1 Wogga wode wonta buroo geeyonna de7ishin, Magdela Mayraama, Yesuusi moogetida duufuwa bada shuchay he duufuwa doonape dendidaysa be7asu. 2 Simoon Phexroosakonne Yesuusi dosiya hanko tamaariyako woxa bada, “Duufuwape Godaa efidosona; iya awun wothidaako nu eroko” yaagasu.

3 Hessa gisho, Phexroosinne hanko tamaarey keyidi duufuwa bidosona. 4 Nam7ayka issife woxidosona, shin hanko tamaarey Phexroosape aadhidi sinthatidi duufuwa gakis. 5 He tamaarey hokidi, moogo afilaa be7is, shin duufuwan wodhibeenna. 6 Simoon Phexroosi iya kaalli yidi, duufuwan wodhidi moogo afilay yan de7eysa be7is. 7 Qassi Yesuusa huuphen xaaxetida afilay xaaxetida mela dumma issi bessan de7eysa be7is. He afilay dumma de7eesipe attishin, moogo afilara issife deenna. 8 He wode, sinthatidi duufuwa gakida hanko tamaarey geli be7idi ammanis. 9 Yesuusi hayqope dendanaw besseysa odiya Geeshsha maxaafaa qaala enti buroo akeekibokona. 10 Hessafe guye, iya tamaareti banta soo simmi bidosona.

11 Shin Mayraama he duufuwa doonan eqada yeekashe hokada duufuwa giddo xeellasu. 12 Bootha ma7o ma7ida nam7u kiitanchoti Yesuusa ahay zin7ida bessan issoy huuphesoora hankoy tohosoora uttidashin be7asu. 13 Enti iiko, “Maccasete, ayis yeekay?” yaagidi oychidosona.

Iya, “Enti ta Godaa efidosona; enti awun wothidaako taani erike” yaagasu.

14 Hessa gidaape guye, iya guye simma xeelliya wode, Yesuusi yan eqidaysa be7asu. Shin I Yesuusa gididaysa erabuku. 15 Yesuusi iiko, “Maccasete, ayis yeekay? Oona koyay?” yaagidi oychis.

Mayraama atakilte oosanchuwa daanin, “Godaw, ne ekidaba gidiko, iya awun wothidaako taw odarkii. Taani iya ekana” yaagasu.

16 Yesuusi iiko, “Mayraame” yaagis.

Iya iyako simmada, Ibraawetho doonan “Rebuuni” yaagasu. Hessas birshethay “Astamaariyaw” guussu.

17 Yesuusi iiko, “Taani buroo ta Aawako boonna gisho, tana oykofa. Shin ta ishatako bada, ‘Taani ta Aawakonne hinte Aawako, ta Xoossaakonne hinte Xoossaako, simmana gis’ gada entaw oda” yaagis.

18 Magdela Mayraama Godaa be7idaysanne iw hessa I odidaysa bada iya tamaaretas odasu.

19 Wogga wode omarsi, iya tamaareti Ayhudetas yayyidi kariya gordidi shiiqi uttidashin, Yesuusi yidi, enta giddon eqidi, “Saroy hintew gido” yaagis. 20 Hessa gidi simmidi ba kushiyanne ba miya enta bessis. Iya tamaareti Godaa be7ida wode daro ufaytidosona. 21 Yesuusi zaaridi entako, “Saroy hintew gido; ta Aaway tana kiitidaysada taanika hintena kiittayis” yaagis. 22 Hessa gidaape guye, enta bolla ufu gidi punnis. Qassi, “Geeshsha Ayyaana ekite. 23 Hinte atto gida asaa nagaray atto geetetana. Hinte atto goonnayisata nagaray atto geetetenna” yaagis.Maato 16:19; 18:18.

24 Shin tammanne nam7u tamaaretape issoy, Didimoosa geetetiya Toomasi, Yesuusi yida wode entara deenna. 25 Hessa gisho, hanko iya tamaareti Toomasako, “Nuuni Godaa be7ida” yaagidosona.

Shin Toomasi entako, “Misimaaren I cadetida iya kushiyan de7iya beeta be7onnanne he beeta ta biradhen bochonna, qassi ta kushiya iya miyen yedda be7onna ammanike” yaagis.

26 Saamintafe guye, Yesuusa tamaareti qassika son shiiqidi uttidosona; Toomasika entara de7ees. Karey gordetidi de7ishin Yesuusi yidi, enta giddon eqidi, “Saroy hintew gido” yaagis. 27 Hessafe guye, Yesuusi Toomasako, “Ta kushiya ne biradhen bochada be7a. Qassi ne kushiya ta miyiyan yedda be7a. Neeni sidhopa, ammana” yaagis.

28 Toomasi zaaridi, “Ta Godaw, ta Xoossaw” yaagis.

29 Yaatin Yesuusi, “Neeni tana be7ida gisho ammanadasa, shin tana be7onna ammanidaysati anjetidaysata” yaagis.

30 Yesuusi ha maxaafan xaafetiboonna hara daro malaatata ba tamaareta sinthan oothis. 31 Shin Yesuusi I Kiristoosa, Xoossaa Na7aa gideysa hinte ammanana melanne ammanidi iya sunthan de7o demmana mela haysi xaafetis.