46
Gibxes Odetida Tinbite
1 Kawotethatabaa Goday Ermiyaasas odida qaalay haysa. 2 Iyo7aasa na7ay Iyo7aqeemi Yihudan kawotida oyddantho laythan, Efraxiisa shaafa matan, Karkamisha geetetiya bessan, Babiloone kawoy Nabukadanaxoori xoonida Gibxe kawa Nako olanchotabaa Goday haysada yaagees.
3 Hinte tooranne gondalle giigisite;
olas keyite.
4 Hinte parata bixaalidi toggite;
hinte huuphiyan birata barneexa wothite.
Hinte bessaa bessaa oykite;
hinte toora leefite;
hinte ola ma7uwa ma7ite.
5 “Shin haysi ta be7ey aybee?
enti yayyidi guye simmidosona.
Wolqaamati xoonetidosona;
guye xeellonna baqatidosona;
Enta yuusho ubban dagami de7ees”
yaagees Goday.
6 Eesoteysi kessi ekenna;
minoyka attanaw danda7enna.
Pudeha baggan Efraxiisa shaafa matan,
ubbay dhubetidi kundidosona.
7 Haysi Nayle shaafa kixada dendey,
di7o haathada goggey oonee?
8 Gibxey Nayle shaafada dendees;
di7o haathada gupees.
Gibxey, “Taani kixada, biittan eellana;
katamatanne iyan de7iya asa ubbaa dhaysana” yaagees.
9 Parato, gupidi keyite;
para gaareto woxite.
Gondalle oykida Tophenne Puuxa asaw,
dongen dukiya Luuda asaw,
mino olanchoto, dendidi oletite.
10 He gallasay Godaa Ubbaafe Wolqaama Godaa gallas,
Goday ba morketa bolla halo keyiya gallas.
Iya mashshay kallana gakanaw enta maana;
alana gakanaw enta suuthaa uyana.
Goday, Ubbaafe Wolqaama Xoossay,
pudeha baggan Efraxiisa shaafa matan,
enta yarsho oothidi ekana.
11 Geela7ee, Gibxe macca naatte,
Galada biitta bada tiyetiya dhale eha.
Gidoshin, ne coo dhale darsaasape attishin,
new paxoy baawa.
12 Kawotethati ne yeella si7idosona;
ne yeehoy biitta ubbaa kumana.
Ne olanchoti issoy issuwan dhubetidi,
ubbay issife kundidosona.
13 Babiloone kawoy Nabukadanaxoori Gibxe olanaw yaanaysa, Goday nabiya Ermiyaasas odida qaalay haysa:
14 Haysa Gibxen oda;
Migdoolan, Mempisaninne Xafinaasan awaaja.
Hinte bessan bessan eqite; giigetite;
hinte yuushuwan de7iya ubbaa mashshi maana.
15 Hinte mino olanchoti ayis kundidee?
Goday enta sugida gisho gidennee?
16 Olanchoti dhubetidi kundidosona;
issoy issuwa, “Dendidi yedhite;
morke mashshafe attanaw,
nu asaako, nu biitta simmoos” yaagosona.
17 Enti yan Gibxe kawako,
“Ba qaada go7etonna coo wursiya odancho” gidi sunthana.
18 “Ubbaafe Wolqaama Godaa” geetetiya
kawoy haysada yaagees:
“Taani, ta shempuwan caaqayis;
dereta giddon Taabore Derey,
abba matan de7iya Qarmeloosa Derey,
aduqeysada aduqiya morkey hinte bolla yaana.
19 Hinteno, Gibxen de7eysato,
di7etidi baanaw giigite.
Mempisa katamay laaletidi,
oonika de7onna mela biitta gidana.
20 Gibxey lo77o ussa mela;
shin pudeha bagga biittafe yaa
boxiyan iya saxetana.
21 Miishey cigetin oothiya olanchoti
modhida wofaano mela.
Enta dhayo gallasay matida gisho,
enti seeretiya wodey gakida gisho,
enti issife guye simmidi baqatidosona;
enti banta bessan eqibookona.
22 Morkey wolqan sugidi yaa wode,
Gibxe asay baqatiya shooshada kolxana.
Morketi mithi qanxiya asada,
kalta ekidi iya bolla yaana.
23 Asay sixida wora qeexidi dhayseysada,
Gibxe asaa qanxidi wursana
Morketa tayboy boolepe daro;
enta taybanaw danda7etenna.
24 Gibxe macca na7iya kawuyana;
pudeha bagga asaas aadhada imetana.”
25 Ubbaafe Wolqaama Goday, Isra7eele Xoossay haysada yaagees. “Taani Tebisa xoossa Amoone, kawa paarona, Gibxe biittanne Gibxe xoossata, Gibxe kawotanne kawa paarona bolla zempiya ubbaa seerana. 26 Enta shempuwa koyiya Babiloone kawa Nabukadanaxoora kusheninne iya olanchota kushen aathada immana. Hessafe guye, Gibxe biittay kaseysada asi de7iya biitta gidana” yaagees Goday.
27 “Ta aylliyaw, Yayqooba yayyofa;
Isra7eele, dagammofa.
Nena haaho bessafe,
ne kochay di7etidi bida biittafe ashshana.
Yayqoobi simmidi, saron wopu gidi daana;
enta yashisiyabay deenna.
28 Ta aylliyaw, Yayqooba,
ta neera de7iya gisho, yayyofa.
Ta nena laallida kawotethata ubbaa dhaysana;
shin nena dhaysike.
Ta nena xillo pirdan seerana;
shin seeri bayna nena coo aggike” yaagees Goday.