1 Babiloone kawoy Nabukadanaxoori Iyo7aqeema na7aa Ikoniyaana bessan Iyosyaasa na7aa Sedeqiyaasa Yihuda biittan kawothis. 2 Sedeqiyaasi, iyara oothiya halaqatinne biittan de7iya asa ubbay, Goday nabiya Ermiyaasa baggara odida qaalas kiitetibookonna. 3 Shin kawoy Sedeqiyaasi Selema na7aa Yokaalanne Ma7iseya na7aa kahiniya Sofoniyaasa, “Hayyana, nu gisho Godaa nu Xoossaa woossa” yaagidi Ermiyaasako kiittis.

4 He wode Ermiyaasi qasho keethi geliboonna gisho, asaa giddon simeretees. 5 Gibxe kawa olanchoti, Gibxefe keydaysa Yerusalaame teqida Babiloone olanchoti si7ida wode Yerusalaame yeddidi keyidosona.

6 Hessafe guye, Godaa qaalay nabiya Ermiyaasako yis. 7 “Goday Isra7eele Xoossay haysada yaagees: tana oychana mela hintena taako kiitida Yihuda kawas haysada yaagite; ‘Hintena maaddanaw yida Gibxe kawa olanchoti banta biitta simmidi baana. 8 Qassi Babiloone olanchoti simmidi yaana; ha katamaa olidi oykana; taman iya xuuggana’ yaagite.

9 “Babiloone olanchoti simmidi yuussay attonna gisho ‘Babiloone olanchoti yookona’ gidi hintena hintew cimmofite. 10 Hinte Babiloone olanchota kumethi xooniyakoka, madunxidi, dunkaanen zin7idaysati dendidi, ha katamaa taman xuuggana” yaagees Goday.

11 Gibxe kawa olanchoti matida gisho, Babiloone olanchoti Yerusalaame aggidi banta de7iya bessaa guye simmidosona. 12 He wode Ermiyaasi ba gisho biitta ekanaw Biniyaame biitta baanaw Yerusalaamepe dendis. 13 Gidoshin, I bidi, Biniyaame Penge gakiya wode pengiya naageysatape issoy, Hananiya na7ay, Saleema na7a Yeera, “Ne nuna kaddada Babiloone baasa gidikii?” yaagidi oykis.

14 Ermiyaasi zaaridi, “Ne geysa mela ta Babiloone biya asi gidike” yaagis. Shin Yeerey I geysa si7onna ixidi Ermiyaasa oykidi halaqatako efis. 15 Halaqati daro hanqetidi, Ermiyaasa wadhi, enti qasho keethi oothida, xaafiya Yoonataana keethan iya qachidosona. 16 Ermiyaasi yan biitta garsan de7iya kifiliyan daro wode gam7is.

17 Hessafe guye, kawoy Sedeqiyaasi ase kiittidi, Ermiyaasa ba kawo gadho xeegisidi, dumma qosan iya, “Goday new odidabay de7ii?” yaagidi oychis.

Ermiyaasi zaaridi, “Ee de7ees; neeni Babiloone kawa kushen aadhada imetana” yaagis 18 Qassika Ermiyaasi kawa Sedeqiyaasa haysada yaagidi oychis: “Tana hinte qasho keethan yegganaw ta ne bolla, new oothiya halaqata bolla woyko ha asaa bolla ay bala oothadina? 19 Yaatin, ‘Babiloone kawoy yidi hintenanne hinte biitta olenna’ yaagidi new tinbite odida ne nabeti ha77i awun de7oona? 20 Ta godaw, kawaw, si7a; ta oychiya issiba ne polana mela nena woossayis. Ta he bessan hayqonna mela iya keethay qasho keethi gidida xaafiya Yoonataana soo tana guye zaaropa” yaagis.

21 Kawoy Sedeqiyaasi naageysata dabaaban Ermiyaasa daana mela kiittis. Yan I de7ishin katamape daabboy dhayana gakanaw gallas gallas issi issi daabbo uukiya bessaafe ehidi iyaw immoosona. Hessa gisho, Ermiyaasa kawa zaban gam7is.