10
1 Tana duussi shaattis!
Hessa gisho, ta zuuzumanaape attishin, si77i giike;
ta shempuwa seela kessana.
2 Taani Xoossaako haysada gaana;
ta bala taw odape attishin, ta bolla pirdofa.
3 Neeni iitata qofaa ufaysan ekashe,
tana un7ethanaw bessii?
ne kushen medhida uraa kadheysi wogee?
4 Ne ayfey asa ayfe meleyee?
neeni asi xeelleysada xeellayee?
5 Ne de7o laythay asa de7o laytha meleyee?
6 Yaatin, ta bala ayis koyay?
Ta nagaraa ayis kaallay?
7 Taani bala gidonaysanne
ne kushepe tana oonika ashshanaw danda7onnaysa ne eraasa.
8 Tana ne kushey giigisidi medhis;
shin ha77i he kushey simmidi tana menthees.
9 Neeni tana biittafe medhidaysa hassaya
Yaatin, ha77i tana zaarada baana oothanaw koyay?
10 Tana maathada ta aaye ulon tigidaynne
meqa maathada Irkisiday nena gidikii?
11 Neeni tana ashonne goga mayzadasa;
shayaninne meqethan waaxadasa.
12 Neeni taw de7onne merinaa siiqo immadasa;
ne naagoy tana paxa wothis.
13 Shin neeni he wodepe doomada ne wozanan
tana qohanaw qopada de7eysa ta erayis.
14 Ta naaquwa ne be7aasa;
ta nagara oothiko seeronna aadhaka.
15 Taani balikoka tana ayye!
Ta xillo gidikoka ceeqetanaw danda7ike.
Ne tana yeella mayzadasa;
waayen wothadasa.
16 Ta otoriko tana gaammoda shankatada oykaasa;
tana qohanaw ne malaalsiya wolqaa zaara zaara bessaasa.
17 Neeni ta bolla ooratha markata ehaasa;
ne hanquwa ta bolla darsaasa;
tana olanaw ooratha olanchota giigisaasa.
18 Yaatin, tana ta aaye ulope ayis kessadii?
Oonika tana be7onna hayqidaako taw lo77oshin!
19 Taani medhetonna attidaako,
woyko ta aaye ulope keyashe duufo gelidaako lo77oshin!
20 Ta guutha de7o laythay wurees gidenneyee?
Ha guutha laythan ufaytana mela tana aggarki!
21 Ta simmonna bessaa boonna de7ishin,
leelida dhuma biitta gakonna de7ishin,
22 iya poo7oy dhuma gidida bessaanne hayqoy kawotida bessaa,
maari bayna bessaanne leelida dhuma biitta boonna de7ishin,
tana aggarki!”