Iyyoba Maxaafa
Gaatha Qofa
Iyyoba maxaafan be7iya taarikey, daro waayenne metoy gakida issi xillo asa taarike. Iyyobinne iya laggeti he waayiya gaason bantaw si7etidaba ginxon qoncisida heedzu odata be7oos.
Iyyoba laggeti Iyyoba gakida metuwaba, benipe eriya banta ammanuwa wogan zempidi qofa immoosona. Hessa gisho, enti, “Xoossay xillo asas lo77oba immees; shin iita asi seerees. Iyyoba ha waaye ubbay gakiday, I nagara oothida gishosa” yaagosona. Iyyobi geeshshinne xillo asi gidida gisho, hessa mela seeri bessiya ase gidenna. Gidoshin, hessa mela waayey iya ayis gakidaako Iyyobi eranaw danda7ibeenna. Iyyoba ammanoy qaaxonna ixikoka, suure pirda immidi, bana la77a kessana melanne beni iya de7uwako zaarana mela, minthidi Xoosse woossis.
Xoossay oychida oyshaas Iyyobi zaaro immanaw danda7onna ixikoka, iya ammano minotetha nashshidi, ba wolqaanne cincatetha malaalsiya ogen qoncisis. Hessafe guye, Iyyobi Xoossay gita gideysanne cinca gideysa eridi, minotethinne hanqoy kumida qaalata odetida gisho qiirotidi maarota oychis.
Wursethan Iyyobi beni de7uwako simmidaysanne iya aquwa kaseysafe dako darsidaysa odees. Iyyoba laggeti iya gakida metoy awura yidaako entaw geliboonna gisho, Xoossay enta bolla hanqetis. Meeze ammano qofape aathidi Xoossay gita gideysa eriday Iyyoba xalaala.
Maxaafa Ayfe Qofata
Iyyoba gakida metuwanne waayiya (1:10—2:13)
Iyyobanne Iyyoba laggeta oda (3:1—31:40)
Koyro haasaya (4:1—14:22)
Nam7antho haasaya (15:1—21:34)
Heedzantho haasaya (22:1—31:40)
Elihu haasaya (32:1—37:24)
Xoossay Iyyobas zaaro immis (38:1—42:6)
Xoossay Iyyoba zaaridi ubbaban anjis (42:7-17)
1
Iyyoba Paacetetha
1 Uxe biittan Iyyoba geetetiya issi asi de7ees; I borey bayna asi, suure asi, Xoosse yayyiyanne iitabaape haakida asi. 2 Iyaw laapun adde naytinne heedzu macca nayti de7oosona. 3 Iyaw laapun mukulu dorsati, heedzu mukulu gimaleti, ichashu xeetu waatha boorati, ichashu xeetu macca haretinne daro aylleti de7oosona. Doloha bagga biittan de7iya asa ubbaafe I aadhida dure asi.
4 Iya adde nayti banta son son gibira giigisidi, banta heedzu micheta xeegidi issife moosonanne uyoosona. 5 Gibira gallasati poletiya wode Iyyobi ba nayta xeegisidi, “Ooni eri ta nayti banta wozanan Xoosse baaddidi nagara oothonna aggokona” gidi wonta guura dendidi, entana geeshshanaw ba nayta issuwa issuwa sunthaa xeegidi xuussa yarsho yarshees. Iyyobi hessa ubba wode oothees.
Iyyoba Koyro Paacetetha
6 Issi gallas kiitanchoti Godaa sinthan bentanaw yidosona; Xalaheyka qassi entara yis. 7 Goday Xalahiyako, “Neeni awupe yadii?” yaagis.
Xalahey, “Taani sa7a ubban yaanne haanne yuuyashe gam7as” yaagidi zaaris.
8 Goday Xalahiyako, “Yaatin, neeni ta aylliya Iyyoba loytha be7adii? Sa7a bolla iya mela borey bayna asi, suure asi, Xoosse yayyiyanne iitabaape haakida asi baawa” yaagis.
9 Xalahey zaaridi, “Tuma Iyyobi Xoossas coo yayyii? 10 Iyanne iya soo asaa, iyaw de7iyaba ubbaa neeni dirada naagabikii? I oothiya ooso ubbaa neeni anjida gisho iya mehe wudey biitta ubbaa bolla daris. 11 Shin neeni ne kushiya yeddada, iyaw de7iya aquwa ubbaa shociyako, tuma I nena som7on baaddana” yaagis.
12 Goday Xalahiyako, “Ero lo77o, iyaw de7iyaba ubbay ne kushena, shin iya bochofa” yaagis. Hessafe guye, Xalahey Godaa sinthafe keyidi bis.
13 Issi gallas Iyyoba adde naytinne macca nayti banta bayra ishaa son moosonanne woyne ushshi uyoosona. 14 Issi kiitetida asi Iyyobako yidi, “Nuuni boorata waaxidi goyishin, haretika nu matan mishin, 15 Saaba biitta asati akeekona yidi ola kessidi, ubbaa bonqidi ekidosona; qassi aylletaka mashshan wodhidosona. Yaatin, taani ta xalaala attada ha hanidaba new odanaw yas” yaagis.
16 I buroo odishin hara asi yidi, “Salope tami wodhidi dorsatanne heemmeyisata mis. Yaatin, taani ta xalaala attada ha hanidaba new odanaw yas” yaagis.
17 I buroo odishin hara asi yidi, “Kaldaaweti heedzu cugan shaaketidi yidi, nuna olidi gimaleta ubbaa eki bidosona; aylletaka mashshan wodhidosona. Yaatin, taani ta xalaala attada ha hanidaba new odanaw yas” yaagis.
18 I buroo odishin, hara asi yidi, “Ne adde naytinne macca nayti banta bayra ishaa son misheenne woyne ushshi uyishee de7ishin, 19 wolqaama gotey akeekona mela biittafe dendidi, keethaa shocin, keethay enta bolla kundidi nayta wodhis. Yaatin, taani ta xalaala attada ha hanidaba new odanaw yas” yaagis.
20 Hessafe guye, Iyyobi dendidi, kayos ba ma7uwa pheedhis; ba huuphiya buluusis; biittan gufannidi goyinnishe,
21 “Taani ta aaye ulope kallo yeletas;
hayqasheka taani kallo baana;
Goday immis; Goday zaaridi ekis;
Godaa sunthay galatetto” yaagis.
22 Ha ubbanka Iyyobi nagaraa oothibeenna; Xoossaa bolla iitaba odetibeenna.