28
1 “Bira bookidi kessiya bessinne
worqaa seerisiya bessi de7ees.
2 Birati biittafe keyees;
naase birati shuchu seerisin keyees.
3 Asay xompe ekidi dhumaa poo7isees;
biitta gaathi gakanaw gelees;
sakana dhuman he shuchaa koyees.
4 Asay de7iya bessaafe haakidi,
asa tohoy yedhi eronna soo gakidi,
yan gita olla bookees.
Wodoron yaanne haanne kuullotishe,
asaape koxetidi de7ees.
5 Kathi biittafe mokees;
shin iya giddoy taman seeridi,
shireti shireti wodhees.
6 He zaallafe sanpare geetetiya al7o shuchay keyees;
iya biittafe worqay bentees.
7 He shuchaa bookiya bessa xiloy erenna;
phircoyka be7ibeenna.
8 Iita do7ati he bessaa yedhi erokona;
gaammoy yaara aadhibeenna.
9 Asi mino zaalla mentherethees;
deriya bookidi xaphuwape aathidi yeggees.
10 Zaalla lukidi kanthiya oge kessees;
he al7o shuchaa demmees.
11 Haathi he bessaara goggonna mela zeeres;
geemmidabata poo7o kessees.
12 “Shin cincatethi awupe bentanaw danda7ii?
Akeeki de7iya awee?
13 Asi iya gatiya erenna;
I de7on de7iya medhetethati de7iya biittan bentenna.
14 Abbaa ciimmoy, ‘Cincatethi ta giddon baawa’ yaagees.
15 Cincatethi worqan shametenna
woyko biran bentenna.
16 Cincatethi Ofira worqan,
margidenne sanpare geetetiya al7o shuchan shametenna.
17 Worqinne mastootey iyara liketenna;
worqafe oosetida al7o miishen laametenna.
18 Cincatetha gatey zaagolepe,
almaazepenne al7o shucha ubbaafe aadhees.
19 Toophaze geetetiya Tophe inqoy iyara liketenna;
walahi bayna worqan I shametenna.
20 “Yaatin, cincatethi awupe yii?
Akeeki awupe bentii?
21 De7on de7iya medhetetha ubbaafe geemmidi de7ees;
salo kafoti iya demmokona.
22 Gadoynne hayqoy,
‘Nuuni cincatethaba haythan si7ida’ yaagosona.
23 “Cincatethako efiya ogiyanne I de7iya bessaa
erey Xoossaa xalaala.
24 Xoossay sa7aa gaxa ubbaa xeellees;
salope garsan de7iyaba ubbaa be7ees.
25 Xoossay carkos wolqaa immida wode,
haatha makida wode,
26 iri bukana woga immida wode,
dadas oge wothida wode,
27 Xoossay cincatetha be7is;
be7idi bonchis; paacidi essis.
28 He wode Xoossay asako,
‘Cincatethi Xoossas yayyeysa;
akeeki iitaape haakeysa’ yaagees” yaagis.