3
Xoossay Ammanthees
1 Godaa shene xam7an
meto be7ida asi tana.
2 Tana ba sinthafe kessidi,
poo7oy bayna dhuman wothis.
3 Gallas kumethi tana shocanaw
zaari zaari ba kushiya denthis.
4 I, ta galbaanne ta ashuwa cimisis;
ta meqethaa menthis.
5 I, ta yuushuwa metoninne
daaburan diris.
6 Beni hayqida asada
tana dhuman wothis.
7 Ta kessa ekonna mela,
ta yuushuwa diris;
deexo duthan tana duxis.
8 Taani maade koyada iya xeegin,
iyako waassin, tana si7onna ixis.
9 Ta ogiya wolqaama shuchan gordis;
ta ogiya geellayis.
10 I, taw zugidi naagiya babantha mela,
qosetidi naagiya gaammo mela gidis.
11 I, tana ta ogiyape kessidi duuserethis;
tana asi bayna bessan yeggi aggis.
12 Ba dongiya dafidi,
tana dukanaw mallis.
13 Ba dongiya dafidi,
ta wozana ayfen caddis.
14 Taani asa ubbaas miichas attas;
gallas kumethi bore yethas gidas.
15 I, tana meton camisis;
camo godare uuthi tana ushshidi kalsis.
16 I, ta achaa acen menthis;
tana baanan yedhis.
17 Saroy taape haakis;
taani inje duussu dogas.
18 Hessa gisho,
“Ta wolqay taape eketis;
taani Godan wothida ufaysa ubbay dhayis”
yaagas.
19 Ta metuwanne ta un7aa hassayin de7oy tana cammis.
20 Ta hessa kumethi dogike; ta shempoy azzanees.
21 Gidoshin, ta issiba ta wozanan qopiya wode ta ufaysan kumayis.
22 Hessika, nuuni dhayboonay
Godaa siiquwape dendoysana;
iya qadhey wuri erenna.
23 Enti wonta wonta oorathi;
ne daro ammanthasa.
24 Goday ta saama;
hessa gisho, ta iyan ufaysi wothana.
25 Iyan banta ufaysa wotheysatasinne
iya koyeysatas Goday lo77o.
26 Asi si77i gidi Godaa atotethan naagiko lo77o.
27 As ba na7atethan meto danda7a tamaariko lo77o.
28 Goday meto ehiya wode si77i gidi utto.
29 Iyaw sinthafe ufaysi daanaw danda7iya gisho bana ziqi ootho.
30 I ba shakala baqeysas immo; cashshe kallo.
31 Goday ase merinaw yeggenna.
32 I asa bolla meto ehikoka,
ba merina siiquwa darotethan zaaridi qadhetees.
33 I asa bolla meto woyko un7a ehidi ufaytenna.
34 Bittan de7iya qasho asa banta tohuwpe garsan yedhiya wode,
35 Ubbaafe Wolqaama Xoossaa sinthan asa maati yedhetiya wode,
36 Xillo pirdi dhayiya wode Goday hessa ubbaa be7eneyee?
37 Goday kiittonashin odidi polisanaw danda7ey oonee?
38 Iitaba gidin lo77oba odi poley Ubbaafe Dhoqa Xoossa gidenneyee?
39 Yaatin, asi de7on de7ishe ba nagaraa gisho seeretiya wode ayis zuuzumii?
40 Ane nu ogiya paacoos; Godaako simmoos.
41 Nu wozanaa nu kushiyara salon de7iya Xoossaako denthidi haysada yaagos:
42 Nu nena naaqida; new makallida;
neka nuus atto gabaaka.
43 Ne hanquwan kametada nuna yedethada;
ne nuus qadhetonna nuna wodhadasa.
44 Nu woosay neeko gakonnaada, nenatethaa shaaran kammadasa.
45 Asaa giddon nuna pitonne buure oothadasa.
46 Nu morketi ubbay nu bolla banta doona dooyidosona.
47 Nu dagamaninne giten gelida; metoninne un7an laaletida.
48 Ta asaa gakida waayiya gaason ta ayfepe afuthu shaafada goggees.
49 Ta ayfey aggonna afuxees.
50 Goday salope duge be7ana gakanaw hessi hanees.
51 Ta kataman de7iya maccasata bolla gakidaba ta ayfey be7ida wode ta wozanay azzanis.
52 Coo tana morkeysati kafo shankatiyada tana shankatidosona.
53 Ta paxa de7ishin tana ollan yeggidi,
ollaa doona shuchan gordidosona.
54 Haathi kumidi ta huuphera goggiya wode ta dhayas gada qopas.
55 Abeeti Godaw, ta ciimmo ollan de7ashe ne sunthaa xeegas.
56 Ta waasuwa si7anaada ta nena woossiya wode tana si7adasa.
57 Taani nena xeegida wode taako shiiqada, “Babofa” yaagadasa.
58 Abeeti Godaw ne ta mootuwa mootetada tana wozadasa.
59 Abeeti Godaw, ne ta un7aa be7adasa;
hessa gisho, ne taw pirda.
60 Enti halo keyanaw ta bolla maqetiya maquwa ubbaa be7adasa.
61 Abeeti Godaw, enti tana cayiya cashshaanne
ta bolla maqetiya maquwa ubbaa si7adasa.
62 Ta morketi gallas kumethi
ta bolla zuuzumeysanne kalkasheysa si7adasa.
63 Enti uttishenne eqishe tana boridi yexoosona.
64 Abeeti Godaw, enti oothida oosuwas bessiya zaaruwa entaw qanxa!
65 Enta wozanaa eysa; ne baadethay enta gako.
66 Abeeti Godaw, ne enta ne hanquwan yedetha;
salope garsan enta dhaysa.