11
Soofara Haasaya
Na7ima biittafe yida Soofari zaaridi,
“Ha hada haasaya ubbaas zaaro immiya asi baawee?
Woyko hessa odida uray tuma gidanaw danda7ii?
Ne hada oday ase si77i oothiya daanii?
Ne qelqisiya wode nena seeriya asi baawee?
Neeni, ‘Ta timirtey tuma;
taani Xoossaa sinthan geeshshi’ ” gaasa.
Xoossay new odiyako,
ba doona dooyidi odetiyako aybe!
Cincatethas daro ogey de7iya gisho,
Xoossay new cincatetha xuura qoncisiyako aybe!
He wode ne seeretida seeray,
besseysafe guutha gideysa eranashin.
“Ciimmo gidida Xoossaa xuuraa eranaw danda7ay?
Woyko Ubbaa Danda7iya Xoossaba pilgada gakanaw danda7ay?
Enti salotape dhoqa; ne ay oothanaw danda7ay?
Enti Si7oolepeka aadhida ciimmo; ne eranaw danda7aka.
Xoossaa cincatethay biittafe dalgees;
abbafeka aadhidi ciimmotees.
10 I yidi nena qasho keethan yeggiyako,
pirda keethi shiishiko, iya digganay oonee?
11 Xoossay pathonna asaa erees;
iitabaa be7iya wode si77i gidi aggenna.
12 Eeya asi cinca gideysafe,
wora harey ase gididi yeletanaysi mata.
13 Neeni ne wozanaa suure oothiko,
ne kushiya iyako micciko,
14 nagaraa ne kushepe haassiko,
ne keethan iitabay doonna mela oothiko,
15 He wode neeni dhoqu gada yeelli bayna ubbaba be7an;
yashshi bayna minnada eqana.
16 Neeni ne metuwa ubbaa dogana;
goggidi aadhida di7oda zaara hassayaka.
17 Ne de7oy seeta gallasa awape aadhidi poo7ana;
ne de7uwa dhumay wonta xalqeda poo7ana.
18 New ufaysi de7iya gisho neeni hirgonna daana;
Xoossay nena naagiya gisho wopu gada daana.
19 Neeni yashshi bayna dhiskana;
daro asay nenan nashetanaw koyana.
20 Shin iitati meto be7ishe akeekokona;
iyape baqatidi attanaw danda7okona;
Enta ufaysay hayqo” yaagis.