya asaasinne Yihuda katamatape yida asa ubbay Godaa sinthan xoomana mela awaajidosona. 10 Baaroki Xoossa keethan, qommo bagga dabaaban, Ooratha Penge geetetiya bessan, xaafiya Safaana na7aa, Gamaara kifiliyan eqidi, Ermiyaasa qaalay xaafetida xaatha maxaafa asa ubbaas nabbabis.

11 Safaana na7aa na7ay, Gamaara na7ay Mikayi maxaafape Godaa qaala Baaroki nabbabishin si7ida wode, 12 kawo gadhon xaafey uttiya kifiliya bis. I biya wode, xaafey Elishami, Shamaya na7ay Dali, Akboora na7ay Elnaatani, Safaana na7ay Gamaara, Hananiya na7ay Xidiqenne hara halaqati yan uttidosona. 13 Baaroki asas maxaafape nabbabishin si7ida qaala ubbaa Mikayi entako odis. 14 Halaqati Naatana na7aa Yihuda Baarokako kiittidi, “Asaas neeni nabbabida maxaafaa ekada haa ya” yaagidosona. (Naatani Salama na7a; Salami Kuusa na7a.) Baaroki maxaafaa ekidi, entako yis. 15 Entika iya, “Ane uttada, nuus maxaafaa nabbaba” yaagidosona.

Yaagin Baaroki maxaafaa nabbabis. 16 I nabbabida qaala ubbaa si7idi yayyidosona, issoy issuwa xeellidi, Baaroka, “Ha qaala ubbaa nuuni kawas odanaw koshshees” yaagidosona. 17 Qassika zaaridi, “Neeni ha qaala ubbaa waatada xaafidaako nuus oda. Haysa new Ermiyaasi odin xaafadii?” yaagidosona.

18 Baaroki, “Ee, ha qaala ubbaa Ermiyaasi ba doonape taw odis; taani qalamen ha xaatha maxaafan xaafas” yaagis.

19 Enti Baaroka, “Neeninne Ermiyaasi bidi qosetite; hinte de7iya bessaa oonika eropo” yaagidosona.

20 Halaqati maxaafa xaafiya Elishama kifilen wothidaape guye, kawoy de7iya dabaaba bidi, hanidaba ubbaa kawas odidosona. 21 He maxaafaa ehana mela, kawoy Yihuda kiittis; xaatha maxaafaa Elishama kifilepe ehidi, kawasinne iya yuushuwan eqida halaqatas nabbabis. 22 Uddufuntho ageenan sa7i balgo gidiya gisho, kawoy balguwa aathiya keethan uttis. He wode kawa sinthan de7iya coociyan Tami eexees. 23 Yihudi heedzu woyko oyddu bessata nabbabidaape guye, kawoy he bessata xaatha maxaafape mashshan qanxi qanxidi, taman yeggis; hessada oothidi, maxaafa kumethi xuuggis. 24 Ha qaala si7idi kawoynne iyara oothiya moorinnati ubbay ayinne babibookona; woyko kayotidi, banta ma7uwa peedhibokonna. 25 Hari attoshin Elnaatani, Dalaynne Gamaari kawoy he maxaafaa xuuggonna mela woossinka, enta woosa si7onna ixis. 26 Kawa na7a Yirahima7eela, Aziri7eela na7aa Sarayanne Abdi7eela na7aa Selema, xaafiya Baarokanne nabiya Ermiyaasa oykana mela kawoy kiittis. Shin Goday enta qottis.

27 Ermiyaasi odin, Baaroki xaafida maxaafaa kawoy xuuggidi simmin, Godaa qaalay Ermiyaasako haysada yaagishe yis: 28 “Hara xaatha maxaafaa ekada, Yihuda kawoy Iyo7aqeemi xuuggida xaatha maxaafan de7iya qaala ubbaa zaarada xaafa. 29 Qassi Yihuda kawa Iyo7aqeema haysada yaaga: Goday haysada yaagees; Neeni, ‘Babiloone kawoy yidi, ha biitta dhaysana; qassi yan de7iya asaanne mehiya wursana’ gada ayis xaafadii?” yaagada maxaafaa xuuggadasa.

30 “Hessa gisho, Goday Yihuda kawa Iyo7aqeema haysada yaagees: Dawita araatan uttiya kochay new kumthi deenna. Ne ahay coo holetidi, gallasi awa suulos, qamma meegon shocetana. 31 Hinte nagaraa gisho nena, ne kochaanne neera oothiya moorinnata ubbaa seerana. Enti taani odidaba si7onna ixida gisho, ta gida iitaba ubbay hinte bolla, Yihudaninne Yerusalaamen de7iya asa ubba bolla ehana” yaagees.

32 Hessafe guye, Ermiyaasi hara xaatha maxaafaa ekidi, Neera na7aa xaafiya Baarokas immis. Baaroki Yihuda kawoy Iyo7aqeemi taman xuuggida xaatha maxaafaa qaala ubbaa Ermiyaasi iyaw doonan odin xaafis. Qassi Ermiyaasi hessa daaniya hara qaalaka gujin, ubbaka Baaroki xaafis.