1 Gibxen Migdoola, Xafinaasa, Mempisanne Phatiroosa biittan de7iya Ayhudetas Godaa qaalay Ermiyaasako haysada yaagidi yis. 2 “Ubbaafe Wolqaama Goday, Isra7eele Xoossay, Yerusalaame bollanne Yihuda katamaa ubbaa bolla ta ehida dhayo ubbaa hinte, hinte ayfen be7ideta. Enti hachi gakanaw laaletidi attidosona; oonika yan deenna. 3 Hessi haniday, enti iita ooso oothidi, tana hanqethida gishosa. Enti woyko hinte woyko hinte mayzati eronna hara xoossatas ixaane cuyisidi entaw goyinnidosona. 4 ‘Ta ixiya haysa mela iitabaa oothopite’ yaagidi odana mela zaara zaara ta aylleta, nabeta kiittas. 5 Gidoshin, enti si7onna woyko akeekona ixidosona. Hara xoossatas ixaane cuyisiya iita oosuwa aggonna ixidosona. 6 Hessa gaason ta suulliya hanqoynne yiloy Yihuda katamata bollanne Yerusalaame ogetan eexis. Enti hachi hinte be7eysada laaletidosona; baysa gididosona.

7 “Ha77ika Goday, Ubbaafe Wolqaama Xoossay, Isra7eele Xoossay, haysada yaagees; hinte kochay attonna mela, maccasa, addeta, naytanne yooga nayta Yihuda biittafe dhaysanaada iitabaa hinte, hinte bolla ayis oothetii? 8 Hinte daanaw yida Gibxe biittan hara xoossatas ixaane cuyisidi tana ayis hanqethetii? Sa7an de7iya kawotethata ubbaa giddon baadethasinne bores attidi, hintena dhaysanaw ayis koyeetii? 9 Kase hinte aawati, Yihuda kawotinne enta macheti, hintenne hinte macheti Yihuda katamataninne Yerusalaame ogetan oothida iita ubbaa dogidetiyee? 10 Hinte hachi gakanaw hintenatethaa kawushibeketa; tana bonchibeeketa. Ta hintewunne hinte mayzatas immida higgiyanne woga kaallibeketa.

11 “Hessa gisho, Ubbaafe Wolqaama Goday, Isra7eele Xoossay, haysada yaagees; ta hintena, Yihuda zertheta ubbaa dhaysanaw qofa qachas. 12 Yihudan attida asaa giddofe, Gibxe bidi, yan daanaw qofa qachidaysata ta dhaysana. Enti ubbay Gibxen wurana; olaninne koshan hayqana. Gitape guuthu gakanaw de7iya ubbay olaninne koshan dhayana. Enti dagamas, cashshas, baadethasinne miichas attana. 13 Ta Yerusalaame, olan, koshaninne boshan seeridaysada Gibxe biittan de7eyisata seerana. 14 Attida Yihuda asaape Gibxe bidi de7eysati Gibxeta kushiyape polo kessi ekokona. Enti simmidi daana gidi amotiya Yihuda biitta ay asika simmenna. Guutha asape attishin, oonika simmidi yeenna” yaagis.

15 Enta macheti hara xoossatas ixaane cuyisethi eriya addey ubbay, yan de7iya maccasa ubbaynne gita maabara gididi, Gibxeninne Phatiroosan de7iya asa ubbay Ermiyaasako haysada yaagidosona. 16 “Neeni Godaa sunthan nuus odiyaba ubbaa nu si7oko. 17 Nu oothana gidi qopidaba ubbaa oothana. Nuuni, nu mayzati, nu kawotinne nu halaqati Yihuda katamataninne Yerusalaame ogetan kase oothidaysada Salo Kawiw geetetiyaris nu xoossees ixaane cuyisana; ushsha yarshuwa iw gussana. Nu kase hessa oothiya wode, nuus daro kathi de7ees; he wode nuus sa7i keeha; nuna aybika metibeenna. 18 Shin Salo Kawees ixaane cuyiseysanne ushsha yarsho gusseysa aggidaape guye, nuus ubbabay pacis; nu olaninne koshan wurida” yaagidosona.

19 Maccasati gujidi, “Nu Salo Kawees malan uythu uukiya wode, ixaane cuyisiya wodenne ushsha yarsho iw gussiya wode nu azinati eronna de7ishin, nu oothidabay aybika baawa” yaagidosona.

20 Haysada yaagidi zaarida asa ubbaas, maccasasinne addetas, Ermiyaasi haysada yaagis; 21 “Hintenne hinte mayzati, hinte kawotinne hinte halaqati, biittan de7iya asa ubbay, Yihuda katamataninne Yerusalaame ogetan ixaane cuyisidaysa Goday erenna woyko dogis gidi qopeetii? 22 Hinte oothiya iitanne shaatiya oosuwa Goday si77i gaanaw danda7iboona gisho, hinte biitta hachi hinte be7eysada laaletida, baysanne baadetida biitta oothis. 23 Ha dhayo ubbay hintena gakiday, hinte hara xoossatas ixaane cuyisida gishosa, Godaa bolla nagara oothida gishosa, Godaa qaala si7onna ixida gishosanne iya higgiya, iya wogaanne awaajuwas kiitetonna ixida gishosa” yaagis.

24 Hessafe guye, Ermiyaasi asa ubbaasinne maccasas haysada yaagis; “Hinteno, Yihudape yidi, Gibxe biittan de7iya asaw, Goday giyaba si7ite. 25 Ubbaafe Wolqaama Goday, Isra7eele Xoossay, haysada yaagees; hintenne hinte macheti, ‘Nuuni Salo Kawees ixaane cuyisana; ushsha yarshuwa iw gussana’ gidi caaqida caaquwa polidi, ooson bessideta. Hiza, guye goopite; hinte caaquwa polite.

26 “Gidoshin, hinteno, Gibxe biittan de7iya Yihuda asaw, Goday giyaba si7ite! Goday haysada yaagees; ‘Hizape guye Gibxe biittan de7iya Yihuda asaape issoyka ta sunthan, “Ubbaa Haariya Goday ero” ’ gidi caaqonna mela ta gita sunthan caaqas. 27 Ta enta bolla lo77oba gidonashin, iitabaa ehanaw minnayis. Gibxen de7iya Yihuda asay wurana gakanaw olaninne koshan hayqana. 28 Olape attida guutha asati Gibxefe Yihuda simmana. He wode Gibxen de7iya Yihuda asay, ta qaalapenne enta qaalape awusi tumeeko erana. 29 Ta hintena ha bessan seeriya wode, ‘Ta hinte bolla iitabaa ehana’ gidaysi tuma gideysas ta hintew malaata immana. 30 Ta Yihuda kawa Sedeqiyaasa iyaw morke gididi, iya wodhanaw koyiya Babiloone kawa Nabukadanaxooras aathada immidaysada Gibxe kawa Hofira iya wodhanaw koyiya iya morketas aathada immana” yaagees Goday.