1 Mataana na7ay Safaaxi, Phaskora na7ay Godoliya, Selema na7ay Yokaalinne Malkaya na7ay Phaskori Ermiyaasi asa ubbaas odida qaala si7idosona. 2 Ermiyaasi, “Ha kataman attiya oonika olan, koshaninne boshan hayqana. Shin Babiloonetas ba kushe immiya oonika hayqenna; attana; de7on daana. 3 Yerusalaame katamay Babiloone kawa olanchota kushen aadhidi imetana; entika iya polo di77ana” yaagees Goday.

4 Hessafe guye, halaqati kawako bidi, “Ha addey hayqanaw koshshees; haysa mela oda odidi, ha kataman de7iya olanchotinne asa ubbay shuggana mela oothis. I ase qohiyaba amotteesipe attishin, saroba amottenna” yaagidosona.

5 Kawoy Sedeqiyaasi zaaridi, “Hinte iya bolla oothana gidaba ta hintena digganaw danda7ike” yaagis. 6 Enti Ermiyaasa kawo gadho dabaaban de7iya, kawa na7aa Malkaya haatha ollan, wodoron duge yeggidosona. He wode he ollan silimope attishin, haathi baawa; Ermiyaasi he silimuwa giddo gelis.

7 Shin Tophe ase gidida, kawo morinay, Abemeleke geetetiya addey Ermiyaasi ollan yegetidaysa si7is. He wode kawoy Biniyaame Penge pirda oyden uttis. 8 Ebed-Meleki kawako bidi, haysada yaagis; 9 “Ta godaw kawaw, ha asati gita iitabaa oothidosona; enti nabiya Ermiyaasa haatha ollan yeggidosona. Qassi kataman qumi bayna gisho I yan koshan hayqana” yaagis.

10 Kawoy zaaridi, Tophe addey Ebed-Melekako, “Hastamu asi neera eka bada, Ermiyaasi hayqonna de7ishin haatha ollafe kessite” yaagis.

11 Ebed-Meleki ase ekidi, bidi kawo gadhon shalo minjiya keethaafe garsa baggara de7iya kifiliya gelidi, gal7a ma7onne curqa ekis. He curqa wodoruwa xeeran qachidi, Ermiyaasas duge olla giddo yeddis. 12 Tophe addey Ebed-Meleki Ermiyaasa xeegidi, “Ha curqa ma7uwa wodoruwape garsara ne shophiyan wotha” yaagis. Ermiyaasi I gidaysada oothis. 13 Enti wodoruwara goochidi, Ermiyaasa ollaafe kessidi, naageysata keethi gelsidi gordidosona.

14 Hessafe guye, kawoy Sedeqiyaasi Ermiyaasa kiittidi ehisidi, xoossa keethi geliya heedzantho pengiya matan, “Ta nena issiba oychana; ne taape qosopa” yaagis.

15 Ermiyaasi zaaridi, “Ta odiko, ne tana wodhikii? Ta zorin ne si7aka” yaagis.

16 Kawoy Sedeqiyaasi, “De7o Xoossay eriya mela, ta nena wodhike; nena wodhanaw koyeysatas aathada immike” yaagidi qosan Ermiyaasas caaqis.

17 Ermiyaasi zaaridi, “Goday, Ubbaafe Wolqaama Xoossay, Isra7eele Xoossay haysada yaagees: ‘Babiloone kawa halaqatas ne kushe immiko, ne paxa attana; ha katamay taman xuugetenna; nenne ne keetha asay de7on daana. 18 Shin ne entaw kushe immonna ixiko, ha katamay Babiloonetas aadhidi imetana; enti iya xuuggana; ne entafe kessa ekaka’ ” yaagis.

19 Kawoy Sedeqiyaasi, “Ta yayyey ha biitta kaddidi, Babiloone bida Ayhudetasa. Babilooneti tana enta kushen aathidi immin, Ayhudeti tana kaa7ana” yaagidi zaaris.

20 Ermiyaasi, “Aykoy baawa! Enti nena entaw aathidi immokona. Ta odiya Godaa qaalas hayyana kiiteta. Hessi new lo77o gidana; ne paxa attana. 21 Shin ne kushe immonna ixiko, Goday tana bessida qoncethi de7ees. 22 Hessika, Yihuda kawo gadhon attida maccasati ubbay di7etidi, Babiloone halaqatako baana. Enti neeko, ‘Ne mata laggeti nena balethidosona; enti nena xoonidosona. Shin ha77i ne tohoy silimo giddo gelin, he laggeti nena yeggidi bidosona’ yaagana. 23 Ne machetinne ne nayti ubbay Babiloone di7etidi baana. Ne enta kushepe kessa ekaka. Babiloone kawoy nena oykana. Ha katamay taman xuugetana” yaagis.

24 Sedeqiyaasi zaaridi, “Haysa ne taw odidaysa asas odonna ixiko ne hayqaka. 25 Halaqati ta neera odetidaysa si7idi, ‘Neera kawara ay odetidaako nuus oda. Ne nuus qottonna ixiko, nu nena wodhoko’ yaagidi oychana. 26 Neeni, ‘Ta yan hayqonna mela tana zaarada qasho keethi gidida Yoonataana soo yeddonna mela kawa woossas’ ” gada zara yaaga.

27 Hessafe guye, halaqati ubbay Ermiyaasako yidi, he oysha oychidosona. Kawoy iya kiittidaysada entaw odis; Ermiyaasara kawara haasayishin si7ida asi bayna gisho enti si77i gidoosona. 28 Yerusalaamey oyketana wodey gakanaw, Ermiyaasi naageysata dabaaban gordetidi gam7is.