5
1 “Iyyoba, new koyana asi de7iko ane xeega!
Kiitanchotape oodeko ne xeellanee?”
2 Eeya uraa lancey wodhees;
akeeki bayna uraa qanaatey dhaysees.
3 Eeya uray minnidi de7ishin be7as;
shin qoponna iya keethay baadetis.
4 Iya nayti saroy bayna daana;
pirda dabaaban entaw eqiya asi bayna gisho enti qohetana.
5 I shiishida kathaa koshatida asay maana;
hari attoshin aguntha giddon dolidaysaka aggokona.
Saamotidaysati iya shaluwa ekanaw amottoosona.
6 Metoy sa7ape keyenna;
waayey biittafe dolenna.
7 Tami pinxidi wodheysada,
asi metos yeletis.
8 “Ta nena gidiyako ta Xoossako shiiqana;
ta mootuwaka iya sinthan wothana.
9 I taybetonna malaatata,
pilgetonna wolqaamabata oothees.
10 Ira biittan bukisees;
goshsha gadiyas haathe yeddees.
11 Kawushata dhoqu dhoqu oothees;
kayoteyisata minthethidi ufaysees.
12 Enta qofay poletonna mela,
genanchota halchuwa hada oothees.
13 Cincata enta gene oosuwan oykees;
genanchota maquwa aathidi yeggees.
14 Gallasay entaw dhuma gidana;
seeta gallas dhuman hemetiya asada tattafana.
15 Manqota enta morketa mashshafe ashshees;
enta wolqaamata kushiyape wothi ekees.
16 Hessa gisho, manqotas ufaysi de7ees;
geellatethi si77i oothees.”
17 “Xoossay seeriya asi anjetidaysa;
hessa gisho, Ubbaa Danda7iya Xoossaa seera kadhopa.
18 I menthees, shin zaaridi koolees;
I madunxisees, shin iya kushey dhallees.
19 Usupun qommo qohotape I nena ashshana;
laapunthoy nena bochenna.
20 Kosha laythi hayqope,
ola wode mashshafe nena ashshees.
21 I nena iita inxarsafe naagana;
boshi gakiya wode yayyaka.
22 Bosha bollanne kosha bolla ne miicana;
bazzo do7atas yayyaka.
23 Ne goshsha biittan shuchi deenna;
bazzo do7atara ne saron daana.
24 Ne dunkaaney saro gideysa ne erana;
ne daraa ne xomoosiya wode aybika pacenna.
25 Ne yeletay daranaysanne
ne kochay maata mela gidanaysa ne erana.
26 Kathi wode naagidi caketeysada,
neeni cimatethi kaallada duufo baana.
27 “Iyyoba, nuuni hessa ubbaa pilgidi xeellida.
Hessi tuma gidiya gisho akeekada eka” yaagis.