21
Yesuusi Laapun Tamaaretas Qoncis
1 Hessafe guye, Yesuusi Xibradoosa Abba matan ba tamaaretas zaari qoncis. I entaw haysafe kaallidi de7iya hanotan qoncis. 2 Simoon Phexroosi, Mente geetetiya Toomasi, Qaana Galilape yida Natina7eeli, Zabdiyoosa naytinne Yesuusa tamaaretape hara nam7ati issife de7oosona.
3 Simoon Phexroosi entako, “Taani molo oykanaw bayis” yaagis.Luqa 5:5.
Enti, “Nuka neera baana” yaagidi, wogoluwa giddo gelidosona. Shin enti he qamman aybi moloka oykibookona.
4 Wonta guura xalqey dolanaape sinthe, Yesuusi abba gaxan eqis, shin iya tamaareti Yesuusa gididaysa eribookona. 5 Yesuusi entako, “Ta laggeto, molo oykibeeketii?” yaagis.
Enti zaaridi, “Aykoka oykibooko” yaagidosona.
6 I zaaridi, “Hinte gitiya wogoluwape ushacha baggara yeggite; guutha molo hinte oykana” yaagis. Hessa gisho, gitiya ushacha baggara yeggidosona. Moloy darida gisho goochi kessanaw xoonetidosona.Luqa 5:6.
7 Yesuusi dosiya tamaarey Phexroosako, “Haysi Godaa!” yaagis. Simoon Phexroosi I Godaa gidaysa si7ida wode, kallo de7iya gisho, ba ma7uwa ma7idi abba giddo gupi gelis. 8 Shin wogoluwan attida hanko tamaareti moloy kumida gitiya goochidi, abbaafe gaxa keyidosona. Enti abbaafe nam7u xeetu wadha mela haakoosona. 9 Enti abbaafe gaxa keyida wode, xiifa bonqon moloy de7eysanne uythi be7idosona.
10 Yesuusi entako, “Ha77i hinte oykida moluwape guuthara hammite” yaagis.
11 Simoon Phexroosi wogoluwan gelidi, xeetanne ishatammanne heedzu wogga moloti kumida gitiya goochidi abbaafe gaxa kessis. Moloy hessa mela daro gidin gitey daaketibeenna.
12 Yesuusi entako, “Haa yidi miite” yaagis. I Godaa gideysa enti erida gisho, iya tamaaretape issoyka, “Neeni oonee?” gidi iya oychanaw minniday baawa. 13 Yesuusi yidi, uythaa ekidi entaw immis; moluwaka hessada immis.
14 Yesuusi hayqope dendidi ba tamaaretas qoncishin haysi heedzantho.
Yesuusanne Phexroosa
15 Enti midaape guye, Yesuusi Simoon Phexroosako, “Yoona*Yoona: Girike doonan Yoona geetetiya sunthay Yohaanisa geetetiya sunthaas saphotho sunthu. na7aw Simoona, tana haysatape aathada dosay?” yaagis.
Simoon Phexroosi, “Ee Godaw, taani nena doseysa ne eraasa” yaagis.
Yesuusi iyako, “Ta dorsa marata heemma” yaagis.
16 Yesuusi qassika, “Yoona na7aw Simoona, tana dosay?” yaagis.
Simoon Phexroosi, “Ee Godaw, taani nena doseysa ne eraasa” yaagis.
Yesuusi, “Ta dorsata heemma” yaagis.
17 Yesuusi heedzantho, “Yoona na7aw Simoona, tana dosay?” yaagis.
Yesuusi heedzantho Simoon Phexroosako, “Tana dosay?” yaagidi oychida gisho, Phexroosi azzanidi, “Godaw, neeni ubbaba eraasa; taani nena doseysa ne eraasa” yaagis.
Yesuusi, “Ta dorsata heemma. 18 Taani new tuma odayis; neeni na7atethan de7iya wode, nerka dancetada, ne koyida soo baasa. Shin ne cimida wode ne kushiya micca bessaana. Hari dancisana; ne dosonna soo efana” yaagis. 19 Yesuusi hessa Phexroosi ay mela hayqo hayqidi, Xoossaa bonchisaneeko erisanaw gis. Hessa gidaape guye, Yesuusi Phexroosako, “Tana kaalla” yaagis.
Yesuusanne Dosetida Tamaariya
20 Phexroosi guye simmidi, Yesuusi dosiya tamaarey baape guyera yeysa be7is. He tamaarey, kaho miya bessan Yesuusako shiiqidi, “Godaw, nena aathidi immanay oonee?” gidaysa.Yoha 13:25. 21 Phexroosi he tamaariya be7idi, “Godaw, ha addey qassi waananee?” yaagidi Yesuusa oychis.
22 Yesuusi iyako, “Taani yaana gakanaw I daana mela taani koyko, hessi nena ay metidee? Neeni tana kaalla” yaagis.
23 Hessa gisho, he tamaarey hayqenna giya oday ishata ubbaa gakis. Shin Yesuusi, “Taani yaana gakanaw, I daana mela taani koyko nena ay metidee?” yaagisipe attishin, “Hayqenna” gibeenna.
24 Ha odabaa markatidaynne haysa xaafiday he tamaariya. Iya markatethay tuma gideysa nuuni eroos.
25 Yesuusi oothida hara darobay de7ees. Ta qopin, ubbabay huuphen huuphen xaafetidaako, xaafetiya maxaafatas kumetha alamey wothanaw gidanaba daanenna.