Ermiyaasa Milalsa
Gaatha Qofa
Ermiyaasa Milalsay, K.Y.S. 600 laytha heeran, Yerusalaame laaletethanne asaa di7etetha gaason, ginxon giigida ichashu azzano milalsata oykis. Ha maxaafa daro baggay yeehobaanne zelelsaba odikoka, Xoossan ammanetethabanne ufaysan duussaba odiya kifileti de7oosona.
Ha ginxota Ayhude asay banta biitta bolla gakida dhayuwa hassayanaw laythan laythan xooman azzano goyinno wogata poliya gallasatan go7etoosona.
Maxaafa Ayfe Qofata
Yerusalaame waayiya (1:1-22)
Xoossa hanqonne Yerusalaame pirdetethi (2:1-22)
Xoossa deriyas Ufaysi de7ees (3:1-66)
Yerusalaamey zine, hachinne wonto (4:1-22)
Maarota woossa (5:1-22)
1
Yerusalaame Waaye
Kase asi kumida katamiya
ha77i waanada asi bayna bessi gidadee?
Kase kawotethata giddon gita gididaara
ha77i waanada am7o gidadee?
Katamata giddon kawo gididaara
ha77i waanada aylle gidadee?
Qamma yibbata yeeho yeekashe aqawusu;
afuthi I ayfe karera duge wodhees.
Kase iyo doseysatape
ha77i iyo minthethiya issoyka baawa.
I laggeti iyo aathidi immidosona;
iw morke gididosona.
Yihudi naaqetada; aylletada di7etasu;
ha77i kawotethata giddon de7awusu;
shin shempo bessi demmabuku.
Iya metootada de7ishin,
yedetheysati iyo demmidosona.
Laytha ba7aale bonchanaw yaa asi bayna gisho,
Xiyoone ogeti yeekosona.
I dirsa pengeti baysatidosona;
I kahineti oolosona.
Yan de7iya geela7o nayti un7etidosona;
iyaka un7etada yeekawusu.
I morketi iw godaa gididosona;
entaw injetin de7idosona.
I, nagaraa gaason Goday iyo un7ethis;
I nayti morketan di7etidi bidosona.
Xiyooni bonchoy iipe qaaretis;
I, halaqatika miya bessi dhayida gaarada hanidosona;
Enti wolqa dhayidi
bantana yedetheyisata sinthafe baqatidosona.
Yerusalaamey ba metuwanne ba un7a gallasan,
beni ba boncho shaluwa hassayawusu.
I, asay morketa kushen aadhidi imetida wode,
iyo maaddiya issoyka bentibeenna.
I morketi iyo xeellidi,
I dhayuwan miicidosona.
Yerusalaamey gita nagara oothida gisho tunasu;
iyo bonchida ubbay I kalluwa be7ida gisho kadhees;
iya oolashe guye simmasu.
Tunatethi I afilaa bolla bentis;
sinthafe ba bolla yaanaba qopabuuku.
I kundethay daganthiyaba gidis;
iyo minthethiya oonika baawa.
Iya, “Abeeti Godaw, ta un7etetha be7a!
ta morketi tana xoonidosona” yaagasu.
10 Morketi I boncho shaluwa bonqidosona;
kase ne maabara giddo gelonna mela,
neeni diggida asati, I keethaa gelishin be7asu.
11 I asati koshatidi kathi demmanaw oolosona;
enti de7on daanaw banta shaluwa kathan laammoosona.
Yerusalaamey haysada yaagasu;
Abeeti Godaw, tana xeella;
ta kawushatethaa be7a!
12 Hinteno, haysara aadheysato,
haysi hintew aykoka daanennee?
Ane be7ite; akeekite;
ba eexiya hanqo gallasan,
Xoossay ta bolla ehida
metuwa mela metoy de7ii?
13 Bollafe tama duge yeddis;
he tamay ta meqethaa giddo gelis.
Ta tohoy xihen oyketis; tana guye zaaris;
tana gallas ubbaa labbanthidi yeggi aggis.
14 Ta oothida nagara ubbaa shiishi qachidi,
qambarada ta gannan wothis;
yaatidi ta wolqaa wursis.
Ta eqetanaw danda7onna asaas,
tana aathidi immis.
15 Goday ta giddon de7iya
wolqaama olanchota ubbaa diggis.
Ta yalagata dhaysanaw wode qachis;
woyne yedheysada,
Goday Yihuda geela7ota yedhis.
16 Taani yeekashe ta afuthaa gussey hessasa;
tana minthetheynne katisiya oonika baawa;
morkey goobin, ta nayti un7etidosona.
17 Xiyooney ba kushiya miccasu;
shin iyo minthethiya oonika baawa.
I yuushuwan de7eysati
iyo morkanaada Goday oothis.
Yerusalaamey enta giddon tuna gidasu.
18 Iya haysada yaagasu; “Goday xillo;
iya kiitetonna ixiday tana.
Hinteno, asato ubbay si7ite; ta metuwaka be7ite;
ta panthatinne ta geela7oti di7etidosona.
19 Ta laggeta xeegas; shin enti tana cimmidosona;
kahinetinne cimati banta shempuwa ashshanaw,
kathi koyishe katama giddon hayqidosona.
20 Abeeti Godaw, ta waayiya be7a!
ta garsay dagammis.
Taani daro makallida gisho, ta wozanay meqis;
karen mashshi wursees; son hayqoy de7ees.
21 Asay ta zelelsa si7idosona;
shin tana minthethiya issi asika baawa.
Ta morketi ta metuwa si7idosona;
ne ta bolla oothidaban ufaytidosona.
Enti taada hanana mela,
enta bolla ne awaajida gallasaa eha!
22 Enta iitatetha ubbay ne sinthe gako;
ta nagaraa gisho tana seeridaysada entaka seera;
ta zelelsay daris; ta wozanayka meqis.”