2
Qadhey Bayna Seera
1 Goday ba hanqo shaarape garsan,
Xiyoone na7iw, waatidi wothide!
Isra7eele bonchuwa salope sa7a holis;
ba hanquwa gallas,
iya tohoy yedhiya bessaa qopibeenna.
2 Goday Yihudan keethata ubbaa qadhetonna dhaysis;
ba hanquwan Yihuda biitta miixaa ubbaa laallis;
he kawotethaanne halaqata sa7an duge yeggidi kawushis.
3 Ba wolqaama hanquwan Isra7eele wolqaa mentherethis;
morkey iya olanaw yaa wode
Goday ba ushacha kushiya enta bollafe diggis.
Ba yuushuwan de7iyaba ubbaa miya tamada,
Yayqooba bolla tama lacoy eexis.
4 Morkeda I ba dongiya enta bolla dafis;
un7ethiya iya ushacha kushey giigis.
Ayfees lo77iya asa ubbaa wodhis;
Xiyoone bolla ba sheniya tamada qolis.
5 Goday morkeda hanidi, Isra7eele dhaysis;
kawo gadhotanne miixa ubbaa laallis
yihuda asaas yeehonne kayo gujis.
6 Ba keetha atakilte gaden de7iya shaqarada shoddidi holis;
laytha ba7aaletinne Sambaatati dogetanaada oothis;
ba gita hanquwan kawanne kahiniya kawushis.
7 Goday ba yarsho bessa kadhis; ba keethaa aggaagis;
kawo gadhota gimbiya morketa kushen yeggis.
Laytha ba7aale bonchiya gallasa wocamada,
morketi Xoossa keethan wocamidosona.
8 Goday Xiyooni na7e dirsa gimbiya,
laallanaw qachis; I bolla wadha wodoro yeggis.
Iyo dhaysona de7ishe ba kushiya zaarenna;
gimbeynne miixay issife kundanaada oothis.
9 Yerusalaame penge sanqati biittan moogetidosona;
enta gorde mithata mentherethidi dhaysis.
Kawoynne moorinnati di7etidi kawotethata giddo bidosona;
higge tamaarsey baawa;
nabetika hizape guye qoncethi be7okona.
10 Xiyoone cimati si77i gidi biittan uttidosona;
banta huuphen baana qolidi kayo ma7o ma7idosona;
Yerusalaame geela7oti sa7an duge hokidosona.
11 Ta asay dhayida gisho,
guutha nayti katamaa ogiya bolla
daaburidi kundida gisho,
ta ayfey afuthan tulcatis;
ta wozanay azzanon dagammis.
12 Enti banta aayetako,
“Kathi imma! haathe imma”
yaagidi waassoosona;
katamaa ogiyan madunxidi labbaniya asada,
enti daaburin enta shempoy enta aayeta ki7on keyees.
13 Yerusalaame naatte, taani nebaa ay gaanee?
ne qohuwa ta aybira ginayo?
Dosetida Xiyoone geela7e, ta nena waatada minthetho?
Ne madunthay abba mela ciimmo;
nena ooni pathanaw danda7ii?
14 Ne nabeti wordonne pathonna qoncethi be7idosona;
ne di7etonna mela ne nagaraa qoncisidi odibookona;
enti balethiya wordo qoncethi new be7idosona.
15 Ne matara aadhiya ubbay ba kushiya baqees;
“Biittan ubbaafe aadhada lo77iya katamiya hanno?
Biitta ubbaas ufaysi geetetida katamiya hanno?”
yaagidi nena qelqisishe banta huuphiya qaathidosona.
16 Ne morketi ubbay banta doona
ne bolla dooyidosona;
ne bolla qelqisidosona.
Banta achaa qarcishe haysada yaagosona;
nu enta dhaysida, nu amotiday hessa
wursethan be7ida.
17 Goday ba qopidaba oothis;
kase odida ba qaala polis.
Yerusalaames qadhetonna iyo laallis
I morketi ufaytana mela,
morketa wolqaa minthis.
18 Xiyoone, ne dirsa gimbey Godaako waasso!
ne afuthay qammanne gallas shaafada goggo!
Newuka shempofa;
ne ayfiyas shempo immofa!
19 Qamma dendada waassa;
Godaa sinthan ne wozanaa haathada gussa.
Koshatidi oge doonan kundida ne nayta shempuwas
ne kushiya iyako pude denthada woossa!
20 Abeeti Godaw, be7a!
kase haysada neeni oodde bolla oothadii?
Aayeti banta ki7on ko77isidi
dichida banta nayta mo gay?
kahinetinne nabeti Xoossa keethan hayqo gay?
21 Ciminne na7atethi oge bolla kundidosona;
geela7otinne panthati mashshan wuridosona.
Neeni ne hanquwa gallas enta wodhadasa;
entaw qadhetonna enta buthadasa.
22 Gibira gallas ase xeegeysada,
daganthiya ta morketa ubba bessafe xeegadasa.
Godaa hanqo gallasan
oonika kessi ekibeenna woyko attibeenna.
Taani ta ki7on ko77isada dichida
nayta ubbaa morkey wodhidi dhaysis.