1 Sedeqiyaasi kawotiya wode, iyaw laythi laatamanne issino; I Yerusalaamen tammanne issi laythi kawotis. Iya aaye sunthay Amxaalo; iya Libina kataman de7iya Ermiyaasa na7a. 2 Iyo7aqeemi oothidaysada Sedeqiyaasi Godaa sinthan iitabaa oothis. 3 Goday Yerusalaame bollanne Yihuda bolla hanqetida gisho enta ba sinthafe diggis.

Sedeqiyaasi Babiloone kawa bolla makallis. 4 Sedeqiyaasi kawotida uddufuntho laythan, tammantho ageenan, tammantho gallasan Babiloone kawoy Nabukadanaxoori ba olanchota ubbaa ekidi, Yerusalaame teqis. Enti iya yuushuwan biitta dooridosona. 5 Sedeqiyaasi kawotida tammanne issintho laythi gakanaw, Yerusalaamey teqetidi gam7is.

6 He laythi oyddantho ageenan, uddufuntho gallasan, koshi suullin, asay miyaba dhayis. 7 Katama gimbey issi baggara meqis. Babiloone asay katamaa yuushuwa naagikoka, Yihuda kawa olanchoti ubbay qamma kawo atakilte bessaa efiya ogiya oykidi, nam7u dirsaa gimbeta issife gathiya pengiyara keyidi baqatidosona. Enti Yordaanose zangaarako simmidi bidosona. 8 Shin Babiloone olanchoti kawa Sedeqiyaasa yedethidi, Iyaarko demba gathishe oykidosona. Iya olanchoti ubbay iya kaddidi laaletidosona. 9 Hessafe guye, iya Hamaata biittan, Irbila kataman de7iya Babiloone kawako efidosona. Yan Nabukadanaxoori Sedeqiyaasa bolla pirdis. 10 Sedeqiyaasa adde nayta Sedeqiyaasi xeellishin, Babiloone kawoy wodhis. Yihuda halaqata ubbaa yan Irbila kataman wodhidosona. 11 Sedeqiyaasa ayfeta woocidi, santhalaatan qachidi, Babiloone efidosona. I hayqana gakanaw, yan qasho keethan iya wothidosona.

12 Nabukadanaxoori Babiloonen kawotida tammanne uddufuntho laythan, ichashantho ageenan, tammantho gallasan, kawa moorinnay, kawa naageysata halaqay Nabuzardaani Yerusalaame gelis. 13 Xoossa keethaa, kawo gadhonne Yerusalaamen de7iya keethata ubbaa taman xuuggis; qassi gita keethata ubbaa xuuggis. 14 Babiloone olanchoti ubbay kawa naageysata halaqaa kiitan, Yerusalaame katamaa yuushuwan de7iya dirsa gimbiya ubbaa laallidosona. 15 Nabuzardaani guutha manqota, kataman attida asata, kaddidi Babiloone olanchotan gelida asatanne kushe hiillanchota di77idi Babiloone efis. 16 Shin Nabuzardaani manqotape guutha asaa woyne tokanaadanne gade goyanaada Yihudan aggis.

17 Babilooneti Xoossa keetha karen eqida naase birata tuuqeta, caana gaaretanne gita kereta mentherethidi, naase birata ubbaa Babiloone efidosona. 18 Kereta, akaafata, xompe shaluwa xeera pittiyabata, xaarota, ixaane saanetanne yarsho wode go7etiya naase birata miisheta ubbaa efidosona. 19 Kawa naageysata halaqay Nabuzardaani worqafenne birape oosetida disteta, tama ekiya miisheta, xaarota, laafa kereta, xompe wothiya kocata, ixaane saanetanne ushsha yarshos go7etiya otota efis. 20 Kawoy Solomoney Xoossa keethan oosetiyabas medhida nam7u tuussati, gita kereta, tammanne nam7u kormata misiletinne caana gaareti medhetida naase biratati mizaanen likanaw danda7etenna. 21 Nam7u tuussati issi mela gididi, issoy issoy tammanne hospun wadha adusse. Enta ubbay tammanne nam7u wadha. Entaw giddoy kaysi gididi, biratay oyddu biradhe keena orde. 22 Nam7u tuussata huuphiyan naasepe oosetida gumboti de7oosona. Issi gumbuwa geesay ichashu wadha gididi, yuushoy gite misileninne oromaane misilen alleeqetidi uttis. Nam7antho gumboyka iya mela. 23 Gumbotas miyen miyen de7iya oromaaneta misileti uddufun tammanne usupuna; yuushuwan de7iya gite misiletape bolla baggara de7iya oromaane misileti issi xeeta.

24 Kawa naageysata halaqay Nabuzardaani kahine halaqaa Saraya, iya kaalliya kahiniya Sofoniyaasanne penge naagiya heedzu asata oykis. 25 Kataman de7iya asaape toora mocona, kawa zoreysatape laapun asata efis. Toora mocona, xaafiya, asaa olanchota dooriya halaqanne hara usupun tammu asata efis. 26 Nabuzardaani enta ubbaa ekidi, Babiloone kawako, Irbila katamaa efis. 27 Hamaata biittan, Irbila kataman, Babiloone kawoy enta ubbaa wodhisis. Hessada hanidi, Yihuda asay banta biittafe di7etidi bidosona.

28 Nabukadanaxoori kawotida laapuntho laythan, heedzu mukulunne laatamanne heedzu asay Yihudape di7etis. 29 Tammanne hospuntho laythan hospun xeetanne hastamanne nam7u asay Yerusalaamepe di7etis. 30 Nabukadanaxoori kawotida laatamanne heedzantho laythan kawa naageysata halaqay Nabuzardaani laapun xeetanne oytamanne ichashu asaa di77is. Di7etida asa tayboy oyddu mukulunne usupun xeeta.

31 Yo7akini di7etida hastamanne laapuntha laythan, tammanne nam7antho ageenan, laatamanne ichashantho gallasan, Yoor-Marodaaki kawotida laythi Yihuda kawa Yo7akina bonchidi, qashope birshis. 32 Yoor-Marodaaki Yo7akinara mal7o qaala odetidi, Babiloonen di7on de7iya hara kawota ubbaafe aathidi iya bonchis. 33 Hessa gisho, Yo7akini qasho keethan ma7iya ma7uwa laammidi, ba de7o laytha ubban kawo gaytape mishe de7is. 34 Yo7akini hayqana gakanaw, gallas gallas iyaw koshshiyaba ubbaa Babiloone kawoy immis.